Hum se Adam bin Abi Iyas ne byaan kiya , kaha hum se Shubah ne byaan kiya , un se Aamash ne byaan kiya , kaha ke main ne Saad bin Ubaydah se suna , un se Abu Abdur Rahman Salmi byaan karte thay ke Ali razi Allahu anhu ne byaan kiya ke Nabi Karim salla Allahu alaihi wasallam ek janaze mein tashreef rakhte thay . Phir Aap salla Allahu alaihi wasallam ne ek cheez li aur is se zameen kureedne lage aur farmaya , tum mein koi aisa shakhs nahi jis ka jahannum ka thikana ya jannat ka thikana likha na ja chuka ho . Sahabah ne arz kiya ke ya Rasool Allah! To phir hum kyun apni taqdeer par bharosa na kar lein aur naik amal karna chhor dein . Nabi Karim salla Allahu alaihi wasallam ne farmaya ke naik amal karo , har shakhs ko in aamal ki taufiq di jati hai jin ke liye woh paida kiya gaya hai jo shakhs naik ho ga usay naikiyon ke amal ki taufiq mili hoti hai aur jo bad-bakht hota hai usay bad-bakhton ke amal ki taufiq milti hai phir Aap salla Allahu alaihi wasallam ne aayat «fa-amma man aata wattaqa * wa saddaqa bil-husna» aakhir tak parhi yani ”so jis ne diya aur Allah se dara aur achhi baat ko sacha samjha , so hum is ke liye naik amalon ko aasan kar dein ge .“

Hum se Uthman bin Abi Shaybah ne byaan kiya ‘ unhon ne kaha ke mujh se Jarir ne byaan kiya ‘ un se Mansoor bin Mutamir ne byaan kiya ‘ un se Saad bin Ubaydah ne ‘ un se Abu Abdur Rahman Abdullah bin Habib ne aur un se Ali razi Allahu anhu ne byaan kiya ke hum Baqi al-Gharqad mein ek janaza ke saath thay . Itne mein Rasool Allah salla Allahu alaihi wasallam tashreef laaye aur baith gaye . Hum bhi Aap salla Allahu alaihi wasallam ke ardgard baith gaye . Aap salla Allahu alaihi wasallam ke paas ek chhari thi jis se Aap salla Allahu alaihi wasallam zameen kureedne lage . Phir Aap salla Allahu alaihi wasallam ne farmaya ke tum mein se koi aisa nahin ya koi jaan aisi nahin jis ka thikana Jannat aur Dozakh donon jagah na likkha gaya ho aur yeh bhi ke woh nek bakht ho gi ya badbakht . Is par ek sahabi ne arz kiya ya Rasool Allah salla Allahu alaihi wasallam! phir kyon na hum apni taqdeer par bharosa kar lein aur amal chhor dein kyonke jis ka naam nek daftar mein likkha hai woh zaroor nek kaam ki taraf ruju ho ga aur jis ka naam badbakhtoon mein likkha hai woh zaroor badi ki taraf jaye ga . Nabi Karim salla Allahu alaihi wasallam ne farmaya ke baat yeh hai ke jin ka naam nek bakhtoon mein hai un ko achhe kaam karne mein hi aasani maloom hoti hai aur badbakhtoon ko bure kaamon mein aasani nazar aati hai . Phir Aap salla Allahu alaihi wasallam ne is aayat ki tilawat ki «fa amma man ata wat-taqa...»

Hum se Abu Naeem ne byaan kiya , kaha hum se Sufyan bin Uyaynah ne byaan kiya , un se Aamash ne , un se Saad bin Ubaydah ne , un se Abu Abdur Rahman Salmi ne aur un se Ali razi Allahu anhu ne byaan kiya ke hum Nabi Karim salla Allahu alaihi wasallam ke saath Baqee-ul-Gharqad (Madinah Munawwarah ke qabristan) mein ek janaza mein thay . Nabi Karim salla Allahu alaihi wasallam ne is mauqa par farmaya ke tum mein koi aisa nahi jis ka thikana jannat ya jahannum mein likha na ja chuka ho . Sahabah ne arz kiya: ya Rasool Allah! Phir kyun na hum apni taqdeer par bharosa kar lein . Nabi Karim salla Allahu alaihi wasallam ne farmaya ke amal karte raho ke har shakhs ko isi amal ki taufiq milti rehti hai (jis ke liye woh paida kiya gaya hai) phir Aap salla Allahu alaihi wasallam ne aayat «fa-amma man aata wattaqa * wa saddaqa bil-husna» aakhir tak parhi . Yani hum is ke liye naik kaam aasan kar dein ge .

Hum se Bishr bin Khalid ne byaan kiya , kaha hum ko Muhammad bin Jafar ne khabar di , kaha hum se Shubah ne byaan kiya , un se Sulayman Aamash ne , un se Saad bin Ubaydah ne , un se Abu Abdur Rahman Salmi ne aur un se Ali razi Allahu anhu ne ke Nabi Karim salla Allahu alaihi wasallam ek janaza mein thay , Aap ne ek lakri uthayi aur is se zameen kureedte huay farmaya ke tum mein koi shakhs aisa nahi jis ka jannat ya dozakh ka thikana likha na ja chuka ho . Sahabah ne arz kiya: ya Rasool Allah! Kya phir hum isi par bharosa na kar lein ? Nabi Karim salla Allahu alaihi wasallam ne farmaya ke amal karte raho ke har shakhs ko taufiq di gayi hai (unhi aamal ki jin ke liye woh paida kiya gaya hai) «fa-amma man aata wattaqa * wa saddaqa bil-husna» ”so jis ne diya aur Allah se dara aur achhi baat ko sacha samjha“ aakhir aayat tak . Shubah ne byaan kiya ke mujh se yeh hadees Mansoor bin Mutamir ne bhi byaan ki aur unhon ne bhi Sulayman Aamash se isi ke muwafiq byaan ki , is mein koi khilaf nahi kiya .

Hum se Yahya bin Musa Balkhi ne byaan kiya , kaha hum se Waki ne byaan kiya , un se Aamash ne , un se Saad bin Ubaydah ne , un se Abu Abdur Rahman Salmi ne aur un se Ali razi Allahu anhu ne byaan kiya ke hum Nabi Karim salla Allahu alaihi wasallam ke paas baithe huay thay . Aap salla Allahu alaihi wasallam ne farmaya ke hum mein koi aisa nahi jis ka jahannum ka thikana aur jannat ka thikana likha na ja chuka ho . Hum ne arz kiya: ya Rasool Allah! Phir hum isi par bharosa kyun na kar lein ? Farmaya nahi amal karte raho kyunke har shakhs ko aasani di gayi hai aur is ke baad Aap ne is aayat ki tilawat ki «fa-amma man aata wattaqa * wa saddaqa bil-husna * fasanu-yassiru-hu lil-yusra» yani ”so jis ne diya aur Allah se dara aur achhi baat ko sacha samjha is ke liye rahat ki cheez aasan kar dein ge .“ Ta «fasanu-yassiru-hu lil-usra» .

Hum se Usman bin Abi Shaybah ne byaan kiya , unhon ne kaha hum se Jareer bin Abdul Hameed ne byaan kiya , un se Mansoor ne , un se Saad bin Ubaydah ne byaan kiya , un se Abu Abdur Rahman Salmi ne byaan kiya , aur un se Ali razi Allahu anhu ne byaan kiya ke hum Baqee-ul-Gharqad mein ek janaza ke saath thay . Phir Rasool Allah salla Allahu alaihi wasallam bhi tashreef laye . Aap baith gaye aur hum bhi Aap ke charon taraf baith gaye . Aap ke hath mein chhari thi . Aap ne sar jhuka liya phir chhari se zameen ko kureedne lage . Phir farmaya ke tum mein koi shakhs aisa nahi , koi paida hone wali jaan aaisi nahi jis ka jannat aur jahannum ka thikana likha na ja chuka ho . Yeh likha ja chuka hai ke kaun naik hai aur kaun bura hai . Ek sahab ne arz kiya: ya Rasool Allah! Phir kya haraj hai agar hum apni isi taqdeer par bharosa kar lein aur naik amal karna chhor dein jo hum mein naik ho ga , woh naikiyon ke saath ja mile ga aur jo bura ho ga is se buron ke se aamal ho jayein ge . Nabi Karim salla Allahu alaihi wasallam ne farmaya ke jo log naik hote hain unhein naikiyon hi ke amal ki taufiq haasil hoti hai aur jo bure hote hain unhein buron hi jaise amal karne ki taufiq hoti hai . Phir Aap salla Allahu alaihi wasallam ne is aayat ki tilawat ki «fa-amma man aata wattaqa * wa saddaqa bil-husna» yani ”so jis ne diya aur Allah se dara aur achhi baat ko sacha samjha so hum is ke liye naik kaamon ko aasan kar dein ge .“

Hum se Muhammad bin Bashar ne bayan kiya kaha hamase Ibn Abi Adi ne bayan kiya, in se Shubah ne, in se Sulayman wa Mansoor ne, in se Saad bin Ubaidah ne in se Abu Abd-ur-Rahman Salmi ne aur in se Ali razi Allahu anhu ne bayan kiya ke Nabi Karim salla Allahu alaihi wasallam ke saath ek janaza mein shareek thay. Nabi Karim salla Allahu alaihi wasallam ke hath mein ek chhari ku usay Aap zameen par maar rahe thay phir Aap salla Allahu alaihi wasallam ne farmaya ke tum mein koi aisa nahi hai jis ka jannat ya dozakh ka thikana tay na ho chuka ho. Sahabah ne arz kiya: phir kyun na hum is par bharosa kar lein. Nabi Karim salla Allahu alaihi wasallam ne farmaya ke amal karte raho kyunke har shakhs jis thikane ke liye paida kiya gaya hai us ko waisi hi taufiq di jaye gi. Jaisa ke Quran Shareef ke Surah al-Lail mein hai «fa-ammaa man ata wattaqaa» ”jis ne lillah khairat ki aur Allah Ta'ala se dara“ aakhir tak.

Hum se Adam bin Abi Iyas ne bayan kiya , kaha hum se Shubah ne bayan kiya , kaha hum se Yazid Rishk ne bayan kiya , unhon ne Mutarrif bin Abdullah bin Shikh-kheer se suna , woh Imran bin Husain razi Allahu anhuma se bayan karte thay , unhon ne kaha ke ek sahab ne (yani khud unhon ne) arz kiya: ya Rasool Allah! Kya jannat ke log jahannumiyon mein se pehchane ja chuke hain . Nabi Karim salla Allahu alaihi wasallam ne farmaya ”haan“ unhon ne kaha ke phir amal karne wale kyun amal karein ? Nabi Karim salla Allahu alaihi wasallam ne farmaya ke har shakhs wahi amal karta hai jis ke liye woh paida kiya gaya hai ya jis ke liye usay sahoolat di gayi hai .

Hum se Abdan ne bayan kiya , in se Abu Hamza ne , in se Aamash ne , in se Saad bin Ubaidah ne , in se Abu Abd-ur-Rahman Salmi ne aur in se Ali razi Allahu anhu ne bayan kiya ke hum Nabi Karim salla Allahu alaihi wasallam ke saath baithe huay thay aur Nabi Karim salla Allahu alaihi wasallam ke hath mein ek lakri thi jis se Aap zameen kureed rahe thay aur Aap salla Allahu alaihi wasallam ne (isi asna mein) farmaya ke tum mein se har shakhs ka jahannum ka ya jannat ka thikana likha ja chuka hai , ek Musalman ne is par arz kiya: ya Rasool Allah! Phir kyun na hum is par bharosa kar lein ? Nabi Karim salla Allahu alaihi wasallam ne farmaya ke nahi amal karo kyunke har shakhs (apni taqdeer ke mutabiq) amal ki aasani paata hai . Phir Aap salla Allahu alaihi wasallam ne is aayat ki tilawat ki «fa-ammaa man aataa wattaqaa» al-aayah pas jis ne raah e lillah diya aur taqwa ikhtiyar kiya ... alkh .

Hum se Abu Mamar ne bayan kiya , kaha hamase Abd-ul-Waris ne , in se Yazid ne ke mujh se Mutarrif bin Abdullah ne bayan kiya , in se Imran razi Allahu anhune ke main ne kaha ya Rasool Allah! phir amal karne wale kis liye amal karte hain ? Nabi kareem salla Allahu alaihi wasallam ne farmaya ke har shakhs ke liye is amal mein aasani paida kar di gayi hai jis ke liye woh paida kiya gaya hai .

Mujh se Muhammad bin Bashar ne bayan kiya , kaha hamase Ghundar ne bayan kiya , in se Shubah ne bayan kiya , in se Mansoor aur Aamash ne , unhon ne Saad bin Ubaidah se suna , unhon ne Abu Abd-ul-Rahman Aslami se aur unhon ne Ali razi Allahu anhune ke Nabi Karim salla Allahu alaihi wasallam ek janaze mein thay phir Aap ne ek lakri li aur is se zameen kureidne lage . Phir farmayatum mein koi aisa nahi jis ka thikana jahannum mein ya jannat mein likha na ja chuka ho . Sahabah ne kaha: phir hum isi par bharosa na kar lein ? Nabi Karim salla Allahu alaihi wasallam ne farmaya ke har shakhs ke liye is amal mein aasani paida kar di gayi jis ke liye woh paida kiya gaya hai . Phir Aap salla Allahu alaihi wasallam ne yeh aayat parhi «fa-am-maa man aataa wat-taqaa» ke ”jis shakhs ne bakhshish ki aur taqwa ikhtiyar kiya“ aakhir aayat tak .