Hum se Musaddad bin Musarhad ne byaan kiya , kaha hum se Yahya bin Saeed Qattan ne byaan kiya , un se Shubah ne byaan kiya ke mujh se Khubayb bin Abdur Rahman ne byaan kiya , un se Hafs bin Aasim ne aur un se Abu Saeed bin al-Mualla razi Allahu anhu ne byaan kiya ke main masjid mein namaz parh raha tha , Rasool Allah salla Allahu alaihi wasallam ne mujhe isi halat mein bulaya , main ne koi jawab nahi diya (phir baad mein , main ne hazir ho kar) arz kiya: ya Rasool Allah! Main namaz parh raha tha . Is par Aap salla Allahu alaihi wasallam ne farmaya ke kya Allah Ta'ala ne tum se nahi farmaya hai «astajeebu lillahi wa lirrahooli izha daakum» ”Allah aur us ke Rasool jab tumhein bulayein to haan mein jawab do .“ Phir Aap salla Allahu alaihi wasallam ne mujh se farmaya ke aaj main tumhein masjid se nikalne se pehle ek aisi surat ki taleem doon ga jo Quran ki sab se bari surat hai . Phir Aap ne mera hath apne hath mein liya aur jab Aap bahar nikalne lage to main ne yaad dilaya ke Aap ne mujhe Quran ki sab se bari surat batane ka waada kiya tha . Aap salla Allahu alaihi wasallam ne farmaya «alhamdu lillahi rabbil aalameen» yahi woh saba masani aur Quran e Azeem hai jo mujhe ata kiya gaya hai .

Mujh se Ishaq bin Rahwayh ne byaan kiya , kaha hum ko Rauh bin Ubadah ne khabar di , kaha hum se Shubah ne byaan kiya , un se Khubayb bin Abdur Rahman ne unhon ne Hafs bin Aasim se suna aur un se Abu Saeed bin al-Mualla razi Allahu anhu ne byaan kiya ke main namaz parh raha tha ke Rasool Allah salla Allahu alaihi wasallam ne mujhe pukara . Main Aap salla Allahu alaihi wasallam ki khidmat mein na pahunch saka balkay namaz se farigh hone ke baad hazir hua . Aap salla Allahu alaihi wasallam ne daryaft farmaya ke aane mein der kyun hui ? Kya Allah Ta'ala ne tumhein hukm nahi diya hai «ya ayyuhallazhina aamanu-stajeeboo lillahi wa lirrahooli izha daakum» ke ”Ae ایمin والو! Allah aur us ke Rasool ki aawaz par labbaik kaho , jabke woh (yani Rasool) tum ko bulayein .“ Phir Aap salla Allahu alaihi wasallam ne farmaya ke masjid se nikalne se pehle main tumhein Quran ki azeem tareen Surat sikhaoon ga . Thori der baad Aap bahar tashreef le jaane lage to main ne Aap ko yaad dilaya . Aur Maaz bin Maaz Anbari ne is hadees ko yun riwayat kiya ke hum se Shubah ne byaan kiya , un se Khubayb ne , unhon ne Hafs se suna aur unhon ne Abu Saeed bin al-Mualla razi Allahu anhu jo Nabi Karim salla Allahu alaihi wasallam ke sahabi thay , suna aur unhon ne byaan kiya woh (Surah Fatiha) «alhamdu lillahi rabbil aalameen» hai jis mein saat aayatein hain jo har namaz mein mukarrar parhi jati hain .

Mujh se Muhammad bin Bashar ne byaan kiya , unhon ne kaha hum se Ghundar ne byaan kiya , kaha hum se Shubah ne byaan kiya , un se Khubayb bin Abdur Rahman ne , un se Hafs bin Aasim ne aur un se Abu Saeed bin al-Mualla razi Allahu anhu ne byaan kiya ke Rasool Allah salla Allahu alaihi wasallam mere paas se guzre main is waqt namaz parh raha tha . Nabi Karim salla Allahu alaihi wasallam ne mujhe bulaya . Main namaz se farigh hone ke baad khidmat mein hazir hua . Aap salla Allahu alaihi wasallam ne daryaft farmaya ke furan hi kyun na aaye ? Arz kiya ke namaz parh raha tha . Is par Aap salla Allahu alaihi wasallam ne farmaya ke kya Allah ne tum logon ko hukm nahi diya hai ke ae ایمin والو! Jab Allah aur us ke Rasool tumhein bulayein to labbaik kaho , phir Aap salla Allahu alaihi wasallam ne farmaya ke kyun na aaj main tumhein masjid se nikalne se pehle Quran ki sab se azeem surat bataoon . Phir Aap (batane se pehle) masjid se bahar tashreef le jaane ke liye uthay to main ne baat yaad dilayi . Aap salla Allahu alaihi wasallam ne farmaya ke Surah Fatiha «alhamdu lillahi rabbil aalameen» yahi saba masani hai aur yahi Quran e Azeem hai jo mujhe diya gaya hai .

Hum se Ali bin Abdullah Madini ne byaan kiya, kaha hum se Yahya bin Saeed Qattan ne byaan kiya, kaha hum se Shubah bin Hajjaj ne byaan kiya, kaha mujh se Habib bin Abdur Rahman ne byaan kiya, un se Hafs bin Aasim ne aur un se Abu Saeed bin al-Mualla razi Allahu anhu ne ke main namaz mein mashghool tha to Rasool Allah salla Allahu alaihi wasallam ne mujhe bulaya is liye main koi jawab nahi de saka, phir main ne (Aap ki khidmat mein hazir ho kar) arz kiya: ya Rasool Allah! Main namaz parh raha tha. Is par Aap salla Allahu alaihi wasallam ne farmaya kya Allah Ta'ala ne tumhein hukm nahi farmaya hai «istajeeboo lillahi wa lir-rasooli izha da-aakum» ke ”Allah ke Rasool jab tumhein pukarein to in ki pukar par furan Allah ke Rasool ke liye labbaik kaha karo.“ Phir Aap salla Allahu alaihi wasallam ne farmaya masjid se nikalne se pehle Quran ki sab se bari surat main tumhein kyun na sikha doon. Phir Aap ne mera hath pakar liya aur jab hum masjid se bahar nikalne lage to main ne arz kiya: ya Rasool Allah! Aap ne abhi farmaya tha ke masjid ke bahar nikalne se pehle Aap mujhe Quran ki sab se bari surat batayein ge. Aap salla Allahu alaihi wasallam ne farmaya ke haan woh surat «alhamdu lillahi rabbil aalameena» hai yahi woh saat aayatein hain jo (har namaz mein) baar baar parhi jati hain aur yahi woh Quran e Azeem hai jo mujhe diya gaya hai.