Hum se Qubaysah ne bayan kiya , kaha hamase Sufyan ne bayan kiya , in se Mansoor ne , in se in ki walda ne aur in se Aisha razi Allahu anha ne bayan kiya ke Nabi kareem salla Allahu alaihi wasallam is waqt bhi Quran parhte thay jab Aap ka sar mubarak meri goad mein hota aur main halat e haizh mein hoti .

Hum se Abu Nu’aim Fazl bin Dukain ne bayan kiya, unhon ne Zuhair se suna, unhon ne Mansoor bin Safiyyah se ke un ki maa ne un se bayan kiya ke Aisha Radhiallahu Anha ne un se bayan kiya ke Nabi-e-Kareem Sallallahu Alaihi Wasallam meri god mein sar rakh kar Quran-e-Majeed padhte, halaanki main us waqt haiz waali hoti thi.

Hum se Musaddad bin Musarhad ne bayan kiya, kaha hum se Yahya bin Saeed Qattan ne bayan kiya Saif Ibn Abi Sulaiman se, unhon ne kaha main ne Mujahid se suna, unhon ne kaha ke Ibn Umar Razi Allah Anhuma ki khidmat mein ek aadmi aaya aur kehne laga, Ae lo yeh Rasool Allah Sallallahu Alaihi Wasallam aan pahunche aur Aap Kaaba ke andar dakhil ho gaye. Ibn Umar Razi Allah Anhuma ne kaha ke main jab aaya to Nabi Kareem Sallallahu Alaihi Wasallam Kaaba se nikal chuke thay, main ne dekha ke Bilal donon darwazon ke samne khade hain. Main ne Bilal se poocha ke kya Nabi Kareem Sallallahu Alaihi Wasallam ne Kaaba ke andar namaz padhi hai? Unhon ne kaha ke haan! Do rakat in do sutonon ke darmiyan padhi thin, jo Kaaba mein dakhil hote waqt bayein taraf waqe hain. Phir jab bahar tashreef laye to Kaaba ke samne do rakat namaz ada farmayi.