Hum se Ismail bin Abi Shaybah ne bayan kiya, kaha ke mujh se Imam Malik ne bayan kiya, in se Ibn Shihab ne, in se Humayd bin Abd-ur-Rahman bin Auf aur unhon ne Muawiyah bin Abi Sufyan razi Allahu anhuma se Hajj ke saal mein suna woh Madinah Munawwarah mein mimbar par yeh farma rahe thay unhon ne baalon ki ek choti jo in ke chokidar ke hath mein thi le kar kaha kahan hain tumhare ulama main ne Rasool Allah salla Allahu alaihi wasallam se suna hai Aap is tarah baal banane se mana farma rahe thay aur farma rahe thay ke Bani Israeel is waqt tabah ho gaye jab in ki auraton ne is tarah apne baal sanwarne shuru kar diye.

Aur Ibn Abi Shaybah ne bayan kiya, in se Yunus bin Muhammad ne bayan kiya, in se Falih ne bayan kiya, in se Zayd bin Aslam ne, in se Ata bin Yasar ne aur in se Abu Hurairah razi Allahu anhu ne ke Nabi Karim salla Allahu alaihi wasallam ne farmaya ”sar ke qudrati baalon mein masnooi baal lagaane waliyon par aur lagwane waliyon par aur godne waliyon par aur gudwane waliyon par Allah ne lanat bheji hai.“

Hum se Adam bin Abi Iyas ne bayan kiya, kaha hum se Shubah ne bayan kiya, in se Amr bin Murrah ne bayan kiya ke main ne Hasan bin Muslim bin Niyaaq se suna, woh Safiyyah bint Shaybah se bayan karte thay aur in se Aisha razi Allahu anha ne bayan kiya ke Ansar ki ek larki ne shadi ki. Is ke baad woh beemar ho gayi aur is ke sar ke baal jharr gaye, is ke ghar walon ne chaha ke is ke baalon mein masnooi baal laga dein. Is liye unhon ne Nabi Karim salla Allahu alaihi wasallam se is ke mutalliq poochha. Nabi Karim salla Allahu alaihi wasallam ne farmaya ke Allah Ta'ala ne masnooi baal jorrne wali aur jarrwane wali donon par lanat bheji hai. Shubah ke saath is hadees ko Muhammad bin Ishaq ne bhi Aban bin Salih se, unhon ne Hasan bin Muslim se, unhon ne Safiyyah se, unhon ne Aisha razi Allahu anha se riwayat kiya hai.

Mujh se Ahmad bin Miqdam ne bayan kiya, kaha hum se Fazl bin Sulayman ne bayan kiya, kaha hum se Mansoor bin Abd-ur-Rahman ne bayan kiya, kaha ke mujh se meri walda Safiyyah bint Shaybah ne bayan kiya, in se Asmaa bint Abi Bakr razi Allahu anhuma ne bayan kiya ke ek khatoon Nabi Karim salla Allahu alaihi wasallam ki khidmat mein hazir huien aur kaha ke main ne apni larki ki shadi ki hai is ke baad woh beemar ho gayi aur is ke sar ke baal jharr gaye aur is ka shohar mujh par is ke muamla mein zor deta hai. kiya main is ke sar mein masnooi baal laga doon? Is par Nabi Karim salla Allahu alaihi wasallam ne masnooi baal jorrne waliyon aur jarrwane waliyon ko bura kaha, in par lanat bheji.

Hum se Adam bin Abi Iyas ne bayan kiya, kaha hum se Shubah ne bayan kiya, in se Hisham bin Urwah ne, in se un ki biwi Fatima ne, in se Asmaa bint Abi Bakr razi Allahu anhuma ne bayan kiya ke Nabi Karim salla Allahu alaihi wasallam ne masnooi baal lagaane wali aur lagwane wali par lanat bheji hai.

Hum se Muhammad bin Muqatil ne bayan kiya, kaha hum ko Abdullah bin Mubarak ne khabar di, kaha hum ko Ubaidullah Umri ne khabar di, unhein Nafi ne aur unhein Abdullah bin Umar razi Allahu anhuma ne ke Rasool Allah salla Allahu alaihi wasallam ne farmaya ”Allah ne masnooi baal jorrne waliyon par, jarrwane waliyon par, godne waliyon par aur gudwane waliyon par lanat bheji hai.“ Nafi ne kaha ke godna kabhi masooray par bhi goda jata hai.

Hum se Adam bin Abi Iyas ne bayan kiya, kaha hum se Shubah ne bayan kiya, kaha hum se Amr bin Murrah ne bayan kiya ke main ne Saeed bin al-Musayyab se suna, unhon ne bayan kiya ke Muawiyah razi Allahu anhu aakhri martaba Madinah Munawwarah tashreef laaye aur hamain khutba diya. Aap ne baalon ka ek guchha nikaal ke kaha ke yeh Yahudiyon ke siwa aur koi nahi karta tha. Nabi Karim salla Allahu alaihi wasallam ne usay «zoorun» yani fareebi farmaya yani jo baalon mein jorr lagaye to aisa aadmi mard ho ya aurat woh makkar hai jo apne makr o fareeb par is taur par parda daalta hai.