Hum se Ahmad bin Muhammad ne byaan kiya , kaha hum ko Abdullah bin Mubarak ne khabar di , kaha hum ko Humayd Taweel ne khabar di aur unhein Anas bin Malik razi Allahu anhu ne ke jab Rasool Allah salla Allahu alaihi wasallam Ghazwa Tabook se wapas huay . Aur Madinah ke qareeb pahunche to Aap salla Allahu alaihi wasallam ne farmaya ke Madinah mein bahut se aise log hain ke jahan bhi tum chale aur jis wadi ko bhi tum ne qata kiya woh (apne dil se) tumhare saath saath thay . Sahabah razi Allahu anhum ne arz kiya: ya Rasool Allah! Agarchay un ka qiyam is waqt bhi Madinah mein hi raha ho ? Aap salla Allahu alaihi wasallam ne farmaya: haan , woh Madinah mein rehte huay bhi (apne dil se tumhare saath thay) woh kisi uzr ki wajah se ruk gaye thay .

Hum se Abdullah Bin Muhammad Musnadi ne bayan kiya, kaha hum se Muawiyah Bin Amr ne bayan kiya, kaha hum se Abu Ishaq Musa Bin Uqba ne bayan kiya, un se Salim Bin Abil Nazr ne ke Abdullah Bin Abi Aufa (Radi Allahu Anhu) ne (Umar Bin Ubaidullah ko) likha to mein ne wo tahrir parhi ke Rasul Allah (Sallallahu Alaihi Wasallam) ne farmaya hai jab tumhari kuffar se mud-bher ho to sabr se kaam lo
.

Imam Bukhari (Rahimahullah) hadees ki doosri sanad bayan karte hain ke hum se Sulaiman Bin Harb ne bayan kiya, kaha hum se Hammad ne bayan kiya, ye Zaid ke bete hain, un se Humaid ne aur un se Anas Bin Malik (Radi Allahu Anhu) ne ke Nabi Kareem (Sallallahu Alaihi Wasallam) ek ghazwah (Tabook) par thay to Aap (Sallallahu Alaihi Wasallam) ne farmaya ke kuch log Madinah mein hamare peeche reh gaye hain lekin hum kisi bhi ghati ya wadi mein (jihad ke liye) chalein wo sawab mein hamare sath hain ke wo sirf uzr ki wajah se hamare sath nahi aa sake. Aur Musa ne bayan kiya ke hum se Hammad ne bayan kiya, un se Humaid ne, un se Musa Bin Anas ne aur un se un ke walid ne bayan kiya ke Nabi Kareem (Sallallahu Alaihi Wasallam) ne farmaya. Abu Abdullah (Imam Bukhari Rahimahullah) farmate hain ke pehli sanad ziyada sahi hai
.