Hum se Muhammad Bin Abdullah Bin Numair ne bayan kiya ‘ kaha hum se Ya'la Bin Ubaid ne bayan kiya ‘ kaha hum se Ismail Bin Abi Khalid ne bayan kiya ‘ kaha ke mein ne Abdullah Bin Abi Aufa Radi Allahu Anhu se suna ‘ Aap ne bayan kiya ke jab Nabi Kareem Sallallahu Alaihi Wasallam ne umra (qaza) kiya to hum bhi Aap ke sath thay. Aap Sallallahu Alaihi Wasallam ne tawaf kiya to hum ne bhi Aap ke sath tawaf kiya. Aap Sallallahu Alaihi Wasallam ne namaz parhi to hum ne bhi Aap ke sath namaz parhi aur Aap Sallallahu Alaihi Wasallam ne safa-o-marwa ki sayi bhi ki. Hum Aap ki ahl-e-Makka se hifazat karte thay taake koi takleef ki baat Aap ko pesh na aa jaye
.

Hum se Musaddad ne byaan kiya , kaha ke hum se Khalid bin Abdullah ne byaan kiya , unhein Ismail bin Abi Khalid ne khabar di , unhein Abdullah ibn Abi Awfa ne ke Rasool Allah salla Allahu alaihi wasallam ne Umrah kiya to Aap salla Allahu alaihi wasallam ne Kaaba ka tawaf kar ke Maqam-e-Ibrahim ke peeche do rak'at'ein parhi . Aap salla Allahu alaihi wasallam ke saath kuch log thay jo Aap salla Allahu alaihi wasallam ke aur logon ke darmiyan aar bane hue thay . In mein se ek sahib ne Ibn Abi Awfa se poocha kya Rasool Allah salla Allahu alaihi wasallam Kaaba ke andar tashreef le gaye thay to unhon ne bataya ke ”Nahi .“

Kaha unhon ne phir poocha ke Nabi Kareem (Sallallahu Alaihi Wasallam) ne Khadija (Radi Allahu Anha) ke mutaliq kya kuch farmaya tha? Unhon ne kaha ke aap ne farmaya tha ”Khadija (Radi Allahu Anha) ko Jannat mein ek moti ke ghar ki bisharat ho, jis mein na kisi qism ka shor-o-ghul ho ga na koi takleef ho gi.“
.

Hum se Ali Bin Abdullah ne bayan kiya ‘ kaha hum se Sufyan Bin Uyainah ne bayan kiya ‘ in se Ismail Bin Abi Khalid ne ‘ unhon ne Abdullah Bin Abi Aufa Radi Allahu Anhuma se suna ‘ wo bayan karte thay ke jab Rasul Allah Sallallahu Alaihi Wasallam ne umra kiya to hum Aap par aar kiye hue mushrikeen ke larkon aur mushrikeen se Aap ki hifazat karte rehte thay taake wo Aap ko koi eeza na de sakein
.