Hum se Muhammad bin Abdullah al-Ansari ne bayan kiya , kaha hum se hamare walid ne bayan kiya , kaha hum se Sumama bin Abdullah bin Anas ne bayan kiya , aur in se Anas bin Malik razi Allahu anhu ne bayan kiya ke Abu Bakr razi Allahu anhu ne unhein (Zakat) ka hukm-nama likh kar bheija jo Rasool Allah salla Allahu alaihi wasallam ne farz qarar diya tha ke mutafar-riq sadqa ko ek jagah jama na kiya jaye aur na mujtame sadqa ko mutafar-riq kiya jaye Zakat ke khauf se .

Hum se Usman Bin Abi Shaibah ne bayan kiya, unhon ne kaha ke hum se Hushaime ne bayan kiya, unhein Ubaidullah Bin Abi Bakr Bin Anas aur Humaid Taweel ne khabar di, unhon ne Anas Bin Malik (Radi Allahu Anhu) se suna ke Rasul Allah (Sallallahu Alaihi Wasallam) ne farmaya, apne bhai ki madad karo wo zalim ho ya mazloom
.

Hum se Musaddad ne bayan kiya, kaha hum se Mutamir ne bayan kiya, un se Humaid ne aur un se Anas (Radi Allahu Anhu) ne ke Rasul Allah (Sallallahu Alaihi Wasallam) ne farmaya, apne bhai ki madad karo khwah wo zalim ho ya mazloom. Sahaba ne arz kiya, Ya Rasul Allah! hum mazloom ki to madad kar sakte hain. Lekin zalim ki madad kis tarah karein ? Aap (Sallallahu Alaihi Wasallam) ne farmaya ke zulm se is ka hath pakar lo (yahi is ki madad hai)
.