Hum se Qutaybah bin Saeed ne byaan kiya unhon ne kaha ke hum se Mughirah bin Abdur Rahman ne byaan kiya , in se Abu al-Zinad ne byaan kiya , in se Aaraj ne byaan kiya , in se Abu Hurairah razi Allahu anhu ke Nabi Karim salla Allahu alaihi wasallam jab sar mubarak aakhri rakat (ke ruku) se uthate to yun farmate «Allahumma anji Ayyash bin Abi Rabia , Allahumma anji Salamah bin Hisham , Allahumma anji al-Waleed bin al-Waleed , Allahumma anji al-mustazafeen minal momineen , Allahumma ishdud wat-ataka ala Mudar , Allahumma ij'alha sineena kasinee Yusuf» ke ya Allah! Ayyash bin Abi Rabia ko najat de . Ya Allah! Salamah bin Hisham ko najat de . Ya Allah! Waleed bin Waleed ko najat de . Ya Allah! be-bas natawan musalmanon ko najat de . Ya Allah! Mudar ke kafiron ko sakht pakar . Ya Allah! in ke saal Yusuf alaihissalam ke se saal kar de . Aur Nabi Karim salla Allahu alaihi wasallam ne farmaya Ghiffar ki qaum ko Allah ne bakhsh diya aur Aslam ki qaum ko Allah ne salamat rakkha . Ibn Abi al-Zinad ne apne baap se subah ki namaaz mein yahi dua naqal ki .

Hum se Imam Humaidi ne byaan kiya , kaha ke hum se Sufyan Thauri ne byaan kiya , in se Sulayman A'mash ne , in se Abu al-Duha ne , in se Masrooq ne , in se Abdullah bin Masood ne (doosri sanad) hum se Uthman bin Abi Shaybah ne byaan kiya , kaha ke hum se Jarir bin Abdul Hameed ne Mansoor bin Masood bin Mutamar se byaan kiya , aur in se Abu al-Duha ne , in se Masrooq ne , unhon ne byaan kiya ke hum Abdullah bin Masood razi Allahu anhu ki khidmat mein baithe hue thay . Aap ne farmaya ke Nabi Karim salla Allahu alaihi wasallam ne jab kuffar-e-Quraish ki sarkashi dekhi to Aap salla Allahu alaihi wasallam ne bad-dua ki «Allahumma sab'an kasab'i Yusuf» ke ay Allah! saat baras ka qahet in par bhej jaise Yusuf alaihissalam ke waqt mein bheja tha chunanche aisa qahet para ke har cheez tabah ho gayi aur logun ne chamre aur murdar tak kha liye . Bhook ki shiddat ka yeh aalam tha ke aasman ki taraf nazar uthayi jati to dhowein ki tarah maloom hota tha aakhir majboor ho kar Abu Sufyan hazir-e-khidmat hue aur arz kiya ke ay Muhammad (salla Allahu alaihi wasallam)! Aap logun ko Allah ki itaat aur sila rehmi ka hukm dete hain . Ab to Aap hi ki qaum barbad ho rahi hai , is liye Aap Allah se in ke haq mein dua kijiye . Allah Ta'ala ne farmaya ke us din ka intezar kar jab aasman saaf dhowan nazar aayega aayat «innakum aa'idoon» tak (neez) jab hum sakhti se in ki girift karein ge (kuffar ki) sakht girift Badr ki larayi mein hui . Dhowein ka bhi muamla guzar chuka (jab sakht qahet para tha) jis mein pakar aur qaid ka zikr hai woh sab ho chuke isi tarah Surah Al-Room ki aayat mein jo zikr hai woh bhi ho chuka .