Aur main Nabi Karim salla Allahu alaihi wasallam ki khidmat mein apne ek sheer-khwar larke ko le kar hazir hui phir Nabi Karim salla Allahu alaihi wasallam ke oopar us ne peshab kar diya to Aap salla Allahu alaihi wasallam ne pani mangwa kar peshab ki jagah par chheinta diya.

Hum se Abdullah bin Yousuf ne bayan kiya, kaha hamein Malik ne Ibn-e-Shihaab se khabar di, woh Ubaidullah bin Abdullah bin ’Utbah (bin Mas’ood) se yeh Hadees riwayat karte hain, woh Umm-e-Qais bint-e-Mihsan naami ek khatoon se ke woh Rasoolullah Sallallahu Alaihi Wasallam ki khidmat-e-aqdas mein apna chhota bachcha le kar aayein. Jo khaana nahi khaata tha. (Yani sheer khwaar tha) Rasoolullah Sallallahu Alaihi Wasallam ne use apni god mein bitha liya. Us bachche ne Aap Sallallahu Alaihi Wasallam ke kapde par peshaab kar diya. Aap Sallallahu Alaihi Wasallam ne paani manga kar kapde par chidak diya aur use nahi dhoya.

Hum se Muhammad bin Muqatil ne bayan kiya, kaha hum ko Abdullah bin Mubarak ne khabar di, kaha hum ko Humayd Taweel ne khabar di aur unhein Anas razi Allahu anhu ne in se pachhna lagwane wale ki mazdoori ke baare mein poochha gaya tha. Unhon ne kaha ke Rasool Allah salla Allahu alaihi wasallam ne pachhna lagwaya tha Aap ko Abu Taybah (Nafi ya Maysarah) ne pachhna lagaya tha Aap salla Allahu alaihi wasallam ne unhein do saa khajoor mazdoori mein di thi aur Aap ne in ke malikon (Banu Harisa) se guftagu ki to unhon ne in se wasool kiye jaane wale lagan mein kami kar di thi aur Nabi Karim salla Allahu alaihi wasallam ne farmaya ke (khoon ke dabao ka) behtareen ilaaj jo tum karte ho woh pachhna lagwana hai aur umdah dawa ood e hindi ka istemal karna hai aur farmaya apne bachon ko «uzrah» (halaq ki beemari) mein in ka taloo daba kar takleef mat do balkay «qust» laga do is se waram jata rahe ga.

Hum se Ali bin Abdullah Madini ne bayan kiya, kaha hum se Sufyan bin Uyaynah ne, in se Zuhri ne, kaha mujhko Ubaidullah bin Abdullah bin Utbah ne khabar di aur unhein Umm Qays razi Allahu anha ne ke main apne ek larke ko le kar Rasool Allah salla Allahu alaihi wasallam ki khidmat mein hazir hui. Main ne is ki naak mein batti daali thi, is ka halaq dabaya tha kyunke is ko gale ki beemari ho gayi thi Aap salla Allahu alaihi wasallam ne farmaya tum apne bachon ko ungli se halaq daba kar kyun takleef deti ho yeh ood e hindi lo is mein saat beemariyon ki shifa hai in mein ek zaat-ul-janb (pasli ka waram bhi hai) agar halaq ki beemari ho to is ko naak mein daalo agar zaat-ul-janb ho to halaq mein daalo (ladood karo) Sufyan kehte hain ke main ne Zuhri se suna, Nabi Karim salla Allahu alaihi wasallam ne do beemariyon ko to bayan kiya baqi paanch beemariyon ko bayan nahi farmaya. Ali bin Abdullah Madini ne kaha main ne Sufyan se kaha, Mamar to Zuhri se yun naqal karta hai «aalaktu anhu» unhon ne kaha ke Mamar ne yaad nahi rakkha. Mujhe yaad hai Zuhri ne yun kaha tha «aalaktu alayhi» aur Sufyan ne is tahneek ko bayan kiya jo bacha ko paidaish ke waqt ki jati hai Sufyan ne ungli halaq mein daal kar apne kauway ko ungli se uthaya to Sufyan ne «aalaq» ka maani bache ke halaq mein ungli daal kar taloo ko uthaya unhon ne yeh nahi kaha «aalikoo anhu shay-an» .

Hum se Abu al-Yaman ne bayan kiya, kaha hum ko Shuayb ne khabar di, unhein Zuhri ne kaha ke mujhe Ubaidullah bin Abdullah bin Utbah ne khabar di ke Umm Qays bint Muhsan Asdiyyah ne unhein khabar di, in ka talluq qabila Khuzaimah ki shakh bin Asad se tha woh in ibtidai muhajiraat mein se thien jinhon ne Nabi Karim salla Allahu alaihi wasallam se bai-at ki thi. Aap Ukashah bin Muhsan razi Allahu anhu ki behen hain (unhon ne bayan kiya ke) woh Rasool Allah salla Allahu alaihi wasallam ki khidmat mein apne ek bete ko le kar aayin. Unhon ne apne larke ke «uzrah» ka ilaaj taloo daba kar kiya tha Nabi Karim salla Allahu alaihi wasallam ne farmaya, aakhir tum auratein kyun apni aulad ko yun taloo daba kar takleef pahunchati ho. Tumhein chahiye ke is marz mein ood e hindi ka istemal kiya karo kyunke is mein saat beemariyon se shifa hai. In mein ek zaat-ul-janb ki beemari bhi hai. (Ood e hindi se) Nabi Karim salla Allahu alaihi wasallam ki murad «kust» thi yahi ood e hindi hai. Aur Yunus aur Ishaq bin Rashid ne bayan kiya aur in se Zuhri ne is riwayat mein bajaye «aalaktu alayhi» ke «al-laktu alayhi» naqal kiya hai.

Hum se Muhammad bin Yahya ne bayan kiya, kaha hum ko Attab bin Basheer ne khabar di, unhein Ishaq ne, in se Zuhri ne bayan kiya ke mujhko Ubaidullah bin Abdullah ne khabar di ke Umm Qays bint Muhsan jo pehle pehal Hijrat karne wali auraton mein se thien jinhon ne Rasool Allah salla Allahu alaihi wasallam se bai-at ki thi aur woh Ukashah bin Muhsan razi Allahu anhu ki behen thien, khabar di ke woh Rasool Allah salla Allahu alaihi wasallam ki khidmat mein apne بیٹے ko le kar hazir huien. Unhon ne is bache ka kauwa girne mein taloo daba kar ilaaj kiya tha. Nabi Karim salla Allahu alaihi wasallam ne farmaya ke Allah se dro ke tum apni aulad ko is tarah taloo daba kar takleef pahunchati ho ood e hindi (koot) is mein istemal karo kyunke is mein saat beemariyon ke liye shifa hai jin mein se ek namonia bhi hai. Nabi Karim salla Allahu alaihi wasallam ki murad ood e hindi se «kust» thi jise «qust» bhi kehte hain yeh bhi ek lughat hai.