Hum se Abu al-Yaman ne bayan kiya, kaha hum ko Shuayb ne khabar di, kaha hamase Abu al-Zinad ne bayan kiya, in se Abd-ul-Rahman Aaraj ne aur in se Abu Hurairah razi Allahu anhu ne ke Rasool Allah salla Allahu alaihi wasallam ne farmaya ”Sulayman alaihissalam ne ek din kaha ke aaj main raat mein apni nawway biwiyon ke paas jaoon ga aur har ek ke yahan ek ghore sawar bacha paida ho ga jo Allah ke raste mein jihad kare ga. Is par in ke saathi ne kaha ke In sha Allah. Lekin Sulayman alaihissalam ne In sha Allah nahi kaha. Chunanche woh apni tamam biwiyon ke paas gaye lekin ek aurat ke siwa kisi ko hamal nahi hua aur is se bhi naqis bacha paida hua aur is zaat ki qasam jis ke hath mein Muhammad ki jaan hai! Agar unhon ne In sha Allah keh diya hota to (tamam biwiyon ke yahan bache paida hote) aur sab ghoron par sawar ho kar Allah ke raste mein jihad karne wale hote.“

Hum se Umar bin Hafs bin Ghiyath ne byaan kiya ‘ kaha ke hum se mere baap ne byaan kiya ‘ kaha ke hum se Aamash ne Maroor bin Suwaid se byaan kiya ‘ un se Abu Zar razi Allahu anhu ne byaan kiya ke main Nabi Karim salla Allahu alaihi wasallam ke qareeb puhanch gaya tha aur Aap salla Allahu alaihi wasallam farma rahe thay . Is zaat ki qasam jis ke haath mein meri jaan hai ya (Aap salla Allahu alaihi wasallam ne qasam is tarah khayi) is zaat ki qasam jis ke siwa koi mabood nahi . Ya jin alfaaz ke saath bhi Aap ne qasam khayi ho (is takeed ke baad farmaya) koi bhi aisa shakhs jis ke paas oont gaaye ya bakri ho aur woh is ka haq ada na karta ho to Qayamat ke din usay laya jaye ga . Duniya se zyada bari aur moti taaza kar ke . Phir woh apne maalik ko apne khuroon se raunde gi aur seeng maare gi . Jab aakhri jaanwar us par se guzar jaye ga to pehla jaanwar phir lout kar aaye ga . (Aur usay apne seeng maare ga aur khuroon se raunde ga) is waqt tak (yeh silsila barabar qaim rahe ga) jab tak logon ka faisla nahi ho jata . Is hadees ko Bukair bin Abdullah ne Abu Salih se riwayat kiya hai ‘ unhon ne Abu Hurairah razi Allahu anhu se aur unhon Nabi Karim salla Allahu alaihi wasallam se . Baab apne rishtadaron ko zakat dena aur Nabi Karim salla Allahu alaihi wasallam ne (Zainab ke haq mein farmaya jo Abdullah bin Masood ki biwi thi) is ko do guna sawab mile ga ‘ naata jorne aur sadqe ka .

Hum se Khalid Bin Makhlad ne bayan kiya kaha hum se Mugheerah Bin Abdur Rahman ne bayan kiya un se Abu Az-Zinad ne un se Aaraj ne un se Abu Hurairah (Radi Allahu Anhu) ne bayan kiya ke Nabi Kareem (Sallallahu Alaihi Wasallam) ne farmaya "Sulaiman Bin Dawood (Alaihimas Salam) ne kaha ke aaj raat mein apni sattar biwiyon ke pas jaoon ga aur har biwi ek shehswaar janay gi jo Allah ke raste mein jihad kare ga. Un ke saathi ne kaha Insha Allah, lekin unhon ne nahi kaha. Chunancha kisi biwi ke yahan bhi baccha paida nahi hua sirf ek ke yahan hua aur is ki bhi ek jaanib bekar thi." Nabi Kareem (Sallallahu Alaihi Wasallam) ne farmaya ke agar Sulaiman (Alaihis Salam) Insha Allah keh lete (to sab ke yahan bacche paida hote) aur Allah ke raste mein jihad karte. Shuaib aur Ibn Abi Az-Zinad ne bajaye sattar ke) nawway kaha hai aur yehi bayan zyada sahih hai

Mujh se Mahmood bin Ghailan ne byaan kiya, kaha hum se Abdur Razzaq ne, kaha hum ko Mamar ne khabar di, unhein Abdullah bin Taoos ne, unhein un ke walid ne aur un se Abu Hurairah razi Allahu anhu ne byaan kiya ke Sulayman bin Dawood alayhis-salam ne farmaya ke aaj raat main apni sau biwiyon ke paas ho aaoon ga (aur is qurbat ke nateeja mein) har aurat ek larka jane gi to sau larke aise paida hon ge jo Allah ke raste mein jihad karein ge. Farishta ne in se kaha ke In sha Allah keh lijiye lekin unhon ne nahi kaha aur bhool gaye. Chunanche Aap tamam biwiyon ke paas gaye lekin ek ke siwa kisi ke bhi bacha paida na hua aur is ek ke yahan bhi aadha bacha paida hua. Nabi Karim salla Allahu alaihi wasallam ne farmaya ke agar In sha Allah keh lete to in ki murad bar aati aur in ki khwahish poori hone ki umeed zyada hoti.

Hum se Ali bin Abdullah Madini ne bayan kiya , kaha hum se Sufyan bin Uyaynah ne bayan kiya , in se Hisham bin Hujayr ne , in se Taoos ne , unhon ne Abu Hurairah razi Allahu anhu se suna , unhon ne bayan kiya ke Sulayman alaihissalam ne kaha tha ke aaj raat main apni nawway biwiyon ke paas jaoon ga aur har biwi ek bacha jane gi jo Allah ke raaste mein jihad karein ge . In ke saathi Sufyan yani farishte ne in se kaha . Aji In sha Allah to kaho lekin Aap bhool gaye aur phir tamam biwiyon ke paas gaye lekin ek biwi ke siwa jis ke yahan na-tamam bacha hua tha kisi biwi ke yahan bhi bacha nahi hua . Abu Hurairah razi Allahu anhu riwayat karte huay kehte thay ke agar unhon ne In sha Allah keh diya hota to in ki qasam bekar na jaati aur apni zaroorat ko pa laite aur ek martaba unhon ne bayan kiya ke Rasool Allah salla Allahu alaihi wasallam ne kaha ke agar unhon ne istis-na kar diya hota . Aur hamase Abu al-Zinad ne Aaraj se Abu Hurairah razi Allahu anhu ki hadees ki tarah bayan kiya .

Hum se Mualla bin Asad ne bayan kiya , unhon ne kaha hum se Wuhaib ne bayan kiya , in se Ayub ne , in se Muhammad ne bayan kiya aur in se Abu Hurairyah razi Allahu anhune bayan kiya ke Allah ke Nabi Sulayman alaihissalam ki saath biwiyaan thien to unhon ne kaha ke aaj raat main tamam biwiyon ke paas jaoon ga aur har biwi hamila hu gi aur phir aisa bacha jane gi jo sheh-sawar ho ga aur Allahke raaste mein lare ga . Chunanche woh apni tamam biwiyon ke paas gaye . Lekin sirf ek biwi ke yahan bacha paida hua aur woh bhi adhura . Nabi Karim salla Allahu alaihi wasallam ne farmaya ke agar Sulayman alaihissalam ne In sha Allah keh diya hota to phir har biwi hamila hoti aur sheh-sawar jan-ti jo Allahke raaste mein jihad karta .