Hum se Sulayman bin Harb ne bayan kiya , kaha hum se Hammad ne bayan kiya , in se Saeed bin Abi Muslimah ne , unhon ne kaha main ne Anas razi Allahu anhu se poochha kya Nabi Karim salla Allahu alaihi wasallam jootay pehne huay namaz parhte thay ? To unhon ne kaha ke haan .

Hum se Abdullah bin Maslamah Qanabi ne bayan kiya , in se Imam Malik ne , in se Muqbiri ne , in se Ubaid bin Jurayj ne ke unhon ne Abdullah bin Umar razi Allahu anhuma se arz kiya ke main Aap ko char aaisi cheezin karte dekhta hoon jo main ne Aap ke kisi saathi ko karte nahi dekha . Ibn Umar razi Allahu anhuma ne kaha: Ibn Jurayj! Woh kya cheezin hain ? Unhon ne kaha ke main ne Aap ko dekha hai ke Aap (Khana Kaba ke) kisi kone ko tawaf mein hath nahi lagate sirf do Arkan e Yamani (yani sirf Rukn e Yamani aur Hajar e Aswad) ko chhoote hain aur main ne Aap ko dekha hai ke Aap saaf zain ke chamre ka joota pehnte hain aur main ne Aap ko dekha ke Aap apna kapra zard rang se rangte hain ya zard khizhab lagate hain aur main ne Aap ko dekha ke jab Makkah mein hote hain to sab log to Zhul-Hijjah ka chaand dekh kar ihram baandh laite hain lekin Aap ihram nahi baandhte balkay Tarwiya ke din (8 Zhul-Hijjah ko) ko ihram baandhte hain . In se Abdullah bin Umar razi Allahu anhuma ne kaha ke Khana Kaba ke arkan ke mutalliq jo tum ne kaha to main ne Rasool Allah salla Allahu alaihi wasallam ko hamesha sirf Hajar e Aswad aur Rukn e Yamani ko chhoote dekha . Saaf tari ke chamre ke jooton ke mutalliq jo tum ne poochha to main ne dekha hai ke Nabi Karim salla Allahu alaihi wasallam isi chamre ka joota pehnte thay jis mein baal nahi hote thay aur Aap is ko pehne huay wuzu karte thay is liye main bhi pasand karta hoon ke aisa hi joota istemal karoon . Zard rang ke mutalliq tum ne jo kaha hai to main ne Nabi Karim salla Allahu alaihi wasallam ko is se khizhab karte ya kapre rangte dekha hai is liye main bhi is zard rang ko pasand karta hoon aur raha ihram baandhne ka masla to main ne Nabi Karim salla Allahu alaihi wasallam ko dekha ke Aap isi waqt ihram baandhte jab oont par sawar ho kar jaane lagte .

Hum se Abdullah bin Yusuf Taneesi ne bayan kiya , unhon ne kaha hum ko Imam Malik ne khabar di , unhon ne kaha hamain Abdullah bin Dinar ne aur in se Abdullah bin Umar razi Allahu anhuma ne bayan kiya ke Rasool Allah salla Allahu alaihi wasallam ne muhram ko zafran ya wars se ranga hua kapra pehnne se mana farmaya tha aur Nabi Karim salla Allahu alaihi wasallam ne farmaya ke jise jootay na milein woh mozay hi pehan lein lekin un ko takhne ke neeche tak kaat dein .

Hum se Muhammad bin Yusuf Faryabi ne bayan kiya , kaha hum se Sufyan Sawri ne bayan kiya , in se Amr bin Dinar ne , in se Jabir bin Zayd ne aur in se Ibn Abbas razi Allahu anhuma ne bayan kiya ke Nabi Karim salla Allahu alaihi wasallam ne farmaya ke jis ke paas ihram baandhne ke liye tehband na ho woh pajama pehan le (is ka kaatna zaroori nahi hai) aur jis ke paas jootay na hon woh mozay hi pehan le lekin takhnon ke neeche tak un ko kaat daale (jaisa ke pichhli hadees mein hai) .