Hum se Qutaybah bin Saeed ne bayan kiya, kaha hum se Layth bin Saad ne bayan kiya, in se Aqeel ne, in se Zuhri ne, unhein Ubaidullah bin Abdullah bin Utbah ne khabar di, in se Abu Hurairah razi Allahu anhu ne bayan kiya ke jab Nabi Karim salla Allahu alaihi wasallam ki wafat hui aur Aap ke baad Abu Bakr razi Allahu anhu ko khaleefa banaya gaya aur Arab ke kai qabail phir gaye. Abu Bakr razi Allahu anhu ne in se larna chaha to Umar razi Allahu anhu ne Abu Bakr razi Allahu anhu se kaha ke Aap logon se kis buniyaad par jang karein ge jabke Nabi Karim salla Allahu alaihi wasallam ne yeh farmaya tha ke mujhe hukm diya gaya hai ke logon se is waqt tak jang karoon jab tak woh kalma Laa ilaaha illallaah ka iqrar na kar lein pas jo shakhs iqrar kar le ke Laa ilaaha illallaah to meri taraf se is ka maal aur is ki jaan mahfooz hai. Albatta kisi haq ke badal ho to woh aur baat hai (maslan kisi ka maal maar le ya kisi ka khoon kare) ab is ke baaqi aamal ka hisab Allah ke hawale hai lekin Abu Bakr razi Allahu anhu ne kaha ke wallah! main to is shakhs se jang karoon ga jis ne namaz aur zakat mein farq kiya hai kyunke zakat maal ka haq hai, wallah! agar woh mujhe ek rasi bhi dene se rukein ge jo woh Rasool Allah salla Allahu alaihi wasallam ko dete thay to main in se in ke inkar par bhi jang karoon ga. Umar razi Allahu anhu ne kaha phir jo main ne ghaur kiya to mujhe yaqeen ho gaya ke Allah Ta'ala ne Abu Bakr razi Allahu anhu ke dil mein larayi ki tajveez daali hai to main ne jaan liya ke woh haq par hain. Abu Bukayr aur Abdullah bin Salih ne Layth se «anaaqan» (ki bajaye «uqalan») kaha yani bakri ka bacha aur yahi zyada sahih hai.

Hum se Abul Yaman Hakam bin Nafi ne byaan kiya ‘ kaha ke humein Shuayb bin Abi Hamzah ne khabar di ‘ un se Zuhri ne kaha ke hum se Ubaidullah bin Abdullah bin Utbah bin Masood ne byaan kiya ke Abu Hurairah razi Allahu anhu ne byaan kiya ke jab Rasool Allah salla Allahu alaihi wasallam faut ho gaye aur Abu Bakr razi Allahu anhu khalifa hue to Arab ke kuch qaba'il kafir ho gaye (aur kuch ne zakat se inkar kar diya aur Abu Bakr razi Allahu anhu ne un se larna chaha) to Umar razi Allahu anhu ne farmaya ke Aap Rasool Allah salla Allahu alaihi wasallam ke is farmaan ki maujoodgi mein kyunkar jang kar sakte hain ”mujhe hukm hai logon se us waqt tak jang karoon jab tak ke woh «la ilaha illallahu» ki shahadat na dedein aur jo shakhs is ki shahadat dede to meri taraf se us ka maal o jaan mehfooz ho jaye ga . Siwa isi ke haq ke (yani qisas waghera ki soorton ke) aur is ka hisab Allah Ta'ala ke zimma ho ga .

Is par Abu Bakr Siddiq razi Allahu anhu ne jawab diya ke qasam Allah ki main har us shakhs se jang karoon ga jo zakat aur namaaz mein tafreeq kare ga . (Yani namaaz to parhe magar zakat ke liye inkar kar de) kyunke zakat maal ka haq hai . Allah ki qasam! Agar unhon ne zakat mein chaar mahine ki (bakri ke) bacche ko dene se bhi inkar kiya jisay woh Rasool Allah salla Allahu alaihi wasallam ko dete thay to main un se laroon ga . Umar razi Allahu anhu ne farmaya ke bakhuda yeh baat is ka natija thi ke Allah Ta'ala ne Abu Bakr razi Allahu anhu ka seena Islam ke liye khool diya tha aur baad mein , main bhi is natija par puhancha ke Abu Bakr razi Allahu anhu hi haq par thay .