Hum se Abu Naeem ne byaan kiya, kaha hum se Sufyan ne Abd bin Khalid se byaan kiya, kaha ke main ne Harisa bin Wahb Khuzai razi Allahu anhu se suna, unhon ne byaan kiya ke main ne Nabi Karim salla Allahu alaihi wasallam se suna, Aap salla Allahu alaihi wasallam farma rahe thay ke main tumhein bahisht-i aadmi ke mutalliq na bata doon. Woh dekhne mein kamzor natawan hota hai (lekin Allah ke yahan is ka martaba yeh hai ke) agar kisi baat par Allah ki qasam kha le to Allah usay zaroor poori kar deta hai aur kya main tumhein dozakh walon ke mutalliq na bata doon har bad-kho, bhaari jism wala aur takabbur karne wala.

Aur Muhammad bin Esa ne bayan kiya ke hum se Hushaim ne bayan kiya, kaha hum ko Humayd Taweel ne khabar di, kaha hum se Anas bin Malik ne ke Rasool Allah salla Allahu alaihi wasallam ke akhlaq e fazila ka yeh haal tha ke ek londi Madinah ki londiyon mein se Aap ka hath pakar leti aur apne kisi bhi kaam ke liye jahan chahti Aap ko le jati thi.

Hum se Abdullah bin Muhammad ne bayan kiya, kaha hum se Abd-ul-Samad bin Abd-ul-Waris ne, kaha ke mujh se mere walid ne bayan kiya, kaha ke mujh se Yahya bin Abi Ishaq ne, kaha ke mujh se Salim bin Abdullah ne poochha ke «istabraq» kya cheez hai? Main ne kaha ke deeba se bana hua dabeez aur khurdara kapra phir unhon ne bayan kiya ke main ne Abdullah bin Umar razi Allahu anhuma se suna, unhon ne bayan kiya ke Umar razi Allahu anhu ne ek shakhs ko istabraq ka jora pehne huay dekha to Nabi Karim salla Allahu alaihi wasallam ki khidmat mein usay le kar hazir huay aur arz kiya ke ya Rasool Allah! Isay Aap khareed lein aur wafd jab Aap se mulaqat ke liye aayein to in ki mulaqat ke waqt usay pehan liya karein. Nabi Karim salla Allahu alaihi wasallam ne farmaya ke resham to wahi pehan sakta hai jis ka (aakhirat mein) koi hissa na ho khair is baat par ek muddat guzar gayi phir aisa hua ke ek din Nabi Karim salla Allahu alaihi wasallam ne khud unhein ek jora bheja to woh usay le kar Nabi Karim salla Allahu alaihi wasallam ki khidmat mein hazir huay aur arz kiya Aap ne yeh jora mere liye bheja hai, haalan ke is ke baare mein Aap is se pehle aisa irshad farma chuke hain? Nabi Karim salla Allahu alaihi wasallam ne farmaya ke yeh main ne tumhare paas is liye bheja hai taake tum is ke zariye (bech kar) maal haasil karo. Chunanche Ibn Umar razi Allahu anhuma isi hadees ki wajah se kapre mein (resham ke) bail-bouton ko bhi makrooh jaante thay.

Hum se Muhammad bin Musanna ne bayan kiya , kaha mujh se Ghundar ne bayan kiya , kaha hum se Shubah ne bayan kiya , in se Ma'bad bin Khalid ne , kaha main ne Harisa bin Wahb se suna , kaha main ne Nabi Karim salla Allahu alaihi wasallam se suna , Aap salla Allahu alaihi wasallam farmate thay ke main tum ko batlaoon bahishti kaun log hain , har ek ghareeb natewan jo agar Allah ke bharose par qasam kha baithe to Allah us ko sacha kare (is ki qasam poori kar de) aur dozakhi kaun log hain har ek mota , laraka , maghroor , fasadi .