Mujh se Ahmad bin Miqdam ne bayan kiya, kaha hum se Fazl bin Sulayman ne bayan kiya, kaha hum se Mansoor bin Abd-ur-Rahman ne bayan kiya, kaha ke mujh se meri walda Safiyyah bint Shaybah ne bayan kiya, in se Asmaa bint Abi Bakr razi Allahu anhuma ne bayan kiya ke ek khatoon Nabi Karim salla Allahu alaihi wasallam ki khidmat mein hazir huien aur kaha ke main ne apni larki ki shadi ki hai is ke baad woh beemar ho gayi aur is ke sar ke baal jharr gaye aur is ka shohar mujh par is ke muamla mein zor deta hai. kiya main is ke sar mein masnooi baal laga doon? Is par Nabi Karim salla Allahu alaihi wasallam ne masnooi baal jorrne waliyon aur jarrwane waliyon ko bura kaha, in par lanat bheji.

Hum se Muhammad bin Yusuf Baykandi ne byaan kiya, kaha hum se Sufyan bin Uyaynah ne, byaan kiya, un se Mansoor bin Mutamir ne, un se Ibrahim Nakhai ne, un se Alqamah ne aur un se Abdullah bin Masood razi Allahu anhu ne byaan kiya ke Allah Ta'ala ne gudwane waliyon aur gudne waliyon par lanat bheji hai chehre ke baal ukhaarne waliyon aur husn ke liye aage ke daant-on mein kushadagi karne waliyon par lanat bheji hai ke yeh Allah ki paida ki hui surat mein tabdeeli karti hain. Abdullah bin Masood razi Allahu anhu ka yeh kalam qabila Bani Asad ki ek aurat ko maloom hua jo Umm Yaqoob ke naam se maroof thi woh aayi aur kaha ke mujhe maloom hua hai ke Aap ne is tarah ki auraton par lanat bheji hai? Abdullah bin Masood razi Allahu anhu ne kaha aakhir kyun na main unhein lanat karoon jinhein Rasool Allah salla Allahu alaihi wasallam ne lanat ki hai aur jo Kitab Allah ke hukm ke mutabiq maloon hai. Is aurat ne kaha ke Quran Majeed to main ne bhi parha hai lekin Aap jo kuch kehte hain main ne to is mein kahin yeh baat nahi dekhi. Unhon ne kaha ke agar tum ne baghaur parha hota to tumhein zaroor mil jata kya tum ne yeh aayat nahi parhi «wa ma aataakum-ur-rasoolu fakhuzhoohu wa ma nahaakum anhu fantahoo» ke ”Rasool (salla Allahu alaihi wasallam) tumhein jo kuch dein le liya karo aur jis se tumhein rok dein, ruk jaya karo.“ Is ne kaha ke parhi hai Abdullah bin Masood razi Allahu anhu ne kaha ke phir Nabi Karim salla Allahu alaihi wasallam ne in cheezon se roka hai. Is par aurat ne kaha ke mera khayal hai ke Aap ki biwi bhi aisa karti hain. Unhon ne kaha ke achha jao aur dekh lo. Woh aurat gayi aur is ne dekha lekin is tarah ki un ke yahan koi mayoob cheez usay nahi mili. Phir Abdullah bin Masood razi Allahu anhu ne kaha ke agar meri biwi isi tarah karti to bhala woh mere saath reh sakti thi? Hargiz nahi.

Hum se Khallad bin Yahya ne byaan kiya , kaha hum se Ibrahim bin Nafi ne , in se Hasan ne woh Muslim ke sahibzade hain , un se Safiya razi Allahu anha ne , un se Aisha razi Allahu anha ne ke qabila Ansar ki ek khatoon ne apni beti ki shadi ki ku . Is ke baad larki ke sar ke baal beemari ki wajah se urr gaye to woh Nabi Karim salla Allahu alaihi wasallam ki khidmat mein hazir huien aur Aap se is ka zikr kiya aur kaha ke is ke shohar ne is se kaha hai ke apne baalon ke saath (doosre masnooi baal) jorre . Nabi Karim salla Allahu alaihi wasallam ne is par farmaya ke aisa to hargiz mat kar kyunke masnooi baal sar par rakh ke jo jorre to aise baal jorne waliyon par lanat ki gayi hai .

Hum se Adam bin Abi Iyas ne byaan kiya , kaha hum se Shubah ne , kaha hum se Humayd bin Nafi ne , in se Zaynub bint Umm Salamah razi Allahu anhuma ne apni walda se ke ek aurat ke shohar ka intiqal ho gaya , is ke baad is ki aankh mein takleef hui to is ke ghar wale Rasool Allah salla Allahu alaihi wasallam ki khidmat mein hazir huay aur Aap se surma lagaane ki ijazat maangi . Nabi Karim salla Allahu alaihi wasallam ne farmaya ke surma (zamana e iddat mein) na lagao . (zamana e jahiliyat mein) tumhein bad-tareen kapre mein waqt guzaarna parta tha , ya (rawi ko shak tha ke yeh farmaya ke) bad-tareen ghar mein waqt (iddat) guzaarna parta tha . Jab is tarah ek saal poora ho jata to is ke paas se kutta guzarta aur woh is par meingni phenkti (jab iddat se bahar aati) pas surma na lagao . Yahan tak ke char mahine das din guzar jayein .

Hum se Adam bin Abi Iyas ne bayan kiya, kaha hum se Shubah ne bayan kiya, in se Amr bin Murrah ne bayan kiya ke main ne Hasan bin Muslim bin Niyaaq se suna, woh Safiyyah bint Shaybah se bayan karte thay aur in se Aisha razi Allahu anha ne bayan kiya ke Ansar ki ek larki ne shadi ki. Is ke baad woh beemar ho gayi aur is ke sar ke baal jharr gaye, is ke ghar walon ne chaha ke is ke baalon mein masnooi baal laga dein. Is liye unhon ne Nabi Karim salla Allahu alaihi wasallam se is ke mutalliq poochha. Nabi Karim salla Allahu alaihi wasallam ne farmaya ke Allah Ta'ala ne masnooi baal jorrne wali aur jarrwane wali donon par lanat bheji hai. Shubah ke saath is hadees ko Muhammad bin Ishaq ne bhi Aban bin Salih se, unhon ne Hasan bin Muslim se, unhon ne Safiyyah se, unhon ne Aisha razi Allahu anha se riwayat kiya hai.

Hum se Adam bin Abi Iyas ne bayan kiya, kaha hum se Shubah ne bayan kiya, in se Hisham bin Urwah ne, in se un ki biwi Fatima ne, in se Asmaa bint Abi Bakr razi Allahu anhuma ne bayan kiya ke Nabi Karim salla Allahu alaihi wasallam ne masnooi baal lagaane wali aur lagwane wali par lanat bheji hai.

Hum se Muhammad bin Muqatil ne bayan kiya, kaha hum ko Abdullah bin Mubarak ne khabar di, kaha hum ko Ubaidullah Umri ne khabar di, unhein Nafi ne aur unhein Abdullah bin Umar razi Allahu anhuma ne ke Rasool Allah salla Allahu alaihi wasallam ne farmaya ”Allah ne masnooi baal jorrne waliyon par, jarrwane waliyon par, godne waliyon par aur gudwane waliyon par lanat bheji hai.“ Nafi ne kaha ke godna kabhi masooray par bhi goda jata hai.

Hum se Ishaq bin Ibrahim bin Rahwayh ne bayan kiya, kaha hum ko Jareer ne khabar di, unhein Mansoor ne, unhein Ibrahim Nakhai ne aur in se Alqama ne ke Abdullah bin Masood razi Allahu anhu ne khoob-surati ke liye godne waliyon, chehre ke baal ukharrne waliyon aur samne ke daanton ke darmiyan kushadgi paida karne waliyon jo Allah ki paidaish mein tabdeeli karti hain, in sab par lanat bheji to Umm Yaqoob ne kaha ke yeh kya baat hui. Abdullah bin Masood razi Allahu anhu ne kaha aakhir main kyun na in par lanat bheijoon jin par Rasool Allah salla Allahu alaihi wasallam ne lanat bheji hai aur Kitab-ullah mein is par lanat maujood hai. Umm Yaqoob ne kaha ke Allah ki qasam! Main ne poora Quran Majeed parh dala aur kahin bhi aaisi koi aayat mujhe nahi mili. Abdullah bin Masood razi Allahu anhu ne kaha: Allah ki qasam! Agar tum ne parha hota to tumhein zaroor mil jata kya tum ko yeh aayat maloom nahi «wa ma ataakum-ur-rasoolu fakhuzhoohu wa ma nahaakum anhu fantahoo» yani ”aur jo kuch Rasool tumhein dein usay le lo aur jis se bhi tumhein mana karein is se ruk jao.“

Hum se Muhammad bin Salam ne bayan kiya, in se Abdah ne bayan kiya, in se Ubaidullah ne bayan kiya, in se Nafi ne aur in se Abdullah bin Umar razi Allahu anhuma ne bayan kiya ke Nabi Karim salla Allahu alaihi wasallam ne masnooi baal jorrne wali aur jarrwane wali, godne wali aur gudwane wali par lanat bheji hai.

Hum se Imam Humaydi ne bayan kiya, kaha hum se Sufyan bin Uyaynah ne, in se Hisham bin Urwah ne bayan kiya, unhon ne Fatima bint Munzhir se suna, unhon ne bayan kiya ke main ne Asmaa bint Abi Bakr razi Allahu anhuma se suna, unhon ne bayan kiya ke ek aurat ne Nabi Karim salla Allahu alaihi wasallam se poochha ke ya Rasool Allah! Meri larki ko khasre ka bukhar ho gaya aur is se is ke baal jharr gaye. Main is ki shadi bhi kar chuki hoon to kya is ke masnooi baal laga doon? Nabi Karim salla Allahu alaihi wasallam ne farmaya ke Allah ne masnooi baal lagaane wali aur jis ke lagaya jaye, donon par lanat bheji hai.

Mujh se Yunus bin Musa ne bayan kiya, unhon ne kaha hum se Fadl bin Dukain ne bayan kiya, unhon ne kaha hum se Sakhr bin Juwayriyah ne bayan kiya, in se Nafi ne aur in se Abdullah bin Umar razi Allahu anhuma ne bayan kiya ke main ne Rasool Allah salla Allahu alaihi wasallam se suna, ya (rawi ne is tarah bayan kiya ke) Nabi Karim salla Allahu alaihi wasallam ne farmaya ”godne wali, gudwane wali, masnooi baal jorrne wali aur jarrwane wali“ yani Nabi Karim salla Allahu alaihi wasallam ne in sab par lanat bheji hai.

Mujh se Muhammad bin Muqatil ne bayan kiya, kaha hum ko Abdullah bin Mubarak ne khabar di, kaha hum ko Sufyan bin Uyaynah ne khabar di, unhein Mansoor ne, unhein Ibrahim Nakhai ne, unhein Alqama ne aur in se Abdullah bin Masood razi Allahu anhu ne bayan kiya ke Allah Ta'ala ne godne waliyon par aur gudwane waliyon par aur chehre ke baal ukharrne waliyon par aur khoob-surati paida karne ke liye samne ke daanton ke darmiyan kushadgi karne waliyon jo Allah ki paidaish mein tabdeeli karti hain, lanat bheji hai phir main kyun na in par lanat bheijoon jin par Rasool Allah salla Allahu alaihi wasallam ne lanat bheji hai aur woh Allah ki kitab mein maujood hai.

Hum se Musaddad ne bayan kiya, kaha hum se Yahya bin Saeed ne bayan kiya, unhein Ubaidullah ne khabar di, kaha mujhko khabar di Nafi ne aur in se Abdullah bin Umar razi Allahu anhuma ne bayan kiya ke Nabi Karim salla Allahu alaihi wasallam ne masnooi baal lagaane wali aur lagwane wali aur godne wali aur gudwane wali par lanat bheji hai.

Hum se Muhammad bin Musanna ne bayan kiya, kaha hum se Abd-ur-Rahman ne bayan kiya, in se Sufyan bin Uyaynah ne, in se Mansoor ne, in se Ibrahim ne, in se Alqama ne aur in se Abdullah bin Masood razi Allahu anhu ne ke godne waliyon par aur gudwane waliyon par, baal ukharrne waliyon par aur khoob-surati ke liye daanton ke darmiyan kushadgi karne waliyon jo Allah ki paidaish mein tabdeeli karti hain, Allah Ta'ala ne lanat bheji hai phir main bhi kyun na in par lanat bheijoon jin par Rasool Allah salla Allahu alaihi wasallam ne lanat bheji hai aur woh Kitab-ullah mein bhi maujood hai.