Hum se Ubayd bin Ismail ne byaan kiya Abu Usama Hammad bin Usama se , unhon ne Ubaydullah se , unhon ne Nafi se , unhon ne Abdullah bin Umar razi Allahu anhuma se ke Nabi Karim salla Allahu alaihi wasallam ne farmaya ke jab tum mein se kisi ka shaam ka khana tayyar ho chuka ho aur takbeer bhi kahi ja chuki ho to pehle khana kha lo aur namaaz ke liye jaldi na karo , khane se faraghat kar lo . Aur Abdullah bin Umar razi Allahu anhuma ke liye khana rakh diya jata , idhar iqamat bhi ho jati lekin Aap khane se farigh hone tak namaaz mein shareek nahi hote thay . Aap imam ki qiraat barabar sunte rehte thay .

Zuhayr aur Wahb bin Usman ne Musa bin Uqba se byaan kiya , unhon ne Nafi se , unhon ne Abdullah bin Umar razi Allahu anhuma se ke Nabi Karim salla Allahu alaihi wasallam ne farmaya ke agar tum mein se koi khana kha raha ho to jaldi na kare , balkay poori tarah kha le go (agarche) namaaz khari kyun na ho gayi ho . Abu Abdullah (Imam Bukhari rahimahullah) ne kaha aur mujh se Ibrahim bin al-Munzir ne Wahb bin Usman se yeh hadees byaan ki aur Wahb Madani hain .

Aur Ayub se riwayat hai , in se Nafi ne ke Ibn Umar razi Allahu anhuma ne ek martaba raat ka khana khaya aur is waqt Aap imam ki qirat sun rahe thay .