Hum se Abdullah bin Muhammad Musandi ne bayan kiya, kaha hum se Sufyan ne bayan kiya, kaha ke main ne Muhammad bin al-Munkadir se suna ke kaha ke main ne Jabir bin Abdullah Ansari razi Allahu anhuma se suna ke hum mein se ek aadmi ke yahan bacha paida hua to unhon ne is ka naam Qasim rakkha. Sahabah ne kaha ke hum tumhari kuniyat Abu al-Qasim nahi rakhein ge aur na teri aankh is kuniyat se pukar kar thandi karein ge. Woh shakhs Nabi Karim salla Allahu alaihi wasallam ki khidmat mein hazir hua aur Aap se is ka zikr kiya. Aap salla Allahu alaihi wasallam ne farmaya ke apne larke ka naam Abd-ur-Rahman rakh lo.

Hum se Abu Waleed ne bayan kiya, kaha hum se Shuba ne bayan kiya, un se Sulaiman, Mansoor aur Qatada ne, unhon ne Salim Bin Abi Al-Jad se suna aur un se Jabir Bin Abdullah (Radi Allahu Anhuma) ne bayan kiya ke hum Ansariyion ke qabile mein ek Ansari ke ghar baccha paida ho to unhon ne bacche ka naam Muhammad rakhne ka irada kiya aur Shuba ne Mansoor se riwayat kar ke bayan kiya hai ke in Ansari ne bayan kiya (jin ke yahan baccha paida hua tha) ke mein bacche ko apni gardan par utha kar Nabi Kareem (Sallallahu Alaihi Wasallam) ki khidmat mein hazir hua. Aur Sulaiman ki riwayat mein hai ke un ke yahan baccha paida hua, to unhon ne is ka naam Muhammad rakhna chaha, Aap (Sallallahu Alaihi Wasallam) ne is par farmaya ke mere naam par naam rakho, lekin meri kuniyat (Abu-ul-Qasim) par kuniyat na rakhna, kyunke mujhe taqseem karne wala (Qasim) banaya gaya hai. Mein tum mein taqseem karta hoon, aur Husain ne (apni riwayat mein) yun bayan kiya, ke mujhe taqseem karne wala (Qasim) bana kar bheja gaya hai, mein tum mein taqseem karta hoon. Amr Bin Marzooq ne kaha ke humein Shuba ne khabar di, un se Qatada ne bayan kiya, unhon ne Salim se suna unhon ne Jabir (Radi Allahu Anhu) se ke in Ansari Sahabi ne apne bacche ka naam Qasim rakhna chaha tha to Nabi Kareem (Sallallahu Alaihi Wasallam) ne farmaya ke mere naam par naam rakho lekin kuniyat na rakho
.