Hum se Abdullah bin Yusuf Taneesi ne bayan kiya , unhon ne kaha hum ko Imam Malik ne khabar di , unhon ne kaha hamain Abdullah bin Dinar ne aur in se Abdullah bin Umar razi Allahu anhuma ne bayan kiya ke Rasool Allah salla Allahu alaihi wasallam ne muhram ko zafran ya wars se ranga hua kapra pehnne se mana farmaya tha aur Nabi Karim salla Allahu alaihi wasallam ne farmaya ke jise jootay na milein woh mozay hi pehan lein lekin un ko takhne ke neeche tak kaat dein .

Hum se Adam ne bayan kiya, kaha un ko Ibn-e-Abi Zi’b ne Nafe’ ke waaste se khabar di, woh Abdullah bin Umar Radhiallahu Anhuma se riwayat karte hain, woh Rasoolullah Sallallahu Alaihi Wasallam se aur (doosri sanad mein) Zohri Salim se, kaha woh Ibn-e-Umar Radhiallahu Anhuma se, woh Nabi Kareem Sallallahu Alaihi Wasallam se riwayat karte hain ke ek shakhs ne Aap Sallallahu Alaihi Wasallam se poocha ke Ehraam baandhne waale ko kya pahanna chaahiye? Aap Sallallahu Alaihi Wasallam ne farmaaya ke na qamees pahne na Saafa baandhe aur na pajamah aur na koi Sarposh oodhe aur na koi Za’faran aur Wars se ranga huwa kapda pahne aur agar joote na milen to moze pahan le aur jnhein (is tarah) kaat de ke takhnon se neeche ho jaayen.

Hum se Abu-al-Walid ne bayan kiya, unhon ne kaha hum se Shuba ne bayan kiya, unhon ne kaha ke mujhe Amr Bin Dinar ne khabar di, unhon ne Jabir Bin Zaid se suna, unhon ne Abdullah Bin Abbas (Radi Allahu Anhuma) se suna, Aap ne kaha ke mein ne Rasul Allah (Sallallahu Alaihi Wasallam) ko Arafat mein khutba dete suna tha ke jis ke pas ihram mein joote na hon wo mauze pehen le aur jis ke pas tehband na ho wo pajama pehen le
.

Hum se Adam Bin Abi Iyas ne bayan kiya, kaha hum se Shuba ne bayan kiya, un se Amr Bin Dinar ne bayan kiya, un se Jabir Bin Zaid ne aur un se Ibn Abbas (Radi Allahu Anhuma) ne bayan kiya ke Nabi Kareem (Sallallahu Alaihi Wasallam) ne hum ko maidan-e-Arafat mein waaz sunaya, is mein aap ne farmaya ke agar kisi ko ihram ke liye tehband na mile to wo pajama pehen le aur agar kisi ko joote na milein to wo mauze pehen le
.

Hum se Abu Nuaym ne bayan kiya , kaha hum se Sufyan Sawri ne bayan kiya , in se Amr ne , in se Jabir bin Zayd ne aur in se Abdullah bin Abbas razi Allahu anhuma ne bayan kiya ke Nabi Karim salla Allahu alaihi wasallam ne (muhram ke baare mein) farmaya ”jise tehmat na mile woh pajama pehne aur jise chappal na milein woh mozay pehnein .“

Hum se Muhammad bin Yusuf Faryabi ne bayan kiya , kaha hum se Sufyan Sawri ne bayan kiya , in se Amr bin Dinar ne , in se Jabir bin Zayd ne aur in se Ibn Abbas razi Allahu anhuma ne bayan kiya ke Nabi Karim salla Allahu alaihi wasallam ne farmaya ke jis ke paas ihram baandhne ke liye tehband na ho woh pajama pehan le (is ka kaatna zaroori nahi hai) aur jis ke paas jootay na hon woh mozay hi pehan le lekin takhnon ke neeche tak un ko kaat daale (jaisa ke pichhli hadees mein hai) .