Mujh se Ibrahim bin Hamza ne bayan kiya , kaha mujh se Ibn Abi Hazim ne bayan kiya , in se Yazid bin Abdullah ne , in se Muhammad bin Ibrahim ne , in se Esa bin Talha Taymi ne aur in se Abu Hurairah razi Allahu anhu ne , unhon ne Rasool Allah salla Allahu alaihi wasallam se suna , Aap salla Allahu alaihi wasallam ne farmaya ”banda ek baat zaban se nikalta hai aur is ke mutalliq sochta nahi (kitni kufr aur be-adbi ki baat hai) jis ki wajah se woh dozakh ke gar-rhe mein itni door gir parta hai jitna maghrib se mashriq door hai .“

Mujh se Abdullah bin Muneer ne bayan kiya , unhon ne Abu al-Nadr se suna , unhon ne kaha hum se Abd-ul-Rahman bin Abdullah yani Ibn Dinar ne bayan kiya , in se un ke walid ne , in se Abu Salih ne , in se Abu Hurairah razi Allahu anhu ne ke Nabi Karim salla Allahu alaihi wasallam ne farmaya ”banda Allah ki raza-mandi ke liye ek baat zaban se nikalta hai usay woh koi ahmiyat nahi deta magar isi ki wajah se Allah is ke darje buland kar deta hai aur ek doosra banda ek aisa kalma zaban se nikalta hai jo Allah ki narazgi ka bais hota hai usay woh koi ahmiyat nahi deta lekin is ki wajah se woh jahannum mein chala jata hai .“

Hum se Muhammad bin Abu Bakr ne bayan kiya, kaha hum se Umar bin Ali ne bayan kiya. (Doosri sanad Imam Bukhari rahmahullah ne kaha) aur mujh se Khaleefa bin Hay-yaat ne bayan kiya, in se Umar bin Ali ne, in se Abu Hazim Salama bin Dinar ne bayan kiya, in se Sahl bin Saad Saadi ne ke Nabi Karim salla Allahu alaihi wasallam ne farmaya ”jis ne mujhe apne donon paon ke darmiyan yani (sharmgah) ki aur apne donon jabron ke darmiyan (yani zaban) ki zhamanat de di to main usay jannat mein jaane ka bharosa dilata hoon.“