Hum se Yahya bin Bukair ne bayan kiya , unhon ne kaha humein Layth ne khabar di , unhon ne Aqeel bin Khalid se , unhon ne Ibn Shihab se , unhon ne kaha ke mujhe Urwah bin Zubair raziyallahu anhu ne khabar di ke Umm ul Momineen Aisha raziyallahu anha ne unhein khabar di ke musalman auraten Rasool Allah salla Allahu alaihi wa sallam ke sath namaz fajr parhne chadron mein lipt kar aati thin . Phir namaz se farigh ho kar jab apne gharon ko wapas hoti to unhein andhere ki wajah se koi shakhs pehchan nahi sakta tha .

Hum se Abu al-Yaman ne bayan kiya, unhon ne kaha ke hum ko Shuaib ne Zuhri se khabar di, kaha ke mujhe Urwah bin Zubair ne khabar di ke Aisha Razi Allah Anha ne farmaya ke Nabi Kareem Sallallahu Alaihi Wasallam fajr ki namaz padhte aur Aap Sallallahu Alaihi Wasallam ke sath namaz mein kai musalman auratein apni chadrein odhe hue shareek-e-namaz hotin, phir apne gharon ko wapas chali jati thin, is waqt unhein koi pehchan nahi sakta tha.

Hum se Abdullah bin Maslamah Qanabi ne byaan kiya , unhon ne Imam Malik rahimahullah se byaan kiya , (doosri sanad) aur hum se Abdullah bin Yusuf Taneesi ne byaan kiya , unhein Imam Malik rahimahullah ne Yahya bin Saeed Ansari se khabar di , unhein Umrah bint Abdur Rahman ne , un se Aishah razi Allahu anha ne farmaya ke Rasool Allah salla Allahu alaihi wasallam subah ki namaaz parh lete phir auraten chadrein lapet kar (apne gharon ko) wapas ho jati thi . Andhere se un ki pehchaan na ho sakti .

Hum se Yahya bin Musa ne byaan kiya , kaha ke hum se Saeed bin Mansoor ne byaan kiya , kaha ke hum se Fulayh bin Sulayman ne Abdur Rahman bin Qasim se byaan kiya , un se us ke baap (Qasim bin Muhammad bin Abi Bakr) ne un se Aishah razi Allahu anha ne ke Rasool Allah salla Allahu alaihi wasallam subah ki namaaz munh andhere parhte thay . Musalmanon ki auraten jab (namaaz parh kar) wapas hoti to andhere ki wajah se un ki pehchaan na hoti ya woh ek doosre ko na pehchaan sakti .