Hum se Abu al-Yaman ne bayan kiya , kaha hum ko Shuayb ne khabar di , in se Zuhri ne bayan kiya , kaha ke mujhe Ata bin Yazid Laysi ne khabar di aur unhein Abu Saeed razi Allahu anhu ne khabar di ke chand Ansari sahabah ne Rasool Allah salla Allahu alaihi wasallam se maanga aur jis ne bhi Nabi Karim salla Allahu alaihi wasallam se maanga Nabi Karim salla Allahu alaihi wasallam ne usay diya , yahan tak ke jo maal Aap ke paas tha woh khatm ho gaya . Jab sab kuch khatm ho gaya jo Nabi Karim salla Allahu alaihi wasallam ne apne donon hathon se diya tha to Aap salla Allahu alaihi wasallam ne farmaya ke jo bhi achhi cheez mere paas ho gi main usay tum se bacha ke nahi rakkhta hoon . Baat yeh hai ke jo tum mein (sawal se) bachta rahe ga Allah bhi usay ghaib se de ga aur jo shakhs dil par zor daal kar sabr kare ga Allah bhi usay sabr de ga aur jo be-parwa rehna ikhtiyar kare ga Allah bhi usay be-parwa kar de ga aur Allah ki koi neimat sabr se barh kar tum ko nahi mili .

Hum se Abdullah bin Yusuf ne byaan kiya ‘ kaha ke humein Imam Malik ne ‘ Ibn Shihab se khabar di ‘ unhein Ata bin Yazid Laythi ne aur unhein Abu Saeed Khudri razi Allahu anhu ne ke Ansar ke kuch logon ne Rasool Allah salla Allahu alaihi wasallam se sawal kiya to Aap salla Allahu alaihi wasallam ne unhein diya . Phir unhon ne sawal kiya aur Aap salla Allahu alaihi wasallam ne phir diya . Yahan tak ke jo maal Aap salla Allahu alaihi wasallam ke paas tha . Ab woh khatam ho gaya . Phir Aap salla Allahu alaihi wasallam ne farmaya ke agar mere paas jo maal o daulat ho to main isay bacha kar nahi rakhoon ga . Magar jo shakhs sawal karne se baccha hai to Allah Ta'ala bhi usay sawal karne se mehfooz hi rakhta hai . Aur jo shakhs be-niyazi bartata hai to Allah Ta'ala usay be-niyaz bana deta hai aur jo shakhs apne oopar zor daal kar bhi sabr karta hai to Allah Ta'ala bhi usay sabr o istiqlal de deta hai . Aur kisi ko bhi sabr se zyada behtar aur is se zyada be-payan khair nahi mili . (Sabr tamam nematon se barh kar hai) .

Hum se Qutaiba ne bayan kiya, unhon ne kaha hum se Ismail Bin Jafar ne bayan kiya, un se Muhammad Bin Harmala ne, un se Ibn Abbas (Radi Allahu Anhuma) ke ghulam Kuraib ne aur un se Usama Bin Zaid (Radi Allahu Anhuma) ne ke mein Arafat se Rasul Allah (Sallallahu Alaihi Wasallam) ki sawari par Aap (Sallallahu Alaihi Wasallam) ke peeche baitha hua tha. Muzdalifah ke qareeb bayein taraf jo ghati parti hai jab Nabi Kareem (Sallallahu Alaihi Wasallam) wahan pohanche to Aap (Sallallahu Alaihi Wasallam) ne ont ko bithaya phir peshab kiya aur tashreef laye to mein ne Aap (Sallallahu Alaihi Wasallam) par wazu ka pani dala. Aap (Sallallahu Alaihi Wasallam) ne halka sa wazu kiya. Mein ne kaha Ya Rasul Allah! Aur namaz? Aap (Sallallahu Alaihi Wasallam) ne farmaya ke ”Namaz tumhare aage hai.“ (Yani Muzdalifah mein parhi jaye gi) phir Aap (Sallallahu Alaihi Wasallam) sawar ho gaye jab Muzdalifah mein aaye to (Maghrib aur Isha ki) namaz (mila kar) parhi. Phir Muzdalifah ki subah (yani daswein tareekh) ko Rasul Allah (Sallallahu Alaihi Wasallam) ki sawari ke peeche Fazl Bin Abbas (Radi Allahu Anhu) sawar hue
.