Aur hum se Abu Nuaym ne bayan kiya, in se Naseer bin Abi al-Ash-as ne bayan kiya, in se Abdullah bin Mohab ne ke Umm Salamah razi Allahu anha ne unhein Nabi Karim salla Allahu alaihi wasallam ka baal dikhaya jo surkh tha.

Hum se Abdullah Bin Rajaa ne bayan kiya, kaha hum se Israel ne bayan kiya, un se Abu Ishaq ne, un se Wahb ne, un se Abu Juhaifah Sawai (Radi Allahu Anhu) ne bayan kiya ke mein ne Nabi Kareem (Sallallahu Alaihi Wasallam) ko dekha. Aap (Sallallahu Alaihi Wasallam) ke nichle hont mubarak ke neeche thori ke kuch baal safaid thay
.

Hum se Isam Bin Khalid ne bayan kiya, unhon ne kaha hum se Hareez Bin Usman ne bayan kiya aur unhon ne Nabi Kareem (Sallallahu Alaihi Wasallam) ke sahabi Abdullah Bin Busr (Radi Allahu Anhu) se poocha, kya Rasul Allah (Sallallahu Alaihi Wasallam) boodhe ho gaye thay? Unhon ne kaha ke aap (Sallallahu Alaihi Wasallam) ki thori ke chand baal safaid ho gaye thay
.

Hum se Mualla bin Asad ne bayan kiya, kaha hum se Wuhaib ne bayan kiya, in se Ayub Sakhtiyani ne, in se Muhammad bin Sireen ne bayan kiya ke main ne Anas razi Allahu anhu se poochha kya Nabi Karim salla Allahu alaihi wasallam ne khizhab istemal kiya tha? Bole ke Nabi Karim salla Allahu alaihi wasallam ke baal hi bahut kam sufaid huay thay.

Hum se Sulayman bin Harb ne bayan kiya, kaha hum se Hammad bin Zayd ne bayan kiya, in se Sabit ne bayan kiya ke Anas razi Allahu anhu se Nabi Karim salla Allahu alaihi wasallam ke khizhab ke mutalliq sawal kiya gaya to Ahwal ne kaha ke Nabi Karim salla Allahu alaihi wasallam ko khizhab ki naubat hi nahi aayi thi agar main Aap ki darhi ke sufaid baal gin-na chahta to gin sakta tha.

Hum se Malik bin Ismail ne bayan kiya, kaha hum se Israeel ne bayan kiya, in se Usman bin Abdullah bin Wahb ne bayan kiya ke mere ghar walon ne Umm Salamah razi Allahu anha ke paas pani ka ek piyala le kar bheja (rawi e hadees) Israeel rawi ne teen ungliyaan band kar lein yani woh itni chhoti piyali thi is piyali mein baalon ka ek guchha tha jis mein Nabi Karim salla Allahu alaihi wasallam ke baalon mein se kuch baal thay. Usman ne kaha jab kisi shakhs ko nazar lag jati ya aur koi beemari hoti to woh apna pani ka bartan Bibi Umm Salamah razi Allahu anha ke paas bhej deta. (Woh is mein Nabi Karim salla Allahu alaihi wasallam ke baal dubo detien) Usman ne kaha ke main ne nalki ko dekha (jis mein mo-e mubarak rakkhe huay thay) to surkh surkh baal dikhayi diye.