Hum se Muslim bin Ibrahim ne byaan kiya , kaha hum se Shubah ne , un se Saad bin Ibrahim ne , un se Urwah bin Zubayr ne aur un se Aisha razi Allahu anha ne byaan kiya ke Rasool Allah salla Allahu alaihi wasallam apne marz al-maut mein baar baar farmate thay . ”( «allahumma») «ar-rafeeqal aa'la» Ae Allah! Mujhe mere rufaqa (anbiya aur siddiqeen) mein pahuncha de (jo aala illiyyeen mein rehte hain) .“

Hum se Muhammad bin Bashar ne byaan kiya , kaha hum se Ghundar ne byaan kiya , kaha hum se Shubah ne byaan kiya , un se Saad ne , un se Urwah ne aur un se Aisha razi Allahu anha ne byaan kiya ke main sunti aayi thi ke har Nabi ko wafat se pehle duniya aur aakhirat ke rehne mein ikhtiyar diya jata hai , phir main ne Rasool Allah salla Allahu alaihi wasallam se bhi suna , Aap apne marz al-maut mein farma rahe thay . Aap salla Allahu alaihi wasallam ki aawaz bhaari ho chuki thi . Aap aayat «ma-allazhina anamallahu alaykum» ki tilawat farma rahe thay (yani in logon ke saath jin par Allah ne inam kiya hai) mujhe yaqeen ho gaya ke Aap ko bhi ikhtiyar de diya gaya hai .

Hum se Abu al-Yaman ne byaan kiya , kaha hum ko Shuayb ne khabar di , unhein Zuhri ne ke Urwah bin Zubayr ne byaan kiya aur un se Aisha razi Allahu anha ne byaan kiya tandurusti ke zamane mein Rasool Allah salla Allahu alaihi wasallam farmaya karte thay ke jab bhi kisi Nabi ki rooh qabz ki gayi to pehle jannat mein us ki qiyam-gah usay zaroor dikha di gayi , phir usay ikhtiyar diya gaya (rawi ko shak tha ke lafz «yuhya» hai ya «yukhayyar» , donon ka mafhoom ek hi hai) phir jab Nabi Karim salla Allahu alaihi wasallam beemar pare aur waqt qareeb aa gaya to sar mubarak Aisha razi Allahu anha ki raan par tha aur Aap par ghashi tari ho gayi thi , jab kuch hosh hua to Aap ki aankhein ghar ki chhat ki taraf uth gayin aur Aap salla Allahu alaihi wasallam ne farmaya . «allahumma fir rafeeqil aa'la» . Main samajh gayi ke ab Nabi Karim salla Allahu alaihi wasallam hamain (yani dunyawi zindagi ko) pasand nahi farmayein ge . Mujhe woh hadees yaad aa gayi jo Aap salla Allahu alaihi wasallam ne tandurusti ke zamane mein farmayi thi .

Hum se Muhammad bin Yahya Zhuhli ne byaan kiya . Kaha hum se Affan bin Muslim ne byaan kiya , un se Sakhr bin Juwayriyah ne , un se Abdur Rahman bin Qasim ne , un se un ke walid (Qasim bin Muhammad) ne aur un se Aisha razi Allahu anha ne ke (un ke bhai) Abdur Rahman bin Abi Bakr razi Allahu anhu Nabi Karim salla Allahu alaihi wasallam ki khidmat mein hazir huay . Nabi Karim salla Allahu alaihi wasallam mere seene se taik lagaye huay thay . Abdur Rahman razi Allahu anhu ke hath mein ek taza miswak istemal ke liye thi . Aap salla Allahu alaihi wasallam is miswak ki taraf dekhte rahe . Chunanche main ne un se miswak le li aur usay apne daanton se chaba kar achhi tarah jhaarne aur saaf karne ke baad Nabi Karim salla Allahu alaihi wasallam ko de di . Aap ne woh miswak istemal ki jitne umdah tariqa se Aap salla Allahu alaihi wasallam is waqt miswak kar rahe thay , main ne Aap ko itni achhi tarah miswak karte kabhi nahi dekha . Miswak se farigh hone ke baad Aap ne apna hath ya apni ungli uthayi aur farmaya . «fir rafeeqil aa'la» teen martaba , aur Aap ka intiqal ho gaya . Aisha razi Allahu anha kaha karti thien ke Nabi Karim salla Allahu alaihi wasallam ki wafat hui to sar mubarak meri hansli aur thori ke darmiyan mein tha .

Hum se Mualla bin Asad ne byaan kiya , kaha hum se Abdul Aziz bin Mukhtar ne byaan kiya , kaha hum se Hisham bin Urwah ne byaan kiya , un se Abbad bin Abdullah bin Zubayr ne aur unhein Aisha razi Allahu anha ne khabar di ke Aap ne Nabi Karim salla Allahu alaihi wasallam se suna , wafat se kuch pehle Nabi Karim salla Allahu alaihi wasallam pusht se un ka sahara liye huay thay . Aap ne kaan laga kar suna ke Nabi Karim salla Allahu alaihi wasallam dua kar rahe hain «allahummaghfirli warhamni , wa al-hiqni bir rafeeq» ”Ae Allah! Meri maghfirat farma , mujh par raham kar aur mere rafeeqon se mujhe mila .“

Mujh se Muhammad bin Ubayd ne byaan kiya , kaha hum se Esa bin Yunus ne byaan kiya , un se Amr bin Saeed ne , unhein Ibn Abi Mulaykah ne khabar di aur unhein Aisha razi Allahu anha ke ghulam Abu Amr Zhakwan ne ke Aisha razi Allahu anha farmaya karti thien , Allah ki bahut si ni'maton mein ek ni'mat mujh par yeh bhi hai ke Rasool Allah salla Allahu alaihi wasallam ki wafat mere ghar mein aur meri baari ke din hui . Aap is waqt mere seene se taik lagaye huay thay . Aur yeh ke Allah Ta'ala ne Aap salla Allahu alaihi wasallam ki wafat ke waqt mere aur Aap ke thook ko ek saath jama kiya tha ke Abdur Rahman razi Allahu anhu ghar mein aaye to un ke hath mein miswak thi . Aap salla Allahu alaihi wasallam mujh par taik lagaye huay thay , main ne dekha ke Aap salla Allahu alaihi wasallam is miswak ko dekh rahe hain . Main samajh gayi ke Aap miswak karna chahte hain , is liye main ne Aap se poocha , yeh miswak Aap ke liye le loon ? Aap salla Allahu alaihi wasallam ne sar ke isharah se isbat mein jawab diya , main ne woh miswak un se le li . Aap salla Allahu alaihi wasallam usay chaba na sake , main ne poocha Aap ke liye main usay narm kar doon ? Aap ne sar ke isharah se isbat mein jawab diya . Main ne miswak narm kar di . Aap ke samne ek bara piyala tha , chamre ka ya lakri ka (rawi e hadees) Amr ko is silsile mein shak tha , is ke andar pani tha , Nabi Karim salla Allahu alaihi wasallam baar baar apne hath is ke andar dakhil karte aur phir unhein apne chehre par pherte aur farmate «la ilaha illallah» . Maut ke waqt shiddat hoti hai phir Aap salla Allahu alaihi wasallam apna hath utha kar kehne lage «fir rafeeqil aa'la» yahan tak ke Aap rahlat farma gaye aur Aap ka hath jhuk gaya .

Hum se Sulayman bin Harb ne byaan kiya , kaha hum se Hammad bin Zayd ne byaan kiya , in se Ayub ne , un se Ibn Abi Mulaykah ne aur un se Aisha razi Allahu anha ne byaan kiya ke Rasool Allah salla Allahu alaihi wasallam ki wafat mere ghar mein , meri baari ke din hui . Aap is waqt mere seene se taik lagaye huay thay . Jab Aap beemar pare to hum Aap ki sehat ke liye duaein kiya karte thay . Is beemari mein bhi main Aap ke liye dua karne lagi lekin Aap salla Allahu alaihi wasallam farma rahe thay aur Aap ka sar aasman ki taraf utha hua tha «fir rafeeqil aa'la fir rafeeqil aa'la» aur Abdur Rahman bin Abi Bakr razi Allahu anhuma aaye to un ke hath mein ek taza tehni thi . Aap salla Allahu alaihi wasallam ne is ki taraf dekha to main samajh gayi ke Aap salla Allahu alaihi wasallam miswak karna chahte hain . Chunanche woh tehni main ne un se le li . Pehle main ne usay chabaya , phir saaf kar ke Aap ko de di . Aap salla Allahu alaihi wasallam ne is se miswak ki , jis tarah pehle Aap miswak kiya karte thay is se bhi achhi tarah se . Phir Aap salla Allahu alaihi wasallam ne woh miswak mujhe inayat farmayi aur Aap ka hath jhuk gaya , ya (rawi ne yeh byaan kiya ke) miswak Aap ke hath se chhoot gayi . Is tarah Allah Ta'ala ne mere aur Aap salla Allahu alaihi wasallam ke thook ko is din jama kar diya jo Aap ki duniya ki zindagi ka sab se aakhri aur aakhirat ki zindagi ka sab se pehla din tha .

Hum se Bishr bin Muhammad ne byaan kiya , kaha hum se Abdullah bin Mubarak ne byaan kiya , un se Yunus ne byaan kiya , un se Zuhri ne byaan kiya , unhein Saeed bin Musayyab ne kai ahl e ilm ki maujoodgi mein khabar di aur un se Aisha razi Allahu anha ne byaan kiya ke Nabi Karim salla Allahu alaihi wasallam halat e sehat mein farmaya karte thay ke har Nabi ki rooh qabz karne se pehle unhein jannat mein un ki qiyam-gah dikhayi gayi , phir ikhtiyar diya gaya . Phir jab Aap salla Allahu alaihi wasallam beemar huay aur Aap ka sar mubarak meri raan par tha . Is waqt Aap par ghashi tari ho gayi . Jab hosh mein aaye to Aap ne apni nazar ghar ki chhat ki taraf utha li aur farmaya «allahummar rafeeqal aa'la» ”Ae Allah! Mujhe apni bargah mein anbiya aur siddiqeen se mila de .“ Main isi waqt samajh gayi ke ab Aap hamain pasand nahi kar sakte aur mujhe woh hadees yaad aa gayi jo Aap halat e sehat mein hum se byaan kiya karte thay . Aisha razi Allahu anha ne byaan kiya ke aakhri kalma jo zaban mubarak se nikla woh yahi tha ke «allahummar rafeeqal aa'la» .

Hum se Abdullah bin Abi Shaybah ne bayan kiya, kaha hum se Abu Usamah ne bayan kiya, in se Hisham ne, in se Abbad bin Abdullah bin Zubayr ne bayan kiya ke main ne Aisha razi Allahu anha se suna, unhon ne bayan kiya ke main ne Rasool Allah salla Allahu alaihi wasallam se suna, Nabi Karim salla Allahu alaihi wasallam mera sahara liye huay thay (marz-ul-maut mein) aur farma rahe thay «allahummagh-fir lee war-hamnee wa al-hiqnee bir-rafeeqil-a-la» ”Ae Allah! Meri maghfirat farma mujh par raham kar aur mujhko achhe rafeeqon (farishton aur Paighambaron) ke saath mila de.“

`Hum se Saeed bin Afir ne bayan kiya, kaha ke mujh se Laith bin Saad ne bayan kiya, kaha ke mujh se Aqeel ne, un se Ibn Shihab ne, unhein Saeed bin Musayyam aur Urwa bin Zubair ne bahut se ilm walon ke samne khabar di ke Aisha Radi Allahu Anha ne bayan kiya ke Rasul Allah صلی اللہ علیہ وسلم jab bimar nahi thay to farmaya karte thay ke jab bhi kisi nabi ki rooh qabz ki jati to pehle jannat mein is ka thikana dikha diya jata hai, is ke baad ise ikhtiyar diya jata hai (ke chahein duniya mein rahein ya jannat mein chalein) chunancha jab Nabi Kareem صلی اللہ علیہ وسلم bimar hue aur sar mubarak meri raan par tha. Is waqt Aap par thodi der ke liye ghashi tari hui. Phir jab Aap ko is se kuch hosh hua to chhat ki taraf tuktuki baandh kar dekhne lage, phir farmaya «Allahummar-Rafeeqal-A'la» ”Ae Allah! Rafeeq-e-A'la ke sath mila de.“ Mein ne samajh liya ke Nabi Kareem صلی اللہ علیہ وسلم ab humein ikhtiyar nahi kar sakte, mein samajh gayi ke jo baat Nabi Kareem صلی اللہ علیہ وسلم sehat ke zamane mein bayan farmaya karte thay, yeh wahi baat hai. Bayan kiya ke yeh Nabi Kareem صلی اللہ علیہ وسلم ka aakhri kalma tha jo Aap ne zuban se ada farmaya kaha «Allahummar-Rafeeqal-A'la» ”Ae Allah! Rafeeq-e-A'la ke sath mila de.“

Mujh se Yahya bin Bukayr ne bayan kiya , kaha hum se Layth bin Saad ne bayan kiya , in se Aqeel bin Khalid ne , in se Ibn Shihab ne , kaha mujhko Saeed bin al-Musayyab aur Urwah bin Zubayr ne chand ilm walon ke samne khabar di ke Nabi Karim salla Allahu alaihi wasallam ki zauja mutahhara Aisha razi Allahu anha ne bayan kiya ke Rasool Allah salla Allahu alaihi wasallam ne jab Aap khase tandurust thay farmaya tha kisi Nabi ki is waqt tak rooh qabz nahi ki jaati jab tak jannat mein is ke rehne ki jagah usay dikha na di jaati ho aur phir usay (duniya ya aakhirat ke liye) ikhtiyar diya jata hai . Phir jab Nabi Karim salla Allahu alaihi wasallam beemar huay aur Nabi Karim salla Allahu alaihi wasallam ka sar mubarak meri raan par tha to Aap par thori der ke liye ghashi chha gayi , phir jab Aap ko hosh aaya to Aap chhat ki taraf tuk-tuki laga kar dekhne lage . Phir farmaya «allaahummar-rafeeqal-a'laa» main ne kaha ke ab Nabi Karim salla Allahu alaihi wasallam hamain tarjeeh nahi de sakte aur main samajh gayi ke yeh wahi hadees hai jo Aap ne ek martaba irshad farmayi thi . Rawi ne bayan kiya ke yeh Nabi Karim salla Allahu alaihi wasallam ka aakhri kalma tha jo Aap ne apni zaban mubarak se ada farmaya yani yeh irshad ke «allaahummar-rafeeqal-a'laa» yani ya Allah! Mujhko buland rafeeqon ka saath pasand hai .