`Hum se Bishr bin Khalid ne bayan kiya, kaha hum ko Jafar ne khabar di, unhein Shu'ba ne, unhein Suleiman ne ke mein ne Abu Wa'il se suna, unhon ne kaha ke Usama Radi Allahu Anhu se kaha gaya ke aap (Usman bin Affan Radi Allahu Anhu) se guftagu kyun nahi karte (ke aam musalmanon ki shikayat ka khayal rakkhein) unhon ne kaha ke mein ne (khalwat mein) un se guftagu ki hai lekin (fitna ke) darwaza ko khole bagair ke is tarah mein sab se pehle is darwaza ko kholne wala hoon ga mein aisa aadmi nahi hoon ke kisi shakhs se jab wo do aadmiyon par ameer bana diya jaye yeh kahoon ke tu sab se behtar hai. Jabke mein Rasul Allah صلی اللہ علیہ وسلم se sun chuka hoon. Aap صلی اللہ علیہ وسلم ne farmaya ke ek shakhs ko (qayamat ke din) laya jaye ga aur ise aag mein daal diya jaye ga. Phir wo is mein is tarah chakki peese ga jaise gadha peesta hai. Phir dozakh ke log is ke chaaron taraf jama ho jayein ge aur kahein ge, Ae falan! kya tum nekyon ka hukm karte aur buraiyoon se roka nahi karte thay? Wo shakhs kahe ga ke mein acchi baat ke liye kehta to zaroor tha lekin khud nahi karta tha aur buri baat se rokta bhi tha lekin khud karta tha.

Hum se Ali Bin Abdullah Madini ne bayan kiya, kaha hum se Sufyan Bin Uyaina ne bayan kiya, un se Aamash ne, un se Abu Wail ne bayan kiya ke Usama Bin Zaid (Radi Allahu Anhuma) se kisi ne kaha ke agar aap falan sahab (Usman Radi Allahu Anhu) ke yahan ja kar un se guftagu karo to accha hai (taake wo ye fasad dabane ki tadbeer karein) unhon ne kaha kya tum log ye samajhte ho ke mein un se tum ko suna kar (tumhare samne hi) baat karta hoon, mein tanhayi mein un se guftagu karta hoon is tarah par ke fasad ka darwaza nahi kholta, mein ye bhi nahi chahta ke sab se pehle mein fasad ka darwaza kholoon aur mein Aap (Sallallahu Alaihi Wasallam) se ek hadees sunne ke baad ye bhi nahi kehta ke jo shakhs mere upar sardar ho wo sab logon mein behtar hai. Logon ne pucha ke aap ne Nabi Kareem (Sallallahu Alaihi Wasallam) se jo hadees suni hai wo kya hai? Usama (Radi Allahu Anhu) ne kaha Nabi Kareem (Sallallahu Alaihi Wasallam) ko mein ne ye farmate suna tha ke Qiyamat ke din ek shakhs ko laya jaye ga aur jahannum mein daal diya jaye ga. Aag mein is ki aantain bahar nikal aayeingi aur wo shakhs is tarah chakkar lagane lagega jaise gadha apni chakki par gardish kiya karta hai. Jahannum mein dale jane wale is ke qareeb aa kar jama ho jayenge aur is se kaheinge, Ae falan! Aaj ye tumhari kya halat hai? Kya tum humein acche kaam karne ke liye nahi kehte thay, aur kya tum bure kaamon se humein mana nahi kiya karte thay? Wo shakhs kahega ji haan, mein tumhein to acche kaamon ka hukm deta tha lekin khud nahi karta tha. Bure kaamon se tumhein mana bhi karta tha, lekin mein ise khud kiya karta tha. Is hadees ko Ghundar ne bhi Shuba se, unhon ne Aamash se riwayat kiya hai
.