Hum se Abdullah bin Muhammad bin Asma ne byaan kiya , kaha ke hum se Juwayriyah bin Asma ne Nafi se , un se Abdullah bin Umar razi Allahu anhuma ne ke jab Nabi Karim salla Allahu alaihi wasallam Ghazwa-e-Khandaq se farigh hue (Abu Sufyan laute) to hum se Aap salla Allahu alaihi wasallam ne farmaya koi shakhs Banu Qurayzah ke muhalla mein pahunchne se pehle namaaz-e-Asr na parhe lekin jab Asr ka waqt aaya to baaz sahabah ne raasta hi mein namaaz parh li aur baaz sahabah razi Allahu anhum ne kaha ke hum Banu Qurayzah ke muhalla mein pahunchne par namaaz-e-Asr parhein ge aur kuch hazraat ka khayal yeh hua ke hamein namaaz parh leni chahiye kyunke Nabi Karim salla Allahu alaihi wasallam ka maqsad yeh nahi tha ke namaaz qaza kar lein . Phir jab Aap se is ka zikr kiya gaya to Aap salla Allahu alaihi wasallam ne kisi par bhi malamat nahi farmayi .

Mujh se Ibrahim ne bayan kiya, hum ko Abdur Wahhab Saqafi ne khabar di, kaha hum se Khalid Hazza ne bayan kiya, un se Ikrimah aur un se Ibn Abbas Radi Allahu Anhuma ne ke Nabi Kareem Sallallahu Alaihi Wasallam ne Badr ki larai mein farmaya tha ke ye hain Jibrail Alaihis Salam apne ghore ka sar thame hue aur hathyar lagaye hue
.

Hum se Ibrahim Bin Musa ne bayan kiya, hum ko Abdul Wahhab ne khabar di, unhon ne kaha hum se Khalid ne bayan kiya, un se Ikrima ne bayan kiya aur un se Abdullah Bin Abbas (Radi Allahu Anhuma) ne bayan kiya ke Nabi Kareem Sallallahu Alaihi Wasallam ne Ghazwa Uhud ke mauqe par farmaya ”Ye Jibrail Alaihis Salam hain, hathiyar band, apne ghore ki lagam thame hue“
.

Mujh se Abdullah Bin Abi Shaiba ne bayan kiya ‘ kaha hum se Abdullah Bin Numair ne bayan kiya ‘ un se Hisham Bin Urwah ne ‘ un se in ke walid ne aur un se Aisha Radi Allahu Anha ne bayan kiya ke joon hi Nabi Kareem Sallallahu Alaihi Wasallam jung-e-khandaq se Madina wapas hue aur hathiyar utaar kar ghusal kiya to Jibrail Alaihis Salam Aap ke pas aaye aur kaha: Aap ne abhi hathiyar utaar diye? Allah ki qasam! Hum ne to abhi hathiyar nahi utaare. Chaliye in par hamla kijiye. Aap Sallallahu Alaihi Wasallam ne daryaft farmaya ke kun par? Jibrail Alaihis Salam ne kaha ke in par aur unhon ne (yahood ke qabila) Banu Quraiza ki taraf ishara kiya. Chunancha Nabi Kareem Sallallahu Alaihi Wasallam ne Banu Quraiza par charhayi ki
.

Hum se Muhammad Bin Abdullah Bin Muhammad Bin Asma ne bayan kiya ‘ kaha hum se Juwairiya Bin Asma ne bayan kiya ‘ in se Nafi ne aur in se Abdullah Bin Umar (Radi Allahu Anhuma) ne bayan kiya ke Ghazwa Ahzab ke din Rasul Allah Sallallahu Alaihi Wasallam ne farmaya ke tamam musalman Asar ki namaz Banu Quraiza tak pahunchne ke baad hi ada karein. Baaz hazrat ki Asar ki namaz ka waqt raste hi mein ho gaya. In mein se kuch sahaba (Radi Allahu Anhum) ne to kaha ke hum raste mein namaz nahi parhein ge. (Kyunke Nabi Kareem Sallallahu Alaihi Wasallam ne Banu Quraiza mein namaz-e-Asar parhne ke liye farmaya hai) aur baaz sahaba ne kaha ke Nabi Kareem Sallallahu Alaihi Wasallam ke irshad ka mansha ye nahi tha. (Balkey jaldi jana maqsad tha) baad mein Aap Sallallahu Alaihi Wasallam ke samne is ka tazkira hua to Aap ne kisi par khafgi nahi farmai
.