Hum se Saeed bin Abi Maryam ne byaan kiya , unhon ne kaha ke hum se Abu Ghassan Muhammad bin Matar Madni ne byaan kiya , unhon ne kaha ke mujh se Abu Hazim Salamah bin Dinar ne Sahl bin Saad ke waaste se byaan kiya , unhon ne byaan kiya ke hamare yahan aik aurat thi jo nalon par apne aik khet mein chuqandar boti . Juma ka din aata to woh chuqandar ukhaar lateen aur ise aik haandi mein pakateen phir oopar se aik mutthi jao ka aata chhirak deteun . Is tarah yeh chuqandar gosht ki tarah ho jate . Juma se wapsi mein hum unhein salam karne ke liye hazir hote to yahi pakwan hamare aage kar deteun aur hum ise chaat jate . Hum log har Juma ko un ke is khane ke aarzoomand raha karte thay .

Hum se Abdullah bin Muslimah Qanabi ne byaan kiya , kaha ke hum se Abdul Aziz bin Abi Hazim ne byaan kiya apne baap se aur un se Sahl bin Saad ne yahi byaan kiya aur farmaya ke dopehar ka sona aur dopehar ka khana Juma ki namaaz ke baad rakhte thay .

Hum se Saeed bin Abi Maryam ne byaan kiya , kaha ke hum se Abu Ghassan ne byaan kiya , kaha ke mujh se Abu Hazim ne Sahl bin Saad razi Allahu anhu se byaan kiya , unhon ne batlaya ke hum Nabi Karim salla Allahu alaihi wasallam ke sath Juma parhte , phir dopehar ki neend liya karte thay .

Hum se Qutaiba Bin Saeed ne bayan kiya, kaha ke hum se Yaqub Bin Abdur Rahman ne bayan kiya, un se Abu Hazim Salama Bin Dinar ne, un se Sahl Bin Saad (Radi Allahu Anhu) ne ke Jummah ke din humein bahut khushi (is baat ki) hoti thi ke humari ek boorhi aurat theen jo is chaqundar ko ukhara latin jise hum apne bagh ki maindon par bo diya karte thay. Wo in ko apni haandi mein pakatin aur is mein thore se jau bhi daal detein. Abu Hazim ne kaha mein nahi janta ke Sahl ne yun kaha na is mein charbi hoti na chiknayi. Phir jab hum Jummah ki namaz parh lete to in ki khidmat mein hazir hote. Wo apna pakwan humare samne kar detein. Aur is liye humein Jummah ke din ki khushi hoti thi. Aur hum dopahar ka khana aur qayloolah Jummah ke baad kiya karte thay
.

Hum se Amr bin Zurarah ne byaan kiya , kaha ke hamain ko Abdul Aziz bin Abi Hazim ne khabar di , unhein un ke walid ne aur un se Sahl razi Allahu anhu ne byaan kiya ke Rasool Allah salla Allahu alaihi wasallam ne farmaya ke main aur yateem ki parwarish karne wala jannat mein is tarah hon ge aur Aap ne shahadat ki ungli aur beech ki ungli se isharah kiya aur in donon ungliyon ke darmiyan thori si jagah khuli rakkhi .

Hum se Abdullah bin Maslamah Qanabi ne bayan kiya, kaha hum se Ibn Abi Hazim ne in se un ke walid ne aur in se Sahl razi Allahu anhu ne ke hum Jumu'ah ke din khush hua karte thay. Main ne arz ki kis liye? Farmaya ke hamari ek budhia thien jo maqam e Buzha'ah jaya karti thien. Ibn Salama ne kaha ke Buzha'ah Madinah Munawwarah ka khajoor ka ek bagh tha. Phir woh wahan se chuqandar laya karti thien aur usay haandi mein daalti thien aur jau ke kuch dane pees kar (is mein milaati thien) jab hum Jumu'ah ki namaz parh kar wapas hote to unhein salam karne aate aur woh yeh chuqandar ki jadh mein aata mili hui dawat hamare samne rakhti thien hum is wajah se Jumu'ah ke din khush hua karte thay aur qailula ya dopehar ka khana hum Jumu'ah ke baad karte thay.

Hum se Muhammad bin Kaseer ne bayan kiya, kaha hum se Sufyan Sawri ne bayan kiya, in se Abu Hazim ne aur in se Sahl bin Saad Saadi razi Allahu anhu ne bayan kiya ke hum khana aur qailula namaz e Jumu'ah ke baad kiya karte thay.