Hum se Abdullah bin Zubayr Humaydi ne bayan kiya, kaha hum se Sufyan bin Uyaynah ne, kaha hum se Musa bin Uqbah ne bayan kiya, kaha ke main ne Umm Khalid bint Khalid bin Saeed razi Allahu anhuma se suna (Musa ne) bayan kiya ke main ne kisi se nahi suna ke in ki bayan ki hui hadees se mukhtalif kisi ne Nabi Karim salla Allahu alaihi wasallam se suna ho, unhon ne bayan kiya ke main ne Nabi Karim salla Allahu alaihi wasallam se suna ke Aap qabr ke azab se Allah ki panah maangte thay.

Hum se Mu'alla bin Asad ne byaan kiya ‘ kaha hum se Wuhaib ne byaan kiya ‘ un se Musa bin Uqbah ne byaan kiya . Kaha ke mujh se Khalid bin Saeed bin Aas ki saahibzadi (Umm Khalid) ne byaan kiya ‘ unhon ne Nabi Karim salla Allahu alaihi wasallam ko qabr ke azab se panah mangte suna .

Hum se Usman bin Abi Shaybah ne bayan kiya, kaha hum se Jareer bin Abd-ul-Hameed ne bayan kiya, in se Abu Wail ne, in se Masrooq ne aur in se Aisha razi Allahu anha ne bayan kiya ke Madinah ke Yahudiyon ki do burhi auratein mere paas aayin aur unhon ne mujh se kaha ke qabr walon ko in ki qabr mein azab ho ga. Lekin main ne unhein jhutlaya aur in ki (baat ki) tasdeeq nahi kar saki. Phir woh donon auratein chali gayiein aur Nabi Karim salla Allahu alaihi wasallam tashreef laaye to main ne arz kiya: ya Rasool Allah! Do burhi auratein thien, phir main Aap se waqia ka zikr kiya. Nabi Karim salla Allahu alaihi wasallam ne farmaya ke unhon ne sahih kaha, qabr walon ko azab ho ga aur in ke azab ko tamam chaupaye sunein ge. Phir main ne dekha ke Nabi Karim salla Allahu alaihi wasallam har namaz mein qabr ke azab se Allah ki panah maangne lage thay.