Aur Mujahid ne kaha ke (Surah al-Hajr mein) «saaniya itfihi» se maghroor murad hai. «itfuhu» yani ghumand se gardan morne wala.

Hum se Muhammad bin Kaseer ne bayan kiya, unhon ne kaha hum ko Sufyan bin Uyaynah ne khabar di, unhon ne kaha hum se Ma'bad bin Khalid Qaysi ne bayan kiya, in se Harisa bin Wahb Khuza'i razi Allahu anhu ne bayan kiya Nabi Karim salla Allahu alaihi wasallam ne farmaya kya main tumhein jannat walon ki khabar na doon. Har kamzor wa tawazo karne wala agar woh (Allah ka naam le kar) qasam kha le to Allah is ki qasam poori kar de. Kya main tumhein dozakh walon ki khabar na doon har tund-kho, akar kar chalne wala aur mutakabbir.

Aur Muhammad bin Esa ne bayan kiya ke hum se Hushaim ne bayan kiya, kaha hum ko Humayd Taweel ne khabar di, kaha hum se Anas bin Malik ne ke Rasool Allah salla Allahu alaihi wasallam ke akhlaq e fazila ka yeh haal tha ke ek londi Madinah ki londiyon mein se Aap ka hath pakar leti aur apne kisi bhi kaam ke liye jahan chahti Aap ko le jati thi.