Hum se Qutaiba Bin Saeed ne bayan kiya ‘ kaha hum ko Ismail Bin Jafar ne khabar di ‘ unhein Rabia Bin Abi Abdur Rahman ne ‘ unhein Muhammad Bin Yahya Bin Habban ne aur in se Abu Muhaireez ne bayan kiya ke mein masjid mein dakhil hua to Abu Saeed Khudri Radi Allahu Anhu andar maujood thay. Mein in ke pas baith gaya aur mein ne azl ke mutaliq in se sawal kiya. Unhon ne bayan kiya ke hum Rasul Allah Sallallahu Alaihi Wasallam ke sath Ghazwa Bani Mustaliq ke liye nikle. Is ghazwa mein humein kuch Arab ke qaidi mile (jin mein aurten bhi thin) phir is safar mein humein aurton ki khwahish hui aur be-aurat rehna hum par mushkil ho gaya. Dusri taraf hum azl karna chahte thay (is khauf se ke baccha na paida ho) hamara irada yahi tha ke azl kar lein lekin phir hum ne socha ke Rasul Allah Sallallahu Alaihi Wasallam maujood hain. Aap se puche baghair azl karna munasib na ho ga. Chunancha hum ne Aap se is ke mutaliq pucha to Aap Sallallahu Alaihi Wasallam ne farmaya ke agar tum azl na karo phir bhi koi haraj nahi kyunke qayamat tak jo jaan paida hone wali hai wo zaroor paida ho kar rahe gi
.

Hum se Abul Yaman ne bayan kiya, kaha ke hum ko Shuayb ne khabar di, un se Zuhair ne bayan kiya ke mujhe Ibn Muhairiz ne khabar di aur unhein Abu Saeed Khudri (Radi Allahu Anhu) ne khabar di, ke wo Nabi Kareem (Sallallahu Alaihi Wasallam) ki khidmat mein hazir thay. (Ek Ansari Sahabi ne) Nabi Kareem (Sallallahu Alaihi Wasallam) se poocha ke Ya Rasul Allah! larayi mein hum laundiyon ke paas jima ke liye jate hain. Humara irada unhein bechne ka bhi hota hai. To Aap azl kar lene ke mutalliq kya farmate hain ? Is par Aap (Sallallahu Alaihi Wasallam) ne farmaya, accha tum log aisa karte ho ? Agar tum aisa na karo phir bhi koi haraj nahi. Is liye ke jis rooh ki bhi paidaish Allah Ta'ala ne qismat mein likh di hai wo paida ho kar hi rahegi
.

Hum se Abdullah Bin Yusuf ne bayan kiya, kaha ke hum ko Imam Malik ne khabar di, unhein Rabia Bin Abi Abdur Rahman ne, unhein Muhammad Bin Yahya Bin Habban ne, un se Ibn Muhairiz ne ke mein ne Abu Saeed (Radi Allahu Anhu) ko dekha to un se ek sawal kiya, Aap ne jawab mein kaha ke hum Rasul Allah (Sallallahu Alaihi Wasallam) ke sath Ghazwa Bani Mustaliq ke liye nikle. Is ghazway mein hamein (qabila Bani Mustaliq ke) Arab qaidi hath aaye (raste hi mein) hamein auraton ki khwahish hui aur aurat se alag rehna hum ko mushkil ho gaya. Hum ne chaha ke azl kar lein. Jab Rasul Allah (Sallallahu Alaihi Wasallam) se is bare mein poocha to Aap (Sallallahu Alaihi Wasallam) ne farmaya, tum azl kar sakte ho, is mein koi qabahat nahi lekin jin roohon ki bhi Qiyamat tak ke liye paidaish muqaddar ho chuki hai wo to zaroor paida ho kar rahein gi (lehaza tumhara azl karna bekar hai)
.

Hum se Abdullah bin Muhammad bin Asmaa ne byaan kiya , kaha hum se Juwayriyah ne byaan kiya , in se Imam Malik bin Anas ne , un se Zuhri ne , un se Ibn Muhayreez ne aur un se Abu Saeed Khudri razi Allahu anhu ne byaan kiya ke (ek ghazwa mein) hamain qaidi auratein milien aur hum ne in se azl kiya . Phir hum ne Rasool Allah salla Allahu alaihi wasallam se is ka hukm poocha to Nabi Karim salla Allahu alaihi wasallam ne farmaya ke kiya tum waqayi aisa karte ho ? Teen martaba Aap salla Allahu alaihi wasallam ne yeh farmaya (phir farmaya) Qayamat tak jo rooh bhi paida hone wali hai woh (apne waqt par) paida ho kar rahe gi . Pas tumhara azl karna abas harakat hai .

Hum se Habban bin Musa ne bayan kiya , unhon ne kaha hum ko Abdullah bin Mubarak ne khabar di , unhon ne kaha hum ko Yunus ne khabar di , unhein Zuhri ne kaha ke hamain ko Abdullah bin Muhayreezh Jumhi ne khabar di , unhein Abu Saeed Khudri razi Allahu anhu ne ke woh Nabi Karim salla Allahu alaihi wasallam ke paas baithe huay thay ke qabila Ansar ka ek aadmi aaya aur arz kiya: ya Rasool Allah! Hum londiyon se hum-bistari karte hain aur maal se mohabbat karte hain . Aap ka azhal ke baare mein kya khayal hai ? Nabi Karim salla Allahu alaihi wasallam ne farmaya ke achha tum aisa karte ho , tumhare liye kuch qabahat nahi agar tum aisa na karo , kyunke jis jaan ki bhi paidaish Allah ne likh di hai woh zaroor paida ho kar rahe gi .

Hum se Ishaq ne bayan kiya, kaha hum se Affan ne bayan kiya, kaha hum se Wuhaib ne bayan kiya, kaha hum se Musa bin Uqbah ne bayan kiya, kaha mujh se Muhammad bin Yahya bin Habban ne bayan kiya, in se Ibn Muhaireez ne aur in se Abu Saeed Khudri razi Allahu anhu ne ke Ghazwa e Banu al-Mustaliq mein unhein baandiyan ghaneemat mein milein to unhon ne chaha ke in se hum-bistari karein lekin hamal na thehre. Chunanche logon ne Nabi Karim salla Allahu alaihi wasallam se azhal ke mutalliq poochha: to Aap salla Allahu alaihi wasallam ne farmaya ke agar tum azhal bhi karo to koi qabahat nahi magar Qayamat tak jis jaan ke mutalliq Allah Ta'ala ne paida hona likh diya hai woh zaroor paida ho kar rahe gi (is liye tumhara azhal karna bekar hai). Aur Mujahid ne Qaza-a se bayan kiya ke unhon ne Abu Saeed Khudri razi Allahu anhu se suna, unhon ne bayan kiya ke Nabi Karim salla Allahu alaihi wasallam ne farmaya ke koi bhi jaan jo paida honi hai, Allah Ta'ala zaroor usay paida kar ke rahe ga.