Hum se Qutaybah bin Saeed ne byaan kiya , kaha hum se Jareer ne byaan kiya , un se Aamash ne , un se Abu al-Duha ne , un se Masrooq ne ke hum Abdullah bin Masood razi Allahu anhu ki khidmat mein hazir huay . Unhon ne kaha: Ae logo! Jis shakhs ko kisi cheez ka ilm ho to woh usay byaan kare agar ilm na ho to kahe ke Allah hi ko zyada ilm hai kyunke yeh bhi ilm hi hai ke jo cheez na jaanta ho is ke mutalliq keh de ke Allah hi zyada janne wala hai . Allah Ta'ala ne apne Nabi salla Allahu alaihi wasallam se bhi keh diya tha «qul ma as'alukum alayhi min ajrin wa ma ana minal mutakallifeena» ke ”Aap keh dijiye ke main tum se is Quran ya tableegh e wahi par koi ujrat nahi chahta hoon aur na main banawat karne wala hoon .“ Aur main «dukhanun» (dhuwein) ke baare mein bataoon ga (jis ka zikr Quran mein aaya hai) Rasool Allah salla Allahu alaihi wasallam ne Quraysh ko Islam ki dawat di to unhon ne takheer ki , Nabi Karim salla Allahu alaihi wasallam ne un ke haq mein bad-dua ki «allahumma a'inni alayhim bi-sab-in ka-sab-i Yusufa» ”Ae Allah! In par Yusuf alaihissalam ke zamana ki si qaht-saali ke zariye meri madad kar .“ Chunanche qaht para aur itna zabardast ke har cheez khatam ho gayi aur log murdaar aur chamre khane par majboor ho gaye . Bhook ki shiddat ki wajah se yeh haal tha ke aasman ki taraf dhuwaan hi dhuwaan nazar aata . Isi ke baare mein Allah Ta'ala ne farmaya «fartaqib yawma ta'tis-sama'u bi-dukhaanim mubeenin * yaghshan-naasa hazha azhaabun aleemun» ke ”pas intizar karo is din ka jab aasman khula hua dhuwaan laye ga jo logon par chha jaye ga yeh dard-naak azab hai .“ Byaan kiya ke phir Quraysh dua karne lage «rabbanakshif annal azhaaba inna mu'minoona * anna lahumuzh-zhikra wa qad ja'ahum rasoolum mubeenun * summa tawallaw anhu wa qaaloo muallamum majnoonun * inna kaashiful azhaabi qaleelan innakum aa'idoona» ke ”Ae hamare Rabb! Is azab ko hamase hata le to hum iman layein ge lekin woh nasihat sunne wale kahan hain un ke paas to Rasool saaf mujizaat o dalail ke saath aa chuka aur woh is se munh morr chuke hain aur keh chuke hain ke isay to sikhaya ja raha hai , yeh majnoon hai , beshak hum thore dinon ke liye un se azab hata lein ge yaqeenan tum phir kufr hi ki taraf laut jao ge kya Qayamat mein bhi azab hataya jaye ga .“ Ibn Masood razi Allahu anhu ne byaan kiya ke phir yeh azab to un se door kar diya gaya lekin jab woh dobara kufr mein mubtala ho gaye to Jang e Badr mein Allah ne unhein pakra . Allah Ta'ala ke is irshad mein isi taraf isharah hai «yawma nab-tishul bat-shatal kubra inna muntaqimoona» ke ”jis din hum sakht pakar karein ge , bilashubha hum badla lene wale hain .“

Hum se Imam Humaidi ne byaan kiya , kaha ke hum se Sufyan Thauri ne byaan kiya , in se Sulayman A'mash ne , in se Abu al-Duha ne , in se Masrooq ne , in se Abdullah bin Masood ne (doosri sanad) hum se Uthman bin Abi Shaybah ne byaan kiya , kaha ke hum se Jarir bin Abdul Hameed ne Mansoor bin Masood bin Mutamar se byaan kiya , aur in se Abu al-Duha ne , in se Masrooq ne , unhon ne byaan kiya ke hum Abdullah bin Masood razi Allahu anhu ki khidmat mein baithe hue thay . Aap ne farmaya ke Nabi Karim salla Allahu alaihi wasallam ne jab kuffar-e-Quraish ki sarkashi dekhi to Aap salla Allahu alaihi wasallam ne bad-dua ki «Allahumma sab'an kasab'i Yusuf» ke ay Allah! saat baras ka qahet in par bhej jaise Yusuf alaihissalam ke waqt mein bheja tha chunanche aisa qahet para ke har cheez tabah ho gayi aur logun ne chamre aur murdar tak kha liye . Bhook ki shiddat ka yeh aalam tha ke aasman ki taraf nazar uthayi jati to dhowein ki tarah maloom hota tha aakhir majboor ho kar Abu Sufyan hazir-e-khidmat hue aur arz kiya ke ay Muhammad (salla Allahu alaihi wasallam)! Aap logun ko Allah ki itaat aur sila rehmi ka hukm dete hain . Ab to Aap hi ki qaum barbad ho rahi hai , is liye Aap Allah se in ke haq mein dua kijiye . Allah Ta'ala ne farmaya ke us din ka intezar kar jab aasman saaf dhowan nazar aayega aayat «innakum aa'idoon» tak (neez) jab hum sakhti se in ki girift karein ge (kuffar ki) sakht girift Badr ki larayi mein hui . Dhowein ka bhi muamla guzar chuka (jab sakht qahet para tha) jis mein pakar aur qaid ka zikr hai woh sab ho chuke isi tarah Surah Al-Room ki aayat mein jo zikr hai woh bhi ho chuka .

Hum se Amr bin Ali ne byaan kiya , unhon ne kaha ke hum se Abu Qutaybah ne byaan kiya , kaha ke hum se Abdur Rahman bin Abdullah bin Dinar ne , in se in ke waalid ne , kaha ke main ne Ibn Umar razi Allahu anhuma ko Abu Talib ka yeh shair parhte suna tha (tarjama) gora un ka rang in ke munh ke waasta se barish ki (Allah se) dua ki jati hai . Yateemon ki panah aur bewauon ke sahare .“

Hum se Abdullah bin Zubayr Humaydi ne byaan kiya , kaha hum se Sufyan bin Uyaynah ne byaan kiya , un se Aamash ne , un se Muslim ne , un se Masrooq ne aur un se Abdullah bin Masood razi Allahu anhu ne ke Quraysh ne jab Rasool Allah salla Allahu alaihi wasallam par iman laane mein takheer ki to Aap ne un ke haq mein bad-dua ki ke Ae Allah! In par Yusuf alaihissalam ke zamana ka sa qaht nazil farma . Chunanche aisa qaht para ke koi cheez nahi milti thi aur woh hadiyon ke khane par majboor ho gaye thay . Logon ki is waqt yeh kaifiyat thi ke aasman ki taraf nazar utha ke dekhte thay to bhook o pyaas ki shiddat se dhuwaan sa nazar aata tha . Allah Ta'ala ne farmaya «fartaqib yawma ta'tis-sama'u bi-dukhaanim mubeenin» ”to Aap intizar kijiye is roz ka jab aasman ki taraf ek nazar aane wala dhuwaan paida ho .“ Aur farmaya «inna kaashiful azhaabi qaleelan innakum aa'idoona» ”beshak hum is azab ko hata lein ge aur tum bhi (apni pehli halat par) laut aao ge .“ Ibn Masood razi Allahu anhu ne kaha ke azab se yahi qaht ka azab murad hai kyunke aakhirat ka azab kafiron se talne wala nahi hai .

Hum se Muhammad bin Kaseer ne byaan kiya , kaha hum se Sufyan Sawri ne byaan kiya , kaha hum se Mansoor aur Aamash ne byaan kiya , un se Abu al-Duha ne , un se Masrooq ne byaan kiya ke ek shakhs ne qabila Kinda mein waaz byaan karte huay kaha ke Qayamat ke din ek dhuwaan uthe ga jis se munafiqon ke aankh kaan bilkul bekar ho jayein ge lekin momin par is ka asar sirf zukam jaisa ho ga . Hum is ki baat se bahut ghabra gaye . Phir main Ibn Masood razi Allahu anhu ki khidmat mein hazir hua (aur unhein in sahab ki yeh baat sunayi) woh is waqt taik lagaye baithe thay , usay sun kar bahut ghussa huay aur seedhe baith gaye . Phir farmaya ke agar kisi ko kisi baat ka waqayi ilm hai to phir usay byaan karna chahiye lekin agar ilm nahi hai to keh dena chahiye ke Allah zyada janne wala hai . Yeh bhi ilm hi hai ke aadmi apni la-ilmi ka iqrar kar le aur saaf keh de ke main nahi jaanta . Allah Ta'ala ne apne Nabi Karim salla Allahu alaihi wasallam se farmaya tha «qul ma as'alukum alayhi min ajrin wa ma ana minal mutakallifeena» ”Aap keh dijiye ke main apni tableegh o dawat par tum se koi ajr nahi chahta aur na main banawat karta hoon .“ Asal mein waqia yeh hai ke Quraysh kisi tarah Islam nahi laate thay . Is liye Nabi Karim salla Allahu alaihi wasallam ne un ke haq mein bad-dua ki ke Ae Allah! In par Yusuf alaihissalam ke zamane jaisa qaht bhej kar meri madad kar phir aisa qaht para ke log tabah ho gaye aur murdaar aur hadiyan khane lage koi agar faza mein dekhta (to faqa ki wajah se) usay dhuwein jaisa nazar aata . Phir Abu Sufyan aaye aur kaha ke Ae Muhammad! Aap hamain sila rahmi ka hukm dete hain lekin Aap ki qaum tabah ho rahi hai , Allah se dua kijiye (ke un ki yeh museebat door ho) . Is par Nabi Karim salla Allahu alaihi wasallam ne yeh aayat parhi «fartaqib yawma ta'tis-sama'u bi-dukhaanim mubeenin» se «aa'idoona» tak . Ibn Masood razi Allahu anhu ne byaan kiya ke qaht ka yeh azab to Nabi Karim salla Allahu alaihi wasallam ki dua ke nateeja mein khatam ho gaya tha lekin kya aakhirat ka azab bhi un se tal jaye ga ? Chunanche qaht khatam hone के baad phir woh kufr se baaz na aaye , is ki taraf isharah «yawma nab-tishul bat-shatal kubra» mein hai , yeh bat-sha kuffar par Ghazwa Badr ke mauqa par nazil hui thi (ke un ke bare bare sardar qatl kar diye gaye) aur «lizaaman» (qaid) se isharah bhi ma'arka Badr hi ki taraf hai «alif-laam-meem * ghulibatir-roomu» se «sa-yaghliboona» tak ka waqia guzar chuka hai ke (ke Room walon ne Faaris walon par fatah paali thi) .

Hum se Yahya ne byaan kiya , kaha hum se Abu Muawiyah ne byaan kiya , un se Aamash ne , un se Muslim ne , un se Masrooq ne byaan kiya aur un se Abdullah bin Masood razi Allahu anhu ne byaan kiya ke yeh (qaht) is liye para tha ke Quraysh jab Rasool Allah salla Allahu alaihi wasallam ki dawat qabool karne ki bajaye shirk par jame rahe to Aap salla Allahu alaihi wasallam ne un ke liye aise qaht ki bad-dua ki jaisa Yusuf alaihissalam ke zamana mein para tha . Chunanche qaht ki naubat yahan tak pahunchi ke log hadiyan tak khane lage . Log aasman ki taraf nazar uthate lekin bhook aur faqa ki shiddat ki wajah se dhuwein ke siwa aur kuch nazar na aata isi ke mutalliq Allah Ta'ala ne yeh aayat nazil ki «fartaqib yawma ta'tis-sama'u bi-dukhaanim mubeenin * yaghshan-naasa hazha azhaabun aleemun» ”to Aap intizar karein is roz ka jab aasman ki taraf nazar aane wala dhuwaan paida ho jo logon par chha jaye , yeh ek dard-naak azab ho ga .“ Byaan kiya ke phir ek sahab Nabi Karim salla Allahu alaihi wasallam ki khidmat mein hazir huay aur arz ki ya Rasool Allah! Qabila Mudar ke liye barish ki dua kijiye ke woh barbad ho chuke hain . Nabi Karim salla Allahu alaihi wasallam ne farmaya ke Mudar ke haq mein dua karne ke liye kehte ho , tum bare jari ho . Aakhir Nabi Karim salla Allahu alaihi wasallam ne un ke liye dua farmayi aur barish hui . Is par aayat «innakum aa'idoona» nazil hui (yani agarchay tum ne iman ka waada kiya hai lekin tum kufr ki taraf phir laut jao ge) chunanche jab phir un mein khush-haali hui to shirk ki taraf laut gaye (aur apne iman ke waade ko bhula diya) is par Allah Ta'ala ne yeh aayat nazil ki «yawma nab-tishul bat-shatal kubra inna muntaqimoona» ”jis roz hum bari sakht pakar pakrein ge (is roz) hum poora badla le lein ge .“ Byaan kiya is aayat se murad Badr ki larayi hai .

Hum se Yahya ne byaan kiya , kaha hum se Waki ne byaan kiya , in se Aamash ne , un se Abu al-Duha ne , un se Masrooq ne byaan kiya ke main Abdullah bin Masood razi Allahu anhu ki khidmat mein hazir hua . Unhon ne kaha ke yeh bhi ilm hi hai ke tumhein agar koi baat maloom nahi hai to is ke mutalliq yun keh do ke Allah hi zyada janne wala hai . Allah Ta'ala ne apne Nabi salla Allahu alaihi wasallam se farmaya ke Aap apni qaum se keh dein ke main tum se kisi ujrat ka talib nahi hoon aur na main banawati baatein karta hoon jab Quraysh Aap salla Allahu alaihi wasallam ko takleef pahunchane aur Aap ke saath muanidana rawish mein barabar barhte hi rahe to Aap salla Allahu alaihi wasallam ne un ke liye bad-dua ki ke Ae Allah! In ke khilaf meri madad aise qaht ke zariye kar jaisa ke Yusuf alaihissalam ke zamana mein para tha . Chunanche qaht para aur bhook ki shiddat ka yeh haal hua ke log hadiyan aur murdaar khane lag gaye . Log aasman ki taraf dekhte thay lekin faqa ki wajah se dhuwein ke siwa aur kuch nazar na aata . Aakhir unhon ne kaha ke ”Ae hamare Parvardigar! Hamain se is azab ko door kar , hum zaroor iman le aayein ge . Lekin Allah Ta'ala ne un se keh diya tha ke agar hum ne yeh azab door kar diya to phir bhi tum apni pehli halat par laut aao ge .“ Nabi Karim salla Allahu alaihi wasallam ne un ke haq mein dua ki aur yeh azab un se hat gaya lekin woh phir bhi kufr o shirk par hi jame rahe , is ka badla Allah Ta'ala ne Badr ki larayi mein liya . Yahi waqia aayat «yawma ta'tis-sama'u bi-dukhaanim mubeenin» aakhir tak mein byaan hua hai .

Se Sulayman bin Harb ne byaan kiya , kaha hum se Jareer bin Hazim ne byaan kiya , un se Aamash ne , un se Abu al-Duha ne aur un se Masrooq ne byaan kiya ke main Abdullah bin Masood razi Allahu anhu ki khidmat mein hazir hua . Unhon ne farmaya ke jab Nabi Karim salla Allahu alaihi wasallam ne Quraysh ko Islam ki dawat di to unhon ne Aap salla Allahu alaihi wasallam ko jhutlaya aur Aap ke saath sarkashi ki . Nabi Karim salla Allahu alaihi wasallam ne un ke liye bad-dua ki ke Ae Allah! Meri in ke khilaf Yusuf alaihissalam jaise qaht ke zariye madad farma . Chunanche qaht para aur har cheez khatam ho gayi . Log murdaar khane lage . Koi shakhs khara ho kar aasman ki taraf dekhta to bhook aur faqa ki wajah se aasman aur is ke darmiyan dhuwaan hi dhuwaan nazar aata . Phir Aap ne is aayat ki tilawat shuru ki «fartaqib yawma ta'tis-sama'u bi-dukhaanim mubeenin * yaghshan-naasa hazha azhaabun aleemun» ”to Aap intizar karein is roz ka jab aasman ki taraf se nazar aane wala ek dhuwaan paida ho jo logon par chha jaye , yeh ek dard-naak azab ho ga . Beshak hum chande is azab ko hata lein ge aur tum bhi apni pehli halat par laut aao ge .“ Abdullah bin Masood razi Allahu anhu ne farmaya ke kya Qayamat ke azab se bhi woh bach sakein ge ? Farmaya ke sakht pakar Badr ki larayi mein hui thi .

Hum se Bishr bin Khalid ne byaan kiya , kaha hum ko Muhammad ne khabar di , unhein Shubah ne , unhein Sulayman aur Mansoor ne , unhein Abu al-Duha ne aur un se Masrooq ne byaan kiya ke Abdullah bin Masood razi Allahu anhu ne kaha ke Allah Ta'ala ne Muhammad salla Allahu alaihi wasallam ko maboos kiya aur Aap salla Allahu alaihi wasallam ne farmaya «qul ma as'alukum alayhi min ajrin wa ma ana minal mutakallifeena» ke ”keh do ke main tum se kisi ajr ka talib nahi hoon aur na main banawati baatein karne walon mein se hoon .“ Phir jab Aap ne dekha ke Quraysh inad se baaz nahi aate to Aap salla Allahu alaihi wasallam ne un ke haq mein bad-dua ki ke ”Ae Allah! In ke khilaf meri madad aise qaht se kar jaisa Yusuf alaihissalam ke zamana mein para tha .“ (phir) qaht para aur har cheez khatam ho gayi . Log hadiyan aur chamre khane par majboor ho gaye (Sulayman aur Mansoor) rawiyaan e hadees mein se ek ne byaan kiya ke woh chamre aur murdaar khane par majboor ho gaye aur zameen se dhuwaan sa nikalne laga . Aakhir Abu Sufyan aaye aur kaha ke Ae Muhammad salla Allahu alaihi wasallam! Aap ki qaum halak ho chuki , Allah se dua kijiye ke un se qaht ko door kar de . Nabi Karim salla Allahu alaihi wasallam ne dua farmayi aur qaht khatam ho gaya . Lekin is ke baad woh phir kufr ki taraf laut gaye . Mansoor ki riwayat mein hai ke phir Aap salla Allahu alaihi wasallam ne yeh aayat parhi «fartaqib yawma ta'tis-sama'u bi-dukhaanim mubeenin» ”to Aap is roz ka intizar karein jab aasman ki taraf ek nazar aane wala dhuwaan paida ho .“ «aa'idoona» tak . Kya aakhirat ka azab bhi un se door ho sake ga ? ”dhuwaan“ aur ”sakht pakar“ aur ”halakat“ guzar chuke . Baaz ne ”chaand“ aur baaz ne ”ghalba e Room“ ka bhi zikr kiya hai ke yeh bhi guzar chuka hai .