Hum se Abu al-Nu-man ne bayan kiya , kaha hum se Hammad bin Zayd ne bayan kiya , in se Ayub Sakhtiyani ne , in se Nafi ne aur in se Abdullah bin Umar razi Allahu anhuma ne bayan kiya ke Rasool Allah salla Allahu alaihi wasallam ne farmaya ”jab tum mein se koi marta hai to subah o shaam (jab tak woh barzhakh mein hai) is ke rehne ki jagah usay har roz dikhayi jaati hai ya dozakh ho ya jannat aur kaha jata hai ke yeh tere rehne ki jagah hai yahan tak ke tu uthaya jaye (yani Qayamat ke din tak) .“

Hum se Ismail ne byaan kiya ‘ unhon ne kaha ke mujh se Imam Malik rahimahullah ne yeh hadees byaan ki ‘ unhon ne kaha ke hum se Nafi ne byaan kiya aur un se Abdullah bin Umar razi Allahu anhuma ne byaan kiya ke Rasool Allah salla Allahu alaihi wasallam ne farmaya ke jab tum mein se koi shakhs mar jata hai to is ka thikana ise subah o shaam dikhaya jata hai . Agar woh Jannati hai to Jannat walon mein aur jo Dozakhi hai to Dozakh walon mein . Phir kaha jata hai yeh tera thikana hai yahan tak ke Qayamat ke din Allah tujh ko uthaye ga .

Hum se Ahmad Bin Yunus ne bayan kiya, unhon ne kaha hum se Laith Bin Saad ne bayan kiya, unhon ne kaha ke hum se Nafi ne bayan kiya aur un se Abdullah Bin Umar (Radi Allahu Anhuma) ne bayan kiya, unhon ne kaha ke Rasul Allah (Sallallahu Alaihi Wasallam) ne farmaya "Jab koi shakhs marta hai to (rozana) subah-o-sham dono waqt is ka thikana (jahan wo aakhirat mein rahega) ise dikhlaya jata hai. Agar wo jannati hai to Jannat mein agar wo dozakhi hai to Dozakh mein."
.