Hum se Musaddad ne byaan kiya , kaha hum se Yazid bin Zuray ne byaan kiya , kaha hum se Saeed bin Abi Aroobah aur Hisham bin Abi Abdullah Dastwayi ne byaan kiya , kaha ke hum se Qatadah ne byaan kiya aur un se Safwan bin Muhriz ne ke Ibn Umar razi Allahu anhuma tawaf kar rahe thay ke ek shakhs naam na-maloom Aap ke samne aaya aur poocha: Ae Abu Abdur Rahman! Ya yeh kaha ke Ae Ibn Umar! Kya Aap ne Rasool Allah salla Allahu alaihi wasallam se sargoshi ke mutalliq kuch suna hai (jo Allah Ta'ala Momineen se Qayamat ke din kare ga) . Unhon ne byaan kiya ke main ne Nabi Karim salla Allahu alaihi wasallam se suna , Aap salla Allahu alaihi wasallam farma rahe thay ke momin apne Rabb ke qareeb laya jaye ga . Aur Hisham ne «yadnu-lmu'minu» (bajaye «yudna-lmu'minu» kaha) matlab ek hi hai . Yahan tak ke Allah Ta'ala apna ek jaanib is par rakkhe ga aur is ke gunahon ka iqrar karaye ga ke falan gunah tujhe yaad hai ? Banda arz kare ga , yaad hai , mere Rabb! Mujhe yaad hai , do martaba iqrar kare ga . Phir Allah Ta'ala farmaye ga ke main ne duniya mein tumhare gunahon ko chhupaye rakkha aur aaj bhi tumhari maghfirat karoon ga . Phir is ki naikiyon ka daftar lapait diya jaye ga . Lekin doosre log ya (yeh kaha ke) kuffar to un ke mutalliq mahshar mein aalan kiya jaye ga ke yahi woh log hain jinon ne Allah par jhoot baandha tha . Aur Shayban ne byaan kiya , un se Qatadah ne ke hum se Safwan ne byaan kiya .

Hum se Musa Bin Ismail ne bayan kiya, kaha ke hum se Hammam ne bayan kiya, kaha ke mujhe Qatadah ne khabar di, un se Safwan Bin Muhriz Mazini ne bayan kiya ke mein Abdullah Bin Umar (Radi Allahu Anhuma) ke hath mein hath diye ja raha tha. Ke ek shakhs samne aya aur poocha Rasul Allah (Sallallahu Alaihi Wasallam) se aap ne (Qiyamat mein Allah aur bande ke darmiyan hone wali) sargoshi ke baare mein kya suna hai ? Abdullah Bin Umar (Radi Allahu Anhuma) ne kaha ke mein ne Rasul Allah (Sallallahu Alaihi Wasallam) se suna. Aap (Sallallahu Alaihi Wasallam) farmate thay ke Allah Ta'ala momin ko apne nazdeek bula lay ga aur us par apna parda daal day ga aur ise chhupa lay ga. Allah Ta'ala us se farmaye ga kya tujh ko falan gunah yaad hai ? Kya falan gunah tujh ko yaad hai ? Wo momin kahe ga han, ay mere Parwardigar. Aakhir jab wo apne gunahon ka iqrar kar lay ga aur ise yaqeen aa jaye ga ke ab wo halak hua to Allah Ta'ala farmaye ga ke mein ne duniya mein tere gunahon par parda dala. Aur aaj bhi mein teri maghfirat karta hoon, chunanche ise is ki naikiyon ki kitab day di jaye gi, lekin kafir aur munafiq ke mutalliq in par gawah (malaika, Ambiya, aur tamam jin-o-ins sab) kaheinge ke yahi wo log hain jinhon ne apne Parwardigar par jhoot bandha tha. Khabardar ho jao! zalimon par Allah ki phatkaar ho gi
.

Hum se Musaddad ne bayan kiya, kaha hum se Abu Awanah ne, unhon ne Qatadah se, unhon ne Safwan bin Muhriz se ke ek shakhs ne Ibn Umar razi Allahu anhuma se poochha tum ne Nabi Karim salla Allahu alaihi wasallam se kana-phosi ke baare mein kya suna hai? (yani sargoshi ke baare mein) unhon ne kaha Nabi Karim salla Allahu alaihi wasallam farmate thay (Qayamat ke din tum Musalmanon) mein se ek shakhs (jo gunahgar ho ga) apne Parvardigar se nazdeek ho jaye ga. Parvardigar apna bazu is par rakh de ga aur farmaye ga tu ne (falan din duniya mein) yeh yeh bure kaam kiye thay, woh arz kare ga. Beshak (Parvardigar mujh se khatayein hui hain par tu Ghafoor Raheem hai) gharaz (saare gunahon ka) is se (pehle) iqrar kara le ga phir farmaye ga dekh main ne duniya mein tere gunah chhupaye rakkhe to aaj main in gunahon ko bakhsh deta hoon.

`Hum se Masaddad ne bayan kiya, unhon ne kaha hum se Abu Awana ne bayan kiya, un se Qatada ne bayan kiya, un se Safwan bin Muhriz ne bayan kiya ke ek shakhs ne Ibn Umar Radi Allahu Anhuma se poocha: sargoshi ke bare mein aap ne Rasul Allah صلی اللہ علیہ وسلم se kis tarah suna hai? Unhon ne bayan kiya ke tum mein se koi apne Rabb ke qareeb jaye ga yahan tak ke Allah Ta'ala apna parda is par daal de ga aur kahe ga tu ne yeh yeh amal kiya tha? Banda kahe ga ke haan. Chunancha wo is ka iqrar kare ga. Phir Allah Ta'ala farmaye ga ke Mein ne duniya mein tere gunah par parda dala tha aur aaj bhi tujhse maaf karta hoon.