Hum se Abdullah Bin Abi Al-Aswad ne bayan kiya, kaha hum se Hatim Bin Ismail ne bayan kiya, un se Muhammad Bin Yusuf ne bayan kiya, un se Saib Bin Yazid ne ke mein, Abdur Rahman Bin Auf, Talha Bin Ubaidullah, Miqdad Bin Aswad aur Saad Bin Abi Waqqas (Radi Allahu Anhum) ki suhbat mein raha hoon lekin mein ne in hazrat mein se kisi ko Nabi Kareem Sallallahu Alaihi Wasallam se koi hadees bayan karte nahi suna. Sirf Talha Radi Allahu Anhu se Ghazwa Uhud ke mutaliq hadees suni thi
.

Hum se Qutaiba Bin Saeed ne bayan kiya, unhon ne kaha hum se Hatim ne bayan kiya Muhammad Bin Yusuf se, un se Saib Bin Yazid (Radi Allahu Anhu) ne bayan kiya ke mein Talha Bin Ubaidullah, Saad Bin Abi Waqas, Miqdad Bin Aswad aur Abdur Rahman Bin Auf (Radi Allahu Anhum) ki suhbat mein baitha hoon lekin mein ne kisi ko Rasul Allah (Sallallahu Alaihi Wasallam) ki hadees bayan karte nahi suna. Albatta Talha (Radi Allahu Anhu) se suna ke wo Uhud ki jung ke mutalliq bayan kiya karte thay
.

Hum se Ahmad Bin Muhammad ne bayan kiya, kaha hum ko Abdullah ne khabar di, kaha hum ko Auzai ne khabar di, unhon ne kaha ke un se Ishaq Bin Abdullah Bin Abi Talha ne aur un se Anas Bin Malik (Radi Allahu Anhu) ne bayan kiya ke Abu Talha (Radi Allahu Anhu) apni aur Nabi Kareem (Sallallahu Alaihi Wasallam) ki aar ek hi dhaal se kar rahe thay aur Abu Talha (Radi Allahu Anhu) bare acche teer-andaz thay. Jab wo teer marte to Nabi Kareem (Sallallahu Alaihi Wasallam) sar utha kar dekhte ke teer kahan ja kar gira hai
.