`Hum se Masaddad ne bayan kiya, kaha hum se Yahya ne bayan kiya, un se Sufyan ne, un se Abdullah bin Dinar ne bayan kiya kaha ke mein is waqt Abdullah bin Umar Radi Allahu Anhuma ke paas maujood tha jab sab log Abdul Malik bin Marwan se bai'at ke liye jama ho gaye. Bayan kiya ke unhon ne Abdul Malik ko likha ke ”Mein sunne aur ita'at karne ka iqrar karta hoon Abdullah Abdul Malik Ameerul Momineen ke liye Allah ke deen aur is ke Rasul ki sunnat ke mutabiq jitni bhi mujh mein quwwat ho gi aur yeh ke mere larke bhi is ka iqrar karte hain.“

`Hum se Amr bin Ali ne bayan kiya, unhon ne kaha hum se Yahya ne bayan kiya, un se Sufyan ne, unhon ne mujh se Abdullah bin Dinar ne bayan kiya kaha ke jab logon ne Abdul Malik ki bai'at ki to Abdullah bin Umar Radi Allahu Anhuma ne ise likha ”Allah ke bande Abdul Malik Ameerul Momineen ke naam, mein iqrar karta hoon sunne aur ita'at karne ki. Allah ke bande Abdul Malik Ameerul Momineen ke liye Allah ke deen aur is ke Rasul ki sunnat ke mutabiq, jitni mujh mein taqat ho gi aur mere beton ne bhi is ka iqrar kiya.“

`Hum se Ismail bin Abi Uwais ne bayan kiya, kaha mujh se Imam Malik ne bayan kiya, un se Abdullah bin Dinar ne ke Abdullah bin Umar Radi Allahu Anhuma ne Abdul Malik bin Marwan ko khat likha ke wo is ki bai'at qabool karte hain aur yeh likha ke mein tera hukm sunoon ga aur manoon ga ba-shart-e-ke Allah ki shariat aur is ke Rasul ki sunnat ke muwafiq ho jahan tak mujh se mumkin ho ga.