Hum se Hafs bin Umar ne bayan kiya , ke hum se Shoba ne bayan kiya Abul Minhal ki riwayat se , unhon ne Abu Barza Fazla bin Ubaid raziyallahu anhu se , unhon ne kaha ke Nabi Karim salla Allahu alaihi wa sallam subah ki namaz is waqt parhte thay jab hum apne pas baithe hue shakhs ko pehchan lete thay . Subah ki namaz mein Nabi Karim salla Allahu alaihi wa sallam saath se sau tak ayaten parhte . Aur aap salla Allahu alaihi wa sallam zuhr is waqt parhte jab sooraj dhal jata . Aur asr ki namaz is waqt ke hum Madina Munawwara ki aakhri hadd tak namaz parhne ke baad jate lekin sooraj ab bhi taiz rehta tha . Namaz maghrib ka Anas raziyallahu anhu ne jo waqt bataya tha woh mujhe yaad nahi raha . Aur Nabi Karim salla Allahu alaihi wa sallam isha ki namaz ko tehai raat tak der karne mein koi harj nahi samajhte thay , phir Abul Minhal ne kaha ke aadhi raat tak muakhkhar karne mein koi harj nahi samajhte thay . Aur Muaz ne kaha ke Shoba ne farmaya ke phir mein dobara Abul Minhal se mila to unhon ne farmaya ya tehai raat tak .

Hum se Muhammad bin Muqatil ne bayan kiya , unhon ne kaha humein Abdullah bin Mubarak ne khabar di , unhon ne kaha humein Awf ne khabar di Siyar bin Salama se , unhon ne bayan kiya ke mein aur mere walid Abu Barza Aslami raziyallahu anhu ki khidmat mein hazir hue . Un se mere walid ne poocha ke Nabi Karim salla Allahu alaihi wa sallam farz namazen kin waqton mein parhte thay . Unhon ne farmaya ke dopahar ki namaz jisay tum pehli namaz kehte ho sooraj dhulne ke baad parhte thay . Aur jab asr parhte is ke baad koi shakhs Madina ke intihai kinare par apne ghar wapas jata to sooraj ab bhi taiz hota tha . Siyar ne kaha ke maghrib ke waqt ke mutalliq aap ne jo kuch kaha tha woh mujhe yaad nahi raha . Aur isha ki namaz jisay tum atma kehte ho is mein der ko pasand farmate thay aur is se pehle sone ko aur is ke baad baat cheet karne ko na-pasand farmate aur subah ki namaz se is waqt farigh ho jate jab aadmi apne qareeb baithe hue doosre shakhs ko pehchan sakta aur subah ki namaz mein aap saath se sau tak ayaten parha karte thay .

Hum se Muhammad bin Salam ne bayan kiya , unhon ne kaha hum se Abdul Wahab Thaqafi ne bayan kiya , unhon ne kaha ke hum se Khalid Haza ne bayan kiya Abul Minhal se , unhon ne Abu Barza Aslami raziyallahu anhu se ke Rasool Allah salla Allahu alaihi wa sallam isha se pehle sone aur is ke baad baat cheet karne ko na-pasand farmate thay .

Hum se Musaddad bin Musarhad ne bayan kiya , kaha hum se Yahya bin Saeed Qattan ne , kaha hum se Awf Aarabi ne , kaha ke hum se Abul Minhal Siyar bin Salama ne , unhon ne kaha ke mein apne walid Salama ke sath Abu Barza Aslami raziyallahu anhu ki khidmat mein hazir hua . Un se mere walid sahib ne poocha ke Rasool Allah salla Allahu alaihi wa sallam farz namazen kis tarah yani kin kin auqat mein parhte thay . Hum se is ke baray mein bayan farmaye . Unhon ne farmaya ke aap salla Allahu alaihi wa sallam hejeer zuhr jisay tum salat awla kehte ho sooraj dhulte hi parhte thay . Aur aap salla Allahu alaihi wa sallam ke asr parhne ke baad koi bhi shakhs apne ghar wapas hota aur woh bhi Madina ke sab se aakhri kinare par to sooraj abhi saaf aur roshan hota . Maghrib ke baray mein aap ne jo kuch bataya mujhe yaad nahi raha . Aur farmaya ke isha mein aap salla Allahu alaihi wa sallam takheer pasand farmate thay . Is se pehle sone ko aur is ke baad baat karne ko pasand nahi karte thay . Subah ki namaz se jab aap salla Allahu alaihi wa sallam farigh hote to hum apne qareeb baithe hue doosre shakhs ko pehchan lete . Aap salla Allahu alaihi wa sallam fajr mein saath se sau tak ayaten parhte thay .

Aur Umm Salamah razi Allahu anha ne kaha ke main ne logon ke peeche ho kar Kaaba ka tawaf kiya . Us waqt Nabi Karim salla Allahu alaihi wasallam (namaaz mein) Surah Tur parh rahe thay .