Hum se Abdan ne bayan kiya , kaha hum ko Abdullah bin Mubarak ne khabar di , kaha hum ko Yunus bin Yazid Aili ne khabar di , unhein Ibn Shihab ne , kaha mujh se Abu Salamah bin Abd-ur-Rahman ne bayan kiya aur in se Abu Hurairah razi Allahu anhu ne ke Nabi Karim salla Allahu alaihi wasallam ne farmaya ”main momino ka khud in se zyada haqdar hoon . Pas in mein se jo koi qarz-daar mare ga aur adayigi ke liye kuch na chhorre ga to hum par is ki adayigi ki zimma-dari hai aur jis ne koi maal chhorra ho ga woh is ke warison ka hissa hai .“

Hum se Yahya Bin Bukair ne bayan kiya, kaha ke hum se Laith Bin Saad ne bayan kiya, un se Aqeel ne ke Ibn Shihab ne bayan kiya, aur unhein Urwah Bin Zubair ne khabar di ke Nabi Kareem (Sallallahu Alaihi Wasallam) ki zauja mutahira Aisha (Radi Allahu Anha) ne bayan kiya ke mein ne jab se hosh sambhala to apne walidain ko isi deen-e-Islam ka pairokar paya. Aur Abu Salih Sulaiman ne bayan kiya ke mujh se Abdullah Bin Mubarak ne bayan kiya. Un se Yunus ne, aur un se Zuhri ne bayan kiya ke mujhe Urwah Bin Zubair ne khabar di aur un se Aisha (Radi Allahu Anha) ne bayan kiya ke mein ne jab hosh sambhala to apne walidain ko deen-e-Islam ka pairokar paya. Koi din aisa nahi guzarta tha jab Rasul Allah (Sallallahu Alaihi Wasallam) humare yahan subah-o-shaam donon waqt tashreef na late hon. Phir jab Musalmanon ko bahut ziyada takleef hone lagi to Abu Bakr (Radi Allahu Anhu) ne bhi Hijrat-e-Habshah ka irada kiya. Jab Aap Bir-ul-Ghumad pahunche to wahan aap ki mulaqat Qaara ke sardar Malik Ibn-ud-Daghna se hui. Us ne poocha, Abu Bakr! kahan ka irada hai ? Abu Bakr (Radi Allahu Anhu) ne is ka jawab ye diya ke meri qaum ne mujhe nikal diya hai. Aur ab to yahi irada hai ke Allah ki zameen mein sair karoon aur apne Rabb ki ibadat karta rahoon. Is par Malik Bin-ud-Daghna ne kaha ke aap jaisa insan (apne watan se) nahi nikal sakta aur na ise nikala ja sakta hai. Ke aap to muhtajon ke liye kamate hain, sila-rehmi karte hain. Majbooron ka bojh apne sar lete hain. Mehmaan nawazi karte hain. Aur hadison mein haq baat ki madad karte hain. Aap ko mein aman deta hoon. Aap chaliye aur apne hi shehar mein apne Rabb ki ibadat kijiye. Chunanche Ibn-ud-Daghna apne sath Abu Bakr (Radi Allahu Anhu) ko lay kar aya aur Makkah pahunch kar kuffar-e-Quraish ke tamam ashraf ke paas gaya aur un se kaha ke Abu Bakr jaisa naik aadmi (apne watan se) nahi nikal sakta. Aur na ise nikala ja sakta hai. Kya tum aise shakhs ko bhi nikal doge jo muhtajon ke liye kamata hai aur jo sila-rehmi karta hai aur jo majbooron aur kamzoron ka bojh apne sar par leta hai. Aur jo mehmaan nawazi karta hai aur jo hadison mein haq baat ki madad karta hai. Chunanche Quraish ne Ibn-ud-Daghna ki aman ko maan liya. Aur Abu Bakr (Radi Allahu Anhu) ko aman day di. Phir Ibn-ud-Daghna se kaha ke Abu Bakr ko is ki takeed kar dena ke apne Rabb ki ibadat apne ghar hi mein kar liya karein. Wahan jis tarah chahein namaz parhein, aur Quran ki tilawat karein, lekin humein in cheezon ki wajah se koi eeza na dein aur na is ka izhar karein, kyunke humein is ka dar hai ke kahin humare bacche aur humari auratein fitnah mein na par jayein. Ibn-ud-Daghna ne ye baatein jab Abu Bakr (Radi Allahu Anhu) ko sunayein to aap apne Rabb ki ibadat ghar ke andar hi karne lage. Na namaz mein kisi qism ka izhar karte aur na apne ghar ke siwa kisi doosri jagah tilawat karte. Phir Abu Bakr Siddiq (Radi Allahu Anhu) ne kuch dinon baad aisa kiya ke aap ne apne ghar ke samne namaz ke liye ek jagah bana li. Ab aap zahir ho kar wahan namaz parhne lage. Aur isi par tilawat-e-Quran karne lage. Pas phir kya tha mushrikeen ke bacchon aur un ki auraton ka majma lagne laga. Sab hairat aur tajjub ki nigahon se unhein dekhte. Abu Bakr (Radi Allahu Anhu) bade hi rone wale thay. Jab Quran parhne lagte to aansuon par qabu na rehta. Is surat-e-haal se akabir mushrikeen-e-Quraish ghabraye aur sab ne Ibn-ud-Daghna ko bula bheja. Ibn-ud-Daghna un ke paas aya to un sab ne kaha ke hum ne to Abu Bakr ko is liye aman di thi ke wo apne Rabb ki ibadat ghar ke andar hi karenge, lekin wo to ziyadati par utar aaye aur ghar ke samne namaz parhne ki ek jagah bana li hai. Namaz bhi sab ke samne hi parhne lage hain aur tilawat bhi sab ke samne karne lage hain. Dar humein apni aulad aur auraton ka hai ke kahin wo fitnah mein na par jayein. Is liye ab tum un ke paas jao. Agar wo is par tayyar ho jayein ke apne Rabb ki ibadat sirf apne ghar ke andar hi karein, phir to koi baat nahi, lekin agar unhein is se inkar ho to tum un se kaho ke wo tumhari aman tumhe wapas kar dein. Kyunke humein ye pasand nahi ke tumhari aman ko hum tor dein. Lekin is tarah unhein izhar aur elan bhi karne nahi denge. Aisha (Radi Allahu Anha) ne bayan kiya ke is ke baad Ibn-ud-Daghna Abu Bakr Siddiq (Radi Allahu Anhu) ke paas aya aur kaha ke aap ko maloom hai wo shart jis par mera aap se ahad hua tha. Ab ya to aap is shart ki hudood mein rahein ya meri aman mujhe wapas kar dein. Kyunke ye mein pasand nahi karta ke Arab ke kanon tak ye baat pahunche ke mein ne ek shakhs ko aman di thi lekin wo aman tor di gayi. Abu Bakr (Radi Allahu Anhu) ne farmaya ke mein tumhari aman tumhe wapas karta hoon mein to bas apne Allah ki aman se khush hoon. Rasul Allah (Sallallahu Alaihi Wasallam) in dinon Makkah hi mein maujood thay. Aap (Sallallahu Alaihi Wasallam) ne farmaya ke mujhe tumhari hijrat ka maqam dikhlaya gaya hai. Mein ne ek khari namkeen zameen dekhi hai. Jahan khajoor ke baghat hain aur wo pathrele maidanon ke darmiyan mein hai. Jab Rasul Allah (Sallallahu Alaihi Wasallam) ne is ka izhar farma diya to jin Musalmanon ne hijrat karni chahi wo pehle hi Madinah hijrat kar ke chale gaye. Balkay baaz wo Sahaba bhi jo Habshah hijrat kar ke chale gaye thay wo bhi Madinah aa gaye. Abu Bakr Siddiq (Radi Allahu Anhu) bhi hijrat ki tayyariyan karne lage to Rasul Allah (Sallallahu Alaihi Wasallam) ne un se farmaya, jaldi na karo, umeed hai ke mujhe bhi jald hi ijazat mil jaye gi. Abu Bakr (Radi Allahu Anhu) ne poocha mere maan baap aap par fida hon! kya aap ko is ki umeed hai ? Aap (Sallallahu Alaihi Wasallam) ne farmaya ke han zaroor! chunanche Abu Bakr Siddiq (Radi Allahu Anhu) Rasul Allah (Sallallahu Alaihi Wasallam) ka intizar karne lage, taake aap (Sallallahu Alaihi Wasallam) ke sath hijrat karein. Un ke paas do oont thay, unhein chaar mahine tak wo babool ke patte khilate rahe
.

Hum se Yahya Bin Bukair ne bayan kiya, kaha ke hum se Laith ne bayan kiya, un se Aqeel ne, un se Ibn Shihab ne, un se Abu Salama ne aur un se Abu Hurairah (Radi Allahu Anhu) ne ke Rasul Allah (Sallallahu Alaihi Wasallam) ke paas jab kisi aisi mayyat ko laya jata jis par kisi ka qarz hota to aap (Sallallahu Alaihi Wasallam) farmate ke kya us ne apne qarz ke ada karne ke liye bhi kuch chhora hai ? Phir agar koi aap ko bata deta ke han itna maal hai jis se qarz ada ho sakta hai. To aap (Sallallahu Alaihi Wasallam) us ki namaz parhayate warna aap (Sallallahu Alaihi Wasallam) Musalmanon hi se farma dete ke apne saathi ki namaz parh lo. Phir jab Allah Ta'ala ne aap (Sallallahu Alaihi Wasallam) par fatah ke darwaze khol diye to aap (Sallallahu Alaihi Wasallam) ne farmaya ke mein Musalmanon ka khud un ki zaat se bhi ziyada mustahiq hoon. Is liye ab jo bhi Musalman wafat pa jaye aur wo maqrooz raha ho to is ka qarz ada karna mere zimme hai aur jo Musalman maal chhor jaye wo is ke warison ka haq hai
.

Hum se Abul Waleed ne bayan kiya, un se Shuba ne bayan kiya, un se Adi Bin Sabit ne, un se Abu Hazim ne aur un se Abu Hurairah (Radi Allahu Anhu) ne ke Nabi Kareem (Sallallahu Alaihi Wasallam) ne farmaya jo shakhs (apne intiqaal ke waqt) maal chhore to wo is ke warison ka hai aur jo qarz chhore to wo humare zimme hai
.

Hum se Abdullah Bin Muhammad ne bayan kiya, unhon ne kaha ke hum se Abu Aamir ne bayan kiya, un se Fulaih ne bayan kiya, un se Hilal Bin Ali ne, un se Abdur Rahman Bin Abi Umrah ne aur un se Abu Hurairah (Radi Allahu Anhu) ne bayan kiya ke Nabi Kareem (Sallallahu Alaihi Wasallam) ne farmaya, har momin ka mein duniya-o-aakhirat mein sab se ziyada qareeb hoon. Agar tum chaho to ye ayat parh lo «النبي أولى بالمؤمنين من أنفسهم» ”Nabi ((Sallallahu Alaihi Wasallam)) mominon se in ki jaan se bhi ziyada qareeb hain.“ Is liye jo momin bhi intiqaal kar jaye aur maal chhor jaye to chahiye ke wurasa is ke malik hon. Wo jo bhi hon aur jo shakhs qarz chhor jaye ya aulad chhor jaye to wo mere paas aa jayein ke in ka wali mein hoon
.

Hum se Ibrahim bin al-Munzhir ne byaan kiya , kaha hum se Muhammad bin Falih ne , kaha mujh se mere walid ne , un se Hilal bin Ali ne aur un se Abdur Rahman bin Abu Amrah ne aur un se Abu Hurairah razi Allahu anhu ne ke Rasool Allah salla Allahu alaihi wasallam ne farmaya ke koi momin aisa nahi ke main khud is ke nafs se bhi zyada is se aur aakhirat mein talluq na rakhta hoon , agar tumhara jee chahe to yeh aayat parh lo «annabiyyu aula bil-momineena min anfusihim» ke ”Nabi momineen ke saath khud un ke nafs se bhi zyada talluq rakhte hai .“ Pas jo momin bhi (marne ke baad) tarka maal o asbab chhore aur koi un ka wali waris nahi hai is ke azeez o aqarib jo bhi hon , is ke maal ke waris hon ge , lekin agar kisi momin ne koi qarz chhora hai ya aulad chhori hai to woh mere paas aa jayein un ka zimma-dar main hoon .

Hum se Yahya bin Bukayr ne byaan kiya , kaha hum se Layth bin Saad ne , in se Aqeel ne , in se Ibn Shihab ne , in se Abu Salamah ne aur in se Abu Hurairah razi Allahu anhu ne byaan kiya ke Rasool Allah salla Allahu alaihi wasallam ke paas jab kisi aise shakhs ka janaza laya jata jis par qarz hota to Aap salla Allahu alaihi wasallam daryaft farmate ke marne wale ne qarz ki adayigi ke liye tarka chhora hai ya nahi . Agar kaha jata ke itna chhora hai jis se in ka qarz ada ho sakta hai to Aap salla Allahu alaihi wasallam in ki namaz parhte , warna Musalmanon se kehte ke apne saathi par tum hi namaz parh lo . Phir jab Allah Ta'ala ne Nabi Karim salla Allahu alaihi wasallam par futoohaat ke darwaze khol diye to farmaya ke main Musalmanon se in ki khud apni zaat se bhi zyada qareeb hoon is liye in Musalmanon mein jo koi wafat paye aur qarz chhore to is ki adayigi ki zimma-dari meri hai aur jo koi maal chhore woh is ke wurasa ka hai .

Hum se Mahmood ne bayan kiya , unhon ne kaha hum ko Israeel ne khabar di , unhein Abu Haseen ne , unhein Abu Salih ne aur in se Abu Hurairah razi Allahu anhu ne bayan kiya ke Rasool Allah salla Allahu alaihi wasallam ne farmaya ”main Musalmanon ka khud in ki zaat se bhi zyada wali hoon . Pas jo shakhs mar jaye aur maal chhorr jaye to woh is ke warison ka haq hai aur jis ne biwi bache chhorre hon ya qarz ho , to main in ka wali hoon , in ke liye mujh se maanga jaye .“

Hum se Abu al-Waleed ne bayan kiya , kaha hum se Shubah ne bayan kiya , in se Adi ne , in se Abu Hazim ne aur in se Abu Hurairah razi Allahu anhu ne ke Nabi Karim salla Allahu alaihi wasallam ne farmaya ”jis ne maal chhorra (apni maut ke baad) woh is ke warison ka hai aur jis ne qarz chhorra hai woh hamare zimma hai .“