Hum se Ali bin Abdullah Madini ne bayan kiya , kaha hum se Sufyan Sawri ne bayan kiya , unhon ne Yahya bin Saeed se suna , unhon ne Basheer bin Yasar se , in se Suwayd bin Numan ne , kaha ke hum Rasool Allah salla Allahu alaihi wasallam ke saath Khaibar rawana huay . Jab hum Maqam e Sahba par pahunche to Nabi Karim salla Allahu alaihi wasallam ne khana talab farmaya . Khane mein sattu ke siwa aur koi cheez nahi layi gayi , phir hum ne khana khaya aur Nabi Karim salla Allahu alaihi wasallam kulli kar ke namaz ke liye khare ho gaye , hum ne bhi kulli ki .

Hum se Abdullah bin Yousuf ne bayan kiya, unhon ne kaha mujhe Imam Malik ne Yahya bin Sa’eed ke waaste se khabar di, woh Bushair bin Yasaar Bani Haarisa ke aazaad kardah ghulam se riwayat karte hain ke Suwaid bin No’man Radhiallahu Anhu ne unhein khabar di ke fatah-e-Khaibar waale saal woh Rasoolullah Sallallahu Alaihi Wasallam ke saath Sahba ki taraf, jo Khaibar ke qareeb ek jagah hai pahunche. Aap Sallallahu Alaihi Wasallam ne Asr ki Namaz padhi, phir naashta mangwaaya gaya to siwaaye sattu ke aur kuch nahi laaya gaya. Phir Aap Sallallahu Alaihi Wasallam ne hukm diya to woh bhigo diye gaye. Phir Rasoolullah Sallallahu Alaihi Wasallam ne khaaya aur hum ne (bhi) khaaya. Phir Maghrib (ki Namaz) ke liye khade ho gaye. Aap Sallallahu Alaihi Wasallam ne kulli ki aur hum ne (bhi) phir Aap Sallallahu Alaihi Wasallam ne Namaz padhi aur naya Wuzu nahi kiya.