Hum se Ismail bin Abdullah ne bayan kiya, kaha ke mujh se Imam Malik ne bayan kiya, in se Ishaq bin Abdullah bin Abi Talha ne aur in se Anas bin Malik razi Allahu anhu ne bayan kiya ke main Rasool Allah salla Allahu alaihi wasallam ke saath chal raha tha. Nabi Karim salla Allahu alaihi wasallam ke jism e mubarak par (Yaman ke) Najran ki bani hui motay hashiye ki ek chadar thi. Itne mein ek dehati aa gaya aur us ne Nabi Karim salla Allahu alaihi wasallam ki chadar ko pakar kar itni zor se khaincha ke main ne Nabi Karim salla Allahu alaihi wasallam ke moondhay par dekha ke is ke zor se khainchne ki wajah se nishan par gaya tha. Phir us ne kaha: Ae Muhammad! Mujhe is maal mein se diye jaane ka hukm kijiye jo Allah ka maal Aap ke paas hai. Nabi Karim salla Allahu alaihi wasallam is ki taraf mutawajjo huay aur muskuraye aur Aap ne usay diye jaane ka hukm farmaya.

Hum se Yahya Bin Bukair ne bayan kiya, kaha hum se Imam Malik ne bayan kiya, un se Ishaq Bin Abdullah ne aur un se Anas Bin Malik (Radi Allahu Anhu) ne bayan kiya ke mein Nabi Kareem (Sallallahu Alaihi Wasallam) ke sath ja raha tha. Aap (Sallallahu Alaihi Wasallam) Najran ki bani hui chaunde hashiye ki ek chadar odhe hue thay. Itne mein ek dehati ne Aap (Sallallahu Alaihi Wasallam) ko gher liya aur zor se aap ko khaincha, mein ne aap ke shane ko dekha, is par chadar ke kone ka nishan pad gaya, aisa khaincha. Phir kehne laga. Allah ka mal jo Aap ke paas hai is mein se kuch mujh ko dilayiye. Aap (Sallallahu Alaihi Wasallam) ne is ki taraf dekha aur hans diye. Phir Aap (Sallallahu Alaihi Wasallam) ne ise dene ka hukm farmaya (aakhri jumla mein se tarjuma-tul-baab nikalta hai)
.

Hum se Abd-ul-Aziz bin Abdullah Owaysi ne bayan kiya, kaha hum se Imam Malik rahmahullah ne bayan kiya, in se Ishaq bin Abdullah bin Abi Talha ne aur in se Anas bin Malik razi Allahu anhu ne bayan kiya ke main Rasool Allah salla Allahu alaihi wasallam ke saath chal raha tha. Aap ke jism par ek Najrani chadar thi, jis ka hashiya mota tha. Itne mein ek dehati Aap salla Allahu alaihi wasallam ke paas aaya aur us ne Aap ki chadar bare zor se khainchi. Anas razi Allahu anhu ne bayan kiya ke main ne Nabi Karim salla Allahu alaihi wasallam ke shaane ko dekha ke zor se khainchne ki wajah se, is par nishan par gaye. Phir us ne kaha: Ae Muhammad! Allah ka jo maal Aap ke paas hai is mein se mujhe diye jaane ka hukm farmayein. Is waqt main ne Nabi Karim salla Allahu alaihi wasallam ko murr kar dekha to Aap muskura diye phir Aap salla Allahu alaihi wasallam ne usay diye jaane ka hukm farmaya.