Aur Layth bin Saad ne Nafi se byaan kiya ke Abdullah bin Umar razi Allahu anhuma se agar aise shakhs ka masla poocha jata jis ne apni biwi ko teen talaq di hoti , to woh kehte agar tu ek baar ya do baar talaq deta to ruju kar sakta tha kyunke Nabi Karim salla Allahu alaihi wasallam ne mujhko aisa hi hukm diya tha lekin jab tu ne teen talaq de di to woh aurat ab tujh par haram ho gayi yahan tak ke woh tere siwa aur kisi shakhs se nikah kare .

Hum se Yahya bin Bukayr ne byaan kiya, kaha hum se Layth bin Saad ne byaan kiya, kaha ke mujh se Aqeel ne byaan kiya, un se Ibn Shihab ne byaan kiya, kaha mujh ko Salim ne khabar di aur unhein Abdullah bin Umar razi Allahu anhuma ne khabar di ke unhon ne apni biwi Aaminah bint Ghaffar ko jabke woh haiza thien talaq de di. Umar razi Allahu anhu ne Rasool Allah salla Allahu alaihi wasallam se is ka zikr kiya. Aap is par bahut ghussa huay aur farmaya ke woh un se (apni biwi se) ruju kar lein aur apne nikah mein rakhein yahan tak ke woh mahwari se paak ho jaye phir mahwari aaye aur phir woh is se paak ho, ab agar woh talaq dena munasib samjhein to is ki paaki (tuhr) ke zamana mein un ke saath hum-bistari se pehle talaq de sakte hain bas yahi woh waqt hai jis mein Allah Ta'ala ne (mardon ko) hukm kiya hai ke is mein yani halat e tuhr mein talaq dein.

Hum se Umar bin Hafs bin Ghiyas ne byaan kiya , kaha hum se hamare walid ne byaan kiya , kaha hum se Aamash ne byaan kiya , kaha hum se Muslim bin Sabeeh ne byaan kiya , un se Masrooq ne aur un se Aisha razi Allahu anha ne byaan kiya ke Rasool Allah salla Allahu alaihi wasallam ne hamain ikhtiyar diya tha aur hum ne Allah aur us ke Rasool ko hi pasand kiya tha lekin is ka hamare haq mein koi shumar (talaq) mein nahi hua tha .