Hum se Hajjaj bin Minhal ne byaan kiya , kaha hum se Hushaym ne byaan kiya , kaha hum ko Abu Hashim ne khabar di , unhein Abu Mijlaz ne , unhein Qays bin Abbad ne aur unhein Abu Zharr razi Allahu anhu ne woh qasam kha kar byaan karte thay ke yeh aayat «hazhaani khasmaani-khtasamoo fee rabbihim» ”yeh do fareeq hain , jinon ne apne Parvardigar ke baare mein jhagra kiya .“ Hamzah aur Aap ke donon sathiyon (Ali bin Abi Talib razi Allahu anhu aur Ubaydah bin al-Harith razi Allahu anhu Musalmanon ki taraf se) aur (mushrikeen ki taraf se) Utbah aur is ke donon sathiyon (Shaybah aur Waleed bin Utbah) ke baare mein nazil hui thi , jab unhon ne Badr ki larai mein maidan mein aa kar muqabla ki dawat di thi . Is riwayat ko Sufyan ne Abu Hashim se aur Usman ne Jareer se , unhon ne Mansoor se , unhon ne Abu Hashim se aur unhon ne Abu Mijlaz se isi tarah naqal kiya hai .

Mujh se Muhammad Bin Abdullah Raqashi ne bayan kiya, hum se Mutamir ne bayan kiya, kaha ke mein ne apne walid se suna, unhon ne bayan kiya ke hum se Abu Mijlaz ne, un se Qais Bin Ubad aur un se Ali Bin Abi Talib Radi Allahu Anhu ne bayan kiya ke Qiyamat ke din mein sab se pehla shakhs hoon ga jo Allah Ta'ala ke darbar mein jhagrah chakane ke liye do zano ho kar baithe ga. Qais Bin Ubad ne bayan kiya ke inhein hazrat (Hamza, Ali aur Ubaidah Radi Allahu Anhum) ke bare mein Surah-al-Hajj ki ye ayat nazil hui thi «Hazaani khasmani-khtasamu fi Rabbihim» ”Ye do fareeq hain jinhon ne Allah ke bare mein larai ki.“ Bayan kiya ke ye wahi hain jo Badr ki larai mein larrne nikle thay, musalmanon ki taraf se Hamza, Ali aur Ubaidah ya Abu Ubaidah Bin Haris Rizwanullahi Alaihim (aur kafiron ki taraf se) Shaibah Bin Rabeeah, Utbah Bin Rabeeah aur Walid Bin Utbah thay
.