Zuhayr aur Wahb bin Usman ne Musa bin Uqba se byaan kiya , unhon ne Nafi se , unhon ne Abdullah bin Umar razi Allahu anhuma se ke Nabi Karim salla Allahu alaihi wasallam ne farmaya ke agar tum mein se koi khana kha raha ho to jaldi na kare , balkay poori tarah kha le go (agarche) namaaz khari kyun na ho gayi ho . Abu Abdullah (Imam Bukhari rahimahullah) ne kaha aur mujh se Ibrahim bin al-Munzir ne Wahb bin Usman se yeh hadees byaan ki aur Wahb Madani hain .

Hum se Musaddad bin Musarhad ne byaan kiya , kaha ke hum se Yahya bin Saeed Qattan ne Hisham bin Urwah se byaan kiya , kaha ke mujh se mere baap ne byaan kiya , unhon ne Aishah razi Allahu anha se suna , unhon ne Nabi Karim salla Allahu alaihi wasallam se ke Aap salla Allahu alaihi wasallam ne farmaya ke agar shaam ka khana saamne rakha jaye aur idhar namaaz ke liye takbeer bhi hone lage to pehle khana kha lo .

Hum se Yahya bin Bukayr ne byaan kiya , unhon ne kaha ke hum se Layth bin Saad ne byaan kiya , unhon ne Aqeel se , unhon ne Ibn Shihab se byaan kiya , unhon ne Anas bin Malik razi Allahu anhu se ke Rasool Allah salla Allahu alaihi wasallam ne farmaya ke jab shaam ka khana haazir kiya jaye to Maghrib ki namaaz se pehle khana kha lo aur khane mein be mazah bhi na hona chahiye aur apna khana chhor kar namaaz mein jaldi mat karo .

Aur Ayub se riwayat hai , in se Nafi ne ke Ibn Umar razi Allahu anhuma ne ek martaba raat ka khana khaya aur is waqt Aap imam ki qirat sun rahe thay .

Hum se Muhammad bin Yusuf ne bayan kiya , kaha hum se Sufyan ne bayan kiya , in se Hisham bin Urwah ne , in se un ke walid ne aur in se Aisha razi Allahu anha ne ke Nabi Karim salla Allahu alaihi wasallam ne farmaya ke jab namaz khari ho chuke aur raat ka khana bhi samne ho to khana khao . Wuhaib aur Yahya bin Saeed ne bayan kiya , in se Hisham ne ke jab raat ka khana rakkha ja chuke .