Hum se Zuhayr bin Harb ne bayan kiya, kaha hum se Jareer ne bayan kiya, in se Ammarah ne, in se Abu Zurah ne aur in se Abu Hurairah razi Allahu anhu ne bayan kiya ke Umar razi Allahu anhu ke paas ek aurat layi gayi jo godne ka kaam karti thi. Umar razi Allahu anhu khare ho gaye (aur is waqt maujood sahabah se) kaha main tumhein Allah ka wasta deta hoon kisi ne kuch Nabi Karim salla Allahu alaihi wasallam se godne ke mutalliq suna hai. Abu Hurairah razi Allahu anhu ne kaha ke main ne kharay ho kar arz kiya: Ameer-ul-Momineen! Main ne suna hai. Umar razi Allahu anhu ne poochha kya suna hai? Abu Hurairah razi Allahu anhu ne bayan kiya ke main ne Nabi Karim salla Allahu alaihi wasallam se suna hai ke godne ka kaam na karo aur na gudwao.

Hum se Musaddad ne bayan kiya, kaha hum se Yahya bin Saeed ne bayan kiya, unhein Ubaidullah ne khabar di, kaha mujhko khabar di Nafi ne aur in se Abdullah bin Umar razi Allahu anhuma ne bayan kiya ke Nabi Karim salla Allahu alaihi wasallam ne masnooi baal lagaane wali aur lagwane wali aur godne wali aur gudwane wali par lanat bheji hai.

Hum se Muhammad bin Musanna ne bayan kiya, kaha hum se Abd-ur-Rahman ne bayan kiya, in se Sufyan bin Uyaynah ne, in se Mansoor ne, in se Ibrahim ne, in se Alqama ne aur in se Abdullah bin Masood razi Allahu anhu ne ke godne waliyon par aur gudwane waliyon par, baal ukharrne waliyon par aur khoob-surati ke liye daanton ke darmiyan kushadgi karne waliyon jo Allah ki paidaish mein tabdeeli karti hain, Allah Ta'ala ne lanat bheji hai phir main bhi kyun na in par lanat bheijoon jin par Rasool Allah salla Allahu alaihi wasallam ne lanat bheji hai aur woh Kitab-ullah mein bhi maujood hai.