`Hum se Muhammad bin Khalid ne bayan kiya, unhon ne kaha hum se Ubaidullah bin Musa ne bayan kiya, un se Israil ne, un se Mansoor ne, un se Ibrahim ne, un se Ubaida ne aur un se Abdullah bin Masood Radi Allahu Anhu ne bayan kiya ke Rasul Allah صلی اللہ علیہ وسلم ne farmaya ”Jannat mein sab se baad mein dakhil hone wala aur dozakh se sab se baad mein nikalne wala wo shakhs ho ga jo ghasat kar nikle ga, is se is ka Rabb kahe ga jannat mein dakhil ho ja, wo kahe ga mere Rabb! jannat to bilkul bhari hui hai, phir Allah Ta'ala farmaye ga tere liye duniya ke das guna hai.“

Hum se Usman bin Abi Shaybah ne bayan kiya , kaha hum se Jareer bin Abd-ul-Hameed ne bayan kiya , in se Mansoor ne , in se Ibrahim Nakhai ne , in se Ubaidah Salmaani ne aur in se Abdullah bin Masood razi Allahu anhu ne bayan kiya ke Nabi Karim salla Allahu alaihi wasallam ne farmaya ke main khoob jaanta hoon ke ahal e jahannum mein se kaun sab se aakhir mein wahan se nikle ga aur ahal e jannat mein kaun sab se aakhir mein is mein dakhil ho ga . Ek shakhs jahannum se ghutnon ke bal ghisat-te huay nikle ga aur Allah Ta'ala is se kahe ga ke jao aur jannat mein dakhil ho jao , woh jannat ke paas aaye ga lekin usay aisa maloom ho ga ke jannat bhari hui hai . Chunanche woh wapas aaye ga aur arz kare ga: Ae mere Rabb! Main ne jannat ko bhara hua paya , Allah Ta'ala phir is se kahe ga ke jao aur jannat mein dakhil ho jao . Woh phir aaye ga lekin usay aisa maloom ho ga ke jannat bhari hui hai woh wapas laute ga aur arz kare ga ke Ae mere Rabb! Main ne jannat ko bhara hua paya . Allah Ta'ala farmaye ga jao aur jannat mein dakhil ho jao tumhein duniya aur is se das guna diya jata hai ya (Allah Ta'ala farmaye ga ke) tumhein duniya ke das guna diya jata hai . Woh shakhs kahe ga tu mera mazaq بناتا hai haalan-ke tu Shehanshah hai . Main ne dekha ke is baat par Rasool Allah salla Allahu alaihi wasallam hans diye aur Aap ke aage ke dandan e mubarak zhahir ho gaye aur kaha jata hai ke woh jannat ka sab se kam darje wala shakhs ho ga .