Hum se Yahya bin Bukayr ne byaan kiya , kaha hum se Layth bin Saad ne byaan kiya , un se Aqeel ne , un se Ibn Shihab ne , un se Ubaydullah bin Abdullah ne , un se Abdullah bin Abbas razi Allahu anhuma ne aur un se Umm Fadl bint Harith razi Allahu anha ne byaan kiya ke main ne suna Rasool Allah salla Allahu alaihi wasallam Maghrib ki namaz mein «wal mursalati urfan» ki qirat kar rahe thay , is ke baad phir Aap ne hamain kabhi namaz nahi parhayi , yahan tak ke Allah Ta'ala ne Aap ki rooh qabz kar li .

Hum se Abdullah bin Yusuf Taneesi ne byaan kiya , unhon ne kaha ke hamein Imam Malik ne Ibn Shihab se khabar di , unhon ne Muhammad bin Jubayr bin Mutim se , unhon ne apne baap (Jubayr bin Mutim) se , unhon ne byaan kiya ke main ne Rasool Allah salla Allahu alaihi wasallam ko Maghrib mein Surah Tur parhte huay suna tha .

Hum se Amr bin Ali Fallas ne byaan kiya , kaha ke hum se Yahya bin Saeed Qattan ne byaan kiya , kaha ke hum se Sufyan Thauri ne byaan kiya , kaha ke mujh se Abdur Rahman bin Aabis ne byaan kiya , kaha ke main ne Ibn Abbas razi Allahu anhuma se suna aur un se ek shakhs ne yeh poocha tha ke kya tum ne (auraton ka) nikalna eid ke din Nabi Karim salla Allahu alaihi wasallam ke saath dekha hai ? Unhon ne kaha haan dekha hai agar main Aap ka rishta daar aziz na hota to kabhi na dekhta (yani meri kam sini aur qarabat ki wajah se Nabi Karim salla Allahu alaihi wasallam mujh ko apne saath rakhte thay) Kathir bin Salt ke makaan ke paas jo nishaan hai pehle wahan Aap salla Allahu alaihi wasallam tashreef laye wahan Aap salla Allahu alaihi wasallam ne khutba sunaya phir Aap salla Allahu alaihi wasallam auraton ke paas tashreef laye aur unhein bhi waz o naseehat ki . Aap salla Allahu alaihi wasallam ne un se khairaat karne ke liye kaha , chunanchay auraton ne apne chhallay aur anguthiyan utaar utaar kar Bilal razi Allahu anhu ke kapre mein daalni shuru kar di . Aakhir Nabi Karim salla Allahu alaihi wasallam Bilal razi Allahu anhu ke saath ghar tashreef laye .