Mujh se Amr bin Muhammad Baghdadi ne byaan kiya ‘ kaha hum se Hushaym ne byaan kiya ‘ unhein Husain ne khabar di ‘ unhein Abu Zhabyan Husain bin Jundub ne ‘ kaha ke main ne Usamah bin Zayd razi Allahu anhuma se suna ‘ unhon ne byaan kiya ke hamain Rasool Allah salla Allahu alaihi wasallam ne qabila Hurqah ki taraf bheja . Hum ne subah ke waqt un par hamla kiya aur unhein shikast de di ‘ phir main aur ek aur Ansari sahabi is qabila ke ek shakhs (Mirdas bin Umar naami) se bhirr gaye . Jab hum ne us par ghalba pa liya to woh la ilaha illa Allah kehne laga . Ansari to furan hi ruk gaya lekin main ne usay apne barchay se qatl kar diya . Jab hum lautay to Nabi Karim salla Allahu alaihi wasallam ko bhi is ki khabar hui . Aap salla Allahu alaihi wasallam ne daryaft farmaya ke Usamah kya us ke la ilaha illa Allah kehne ke bawajood tum ne usay qatl kar diya ? Main ne arz kiya ke woh qatl se bachna chahta tha (us ne yeh kalma dil se nahi parha tha) . Is par Aap salla Allahu alaihi wasallam baar baar yahi farmate rahe (kya tum ne us ke la ilaha illa Allah kehne par bhi usay qatl kar diya) ke mere dil mein yeh aarzoo paida hui ke kaash main aaj se pehle Islam na lata .

Hum se Amr bin Zhuraara ne bayan kiya, kaha hum se Hushaim ne bayan kiya, kaha hum se Haseen ne bayan kiya, kaha hamase Abu Zhabyan ne bayan kiya, kaha ke main ne Usamah bin Zayd bin Harisa razi Allahu anhuma se suna, unhon ne bayan karte huay kaha ke hamain Rasool Allah salla Allahu alaihi wasallam ne qabila Juhaina ki ek shakh ki taraf (muhim par) bheija. Bayan kiya ke phir hum ne in logon ko subah ke waqt ja liya aur unhein shikast de di. Rawi ne bayan kiya ke main aur qabila Ansar ke ek sahab qabila Juhaina ke ek shakhs tak pahunche aur jab hum ne usay gher liya to is ne kaha «laa ilaaha illallaahu» Ansari sahabi ne to (yeh sunte hi) hath rok liya lekin main ne apne neizey se usay qatl kar diya. Rawi ne bayan kiya ke jab hum wapas aaye to is waqia ki khabar Nabi Karim salla Allahu alaihi wasallam ko mili. Bayan kiya ke phir Nabi Karim salla Allahu alaihi wasallam ne mujh se farmaya ”Usamah! kiya tum ne kalma «laa ilaaha illallaahu» ka iqrar karne ke baad usay qatl kar dala.“ Main ne arz kiya: ya Rasool Allah! Is ne sirf jaan bachane ke liye is ka iqrar kiya tha. Nabi Karim salla Allahu alaihi wasallam ne phir farmaya ”tum ne usay «laa ilaaha illallaahu» ka iqrar karne ke baad qatl kar dala.“ Bayan kiya ke Nabi Karim is jumla ko itni dafa dohrate rahe ke mere dil mein yeh khwahish paida ho gayi ke kaash main is se pehle Musalman na hua hota.