Hum se Ali bin Abdullah Madini ne bayan kiya , kaha hum se Hatim bin Wardan ne bayan kiya , kaha hum se Ayub ne bayan kiya , in se Ikrimah ne aur in se Ibn Abbas raziAllahu anhuma ne bayan kiya ke tum Ahl e Kitab se in ki kitabon ke masail ke baare mein kyunkar sawal karte ho , tumhare paas khud Allah kikitab maujood hai jo zamana ke aitbar se bhi tum se sab se zyada qareeb hai , tum usay parhte ho , woh khalis hai is mein koi milawat nahi .

Hum se Ismail Bin Khalil ne bayan kiya, kaha hum ko Ali Bin Mushir ne khabar di, kaha hum ko Yahya Bin Saeed ne khabar di, kaha hum ko Abdullah Bin Rabia Bin Aamir ne khabar di, kaha ke mein ne Aisha (Radi Allahu Anha) se suna, aap bayan karti thiin ke Nabi Kareem (Sallallahu Alaihi Wasallam) ne (ek raat) bedari mein guzari, Madinah pahunchne ke baad Aap (Sallallahu Alaihi Wasallam) ne farmaya "Kash! Mere ashab mein se koi naik mard aisa hota jo raat bhar hamara pahra deta!" Abhi yahi batein ho rahi thiin ke hum ne hathiyar ki jhankaar suni. Aap (Sallallahu Alaihi Wasallam) ne daryaft farmaya "Ye kaun sahab hain?" (Aane wale ne) kaha mein hoon Saad Bin Abi Waqas, aap ka pahra dene ke liye hazir hua hoon. Phir Nabi Kareem (Sallallahu Alaihi Wasallam) khush hue. Un ke liye dua farmai aur aap so gaye
.