Hum se Qabisa bin Uqba ne bayan kiya , kaha hum se Sufyan Thauri ne Amr bin Aamir se bayan kiya , unhon ne Anas bin Malik raziyallahu anhu se , unhon ne kaha ke mein ne Nabi Karim salla Allahu alaihi wa sallam ke bare bare sahaba ridwan Allah alaihim ajmaeen ko dekha ke woh maghrib ki azan ke waqt sutonon ki taraf lapakte . Aur Shoba ne Amr bin Aamir se unhon ne Anas raziyallahu anhu se is hadees mein yeh zyadti ki hai . Yahan tak ke Nabi Karim salla Allahu alaihi wa sallam hijra se bahar tashreef late .

Hum se Muhammad bin Bashar ne bayan kiya , unhon ne kaha ke hum se Muhammad bin Jafar Ghundar ne bayan kiya , unhon ne kaha ke hum se Shoba bin Hajjaj ne bayan kiya , kaha ke mein ne Amr bin Aamir Ansari se suna , woh Anas bin Malik raziyallahu anhu se bayan karte thay ke aap ne farmaya ke ehd risalat mein jab moazzin azan deta to Nabi Karim salla Allahu alaihi wa sallam ke sahaba sutonon ki taraf lapakte . Jab Nabi Karim salla Allahu alaihi wa sallam apne hijra se bahar tashreef late to log isi tarah namaz parhte hue milte . Yeh jamaat maghrib se pehle ki do rakaten thin . Aur maghrib mein azan aur takbeer mein koi zyada fasla nahi hota tha . Aur Usman bin Jabla aur Abu Dawood Tayalisi ne Shoba se is hadees mein yun naql kiya hai ke azan aur takbeer mein bohot thora sa fasla hota tha .