Hum se Abun Numan Muhammad bin Fadl ne byaan kiya , kaha ke hum se Abu Awanah Waddah Yashkuri ne Abdul Malik bin Umayr se byaan kiya , unhon ne Jabir bin Samurah se ke Saad bin Abi Waqqas razi Allahu anhu ne Umar razi Allahu anhu se kaha main un (Kufa walon) ko Nabi Karim salla Allahu alaihi wasallam ki tarah namaaz parhata tha . Zuhr aur Asr ki donon namazen , kisi qism ka nuqs un mein nahi chhorta tha . Pehli do rakatein lambi parhta aur doosri do rakatein halki . To Umar razi Allahu anhu ne farmaya ke mujh ko tum se umeed bhi yahi thi .

Hum se Musa bin Ismail ne byaan kiya , kaha ke hum se Abu Awanah Waddah Yashkuri ne byaan kiya , kaha ke hum se Abdul Malik bin Umayr ne Jabir bin Samurah razi Allahu anhu se byaan kiya , kaha ke ahl Kufa ne Saad bin Abi Waqqas razi Allahu anhu ki Umar Farooq razi Allahu anhu se shikayat ki . Is liye Umar razi Allahu anhu ne un ko mazool kar ke Ammar razi Allahu anhu ko Kufa ka haakim banaya , to Kufa walon ne Saad ke mutalliq yahan tak keh diya ke woh to achhi tarah namaaz bhi nahi parha sakte . Chunanchay Umar razi Allahu anhu ne un ko bula bheja . Aap ne un se poocha ke aye Abu Ishaq! un Kufa walon ka khayal hai ke tum achhi tarah namaaz nahi parha sakte ho . Is par Aap ne jawab diya ke Allah ki qasam! main to unhein Nabi Karim salla Allahu alaihi wasallam hi ki tarah namaaz parhata tha , is mein kotahi nahi karta Isha ki namaaz parhata to us ki do pehli rakaton mein (qiraat) lambi karta aur doosri do rakatein halki parhata . Umar razi Allahu anhu ne farmaya ke aye Abu Ishaq! mujh ko tum se umeed bhi yahi thi . Phir Aap ne Saad razi Allahu anhu ke saath ek ya kayi aadmiyon ko Kufa bheja . Qasid ne har har masjid mein ja kar un ke mutalliq poocha . Sab ne Aap ki tareef ki lekin jab masjid Bani Abs mein gaye . To ek shakhs jis ka naam Usamah bin Qatadah aur kuniyat Abu Saadah thi khara hua . Us ne kaha ke jab Aap ne Allah ka wasta de kar poocha hai to (suniye ke) Saad na fauj ke saath khud jihad karte thay , na maal ghaneemat ki taqseem sahi karte thay aur na faisle mein adl o insaaf karte thay . Saad razi Allahu anhu ne (yeh sun kar) farmaya ke Allah ki qasam main (tumhari is baat par) teen duayen karta hoon . Aye Allah! agar tera yeh banda jhoota hai aur sirf riya o numood ke liye khara hua hai to us ki umar daraaz kar aur usay khoob mohtaaj bana aur usay fitnon mein mubtala kar . Us ke baad (woh shakhs is darja badhaal hua ke) jab us se poocha jata to kehta ke ek boodha aur pareshan haal hoon mujhe Saad razi Allahu anhu ki baddua lag gayi . Abdul Malik ne byaan kiya ke main ne usay dekha us ki bhonwein barhapa ki wajah se aankhon par aa gayi thi . Lekin ab bhi raaston mein woh larkiyon ko chherhta .

Hum se Aadam bin Abi Iyaas ne byaan kiya , unhon ne kaha ke hum se Shubah ne byaan kiya , kaha ke hum se Siyar bin Salamah ne byaan kiya , unhon ne byaan kiya ke main apne baap ke saath Abu Barzah Aslami Sahabi razi Allahu anhu ke paas gaya . Hum ne Aap se namaaz ke waqton ke mutalliq poocha to unhon ne kaha ke Nabi Karim salla Allahu alaihi wasallam Zuhr ki namaaz sooraj dhalne par parhte thay . Asr jab parhte to Madinah ke intehai kinaare tak ek shakhs chala jata . Lekin sooraj ab bhi baqi rehta . Maghrib ke mutalliq jo kuch Aap ne kaha woh mujhe yaad nahi raha aur Isha ke liye tehayi raat tak der karne mein koi haraj mehsoos nahi karte thay aur Aap is se pehle sone ko aur is ke baad baat cheet karne ko naapasand karte thay . Jab namaaz subah se farigh hote to har shakhs apne qareeb baithe huay ko pehchaan sakta tha . Aap donon rakaton mein ya ek mein saath se le kar sau tak aayatein parhte .