Hum se Abu al-Yaman ne bayan kiya , kaha hum ko Shuayb ne khabar di , unhein Zuhri ne aur Layth ne bayan kiya , kaha unhon ne ke mujh se Yunus ne bayan kiya , in se Ibn Shihab ne bayan kiya , unhein Jafar bin Amr bin Umayyah razi Allahu anhu ne khabar di , unhein un ke walid Amr bin Umayyah ne khabar di ke unhon ne dekha ke Rasool Allah salla Allahu alaihi wasallam apne hath se bakri ke shaane ka gosht kaat kaat kar kha rahe thay , phir Aap ko namaz ke liye bulaya gaya to Aap gosht aur chhurri jis se Aap kaat rahe thay , chhor kar khare ho gaye aur namaz parhayi aur is namaz ke liye naya wuzu nahi kiya .

Hum se Mualla bin Asad ne bayan kiya , unhon ne kaha hum se Wuhaib ne bayan kiya , in se Ayub ne , in se Abu Qulabah ne aur in se Anas bin Malik razi Allahu anhu ne bayan kiya ke Nabi Karim salla Allahu alaihi wasallam ne farmaya ke jab raat ka khana samne rakh diya gaya ho aur namaz bhi khari ho gayi ho to pehle khana khao . Aur Ayub se riwayat hai , in se Nafi ne , in se Ibn Umar razi Allahu anhuma ne aur in se Nabi Karim salla Allahu alaihi wasallam ne isi ke mutabiq .

Aur Ayub se riwayat hai , in se Nafi ne ke Ibn Umar razi Allahu anhuma ne ek martaba raat ka khana khaya aur is waqt Aap imam ki qirat sun rahe thay .

Hum se Muhammad bin Yusuf ne bayan kiya , kaha hum se Sufyan ne bayan kiya , in se Hisham bin Urwah ne , in se un ke walid ne aur in se Aisha razi Allahu anha ne ke Nabi Karim salla Allahu alaihi wasallam ne farmaya ke jab namaz khari ho chuke aur raat ka khana bhi samne ho to khana khao . Wuhaib aur Yahya bin Saeed ne bayan kiya , in se Hisham ne ke jab raat ka khana rakkha ja chuke .