Hum se Abu al-Yaman ne bayan kiya , kaha hum ko Shuayb ne khabar di , unhein Zuhri ne , kaha mujhko Saeed bin al-Musayyab ne khabar di aur unhon ne Abu Hurairah razi Allahu anhu se suna ke jis raat Rasool Allah salla Allahu alaihi wasallam ko Meraj karayi gayi to Aap salla Allahu alaihi wasallam ko (Bayt-ul-Muqaddas ke shehar) Eliya mein sharab aur doodh ke do piyale pesh kiye gaye . Nabi Karim salla Allahu alaihi wasallam ne unhein dekha phir Aap salla Allahu alaihi wasallam ne doodh ka piyala le liya . Is par Jibrail alaihissalam ne kaha is Allah ke liye tamam tareefein hain jis ne Aap ko Deen e Fitrat ki taraf chalne ki hidayat farmayi . Agar Aap ne sharab ka piyala le liya hota to Aap ki ummat gumrah ho jati . Shuayb ke saath is hadees ko Mamar , Ibn al-Haad , Usman bin Amr aur Zubaydi ne Zuhri se naqal kiya hai .

Hum se Ibrahim Bin Musa ne bayan kiya kaha hum ko Hisham Bin Yusuf ne khabar di kaha hum ko Maamar ne khabar di unhein Zuhri ne unhein Saeed Bin Musayyib ne aur un se Abu Hurairah (Radi Allahu Anhu) ne bayan kiya ke Rasul Allah (Sallallahu Alaihi Wasallam) ne is raat ki kaifiyat bayan ki jis mein Aap (Sallallahu Alaihi Wasallam) ko Meraj hua ke mein ne Musa (Alaihis Salam) ko dekha ke wo ek duble patle seedhe balon wale aadmi hain. Aisa maloom hota tha ke qabila Shanwah mein se hon aur mein ne Isa (Alaihis Salam) ko bhi dekha wo miyana qad aur nihayat surkh-o-safaid rang wale thay. Aise tar-o-taza aur paak-o-saaf ke maloom hota tha ke abhi ghusal khana se nikle hain aur mein Ibrahim (Alaihis Salam) se un ki aulad mein sab se zyada mushabeh hoon. Phir do bartan mere samne laye gaye. Ek mein doodh tha aur doosre mein sharab thi. Jibrail (Alaihis Salam) ne kaha ke dono cheezon mein se aap ka jo ji chahe pijiye. Mein ne doodh ka pyala apne hath mein le liya aur ise pee gaya. Mujh se kaha gaya ke aap ne fitrat ko ikhtiyar kiya (doodh aadmi ki paidaishi ghiza hai) agar is ke bajaye aap ne sharab pee hoti to aap ki ummat gumrah ho jati

Hum se Abdan ne byaan kiya , kaha hum se Abdullah bin Mubarak ne byaan kiya , kaha hum ko Yunus bin Yazid ne khabar di (doosri sanad) Imam Bukhari rahmahullah ne kaha aur hum se Ahmad bin Salih ne byaan kiya , kaha hum se Anbasah bin Khalid ne byaan kiya , kaha hum se Yunus bin Yazid ne byaan kiya , un se Ibn Shihab ne ke Ibn Musayyab ne byaan kiya aur un se Abu Hurairah razi Allahu anhu ne byaan kiya ke Meraj ki raat mein Nabi Karim salla Allahu alaihi wasallam ke samne Bayt al-Muqaddas mein do piyale pesh kiye gaye ek sharab ka aur doosra doodh ka . Nabi Karim salla Allahu alaihi wasallam ne donon ko dekha phir doodh ka piyale utha liya . Is par Jibraeel alaihissalam ne kaha ke tamam hamd us Allah ke liye hai jis ne Aap ko fitrat (Islam) ki hidayat ki . Agar Aap sharab ka piyale utha lete to Aap ki ummat gumrah ho jati .

Hum se Abdan ne bayan kiya , unhon ne kaha hum ko Abdullah bin al-Mubarak ne khabar di , unhon ne kaha hum ko Yunus ne khabar di , unhein Zuhri ne , unhein Saeed bin al-Musayyab ne aur in se Abu Hurairah razi Allahu anhu ne bayan kiya ke Shab e Meraj mein Rasool Allah salla Allahu alaihi wasallam ko doodh aur sharab ke do piyale pesh kiye gaye .