Hum se Hassan Bin Hassan ne bayan kiya, kaha hum se Muhammad Bin Talha ne bayan kiya, kaha hum se Humaid Taweel ne bayan kiya aur un se Anas Radi Allahu Anhu ne ke in ke chacha (Anas Bin Nazr) Badr ki larayi mein shareek na ho sake thay, phir unhon ne kaha ke mein Nabi Kareem Sallallahu Alaihi Wasallam ke sath pehli hi larayi mein ghair hazir raha. Agar Nabi Kareem Sallallahu Alaihi Wasallam ke sath Allah Ta'ala ne mujhe kisi aur larayi mein shirkat ka mauqa diya to Allah dekhe ga ke mein kitni be-jigri se larrta hoon. Phir Ghazwa Uhud ke mauqe par jab musalmanon ki jamaat mein afra tafri paida ho gayi to unhon ne kaha: Ai Allah! Musalmanon ne aaj jo kuch kiya mein tere huzoor mein is ke liye mazrat khwah hoon aur mushrikeen ne jo kuch kiya mein tere huzoor mein is se apni bezari zahir karta hoon. Phir wo apni talwar le kar aage barhe. Raste mein Saad Bin Muaz Radi Allahu Anhu se mulaqat hui to unhon ne un se kaha, Saad! Kahan ja rahe ho? Mein to Uhud pahari ke daman mein jannat ki khushbu soongh raha hoon. Is ke baad wo aage barhe aur shaheed kar diye gaye. In ki lash pehchani nahi ja rahi thi. Aakhir in ki bahen ne ek til ya in ki ungliyon ke poar se in ki lash ko pehchana. Unko assi (80) se zyada zakham bhaale aur talwar aur teeron ke lage thay
.

Hum se Muhammad Bin Saeed Khuzai ne bayan kiya, kaha hum se Abdur-ul-Ala ne bayan kiya, un se Humaid ne bayan kiya ke mein ne Anas (Radi Allahu Anhu) se poocha (doosri sanad) Hum se Amr Bin Zurarah ne bayan kiya, kaha hum se Ziyad ne bayan kiya, kaha ke mujh se Humaid Tawil ne bayan kiya aur un se Anas (Radi Allahu Anhu) ne bayan kiya ke mere chacha Anas Bin Nazr (Radi Allahu Anhu) Badr ki larai mein hazir na ho sake, is liye unhon ne arz kiya ya Rasul Allah! Mein pehli larai hi se ghaib raha jo Aap ne mushrikeen ke khilaf lari lekin agar ab Allah Ta'ala ne mujhe mushrikeen ke khilaf kisi larai mein haziri ka mauqa diya to Allah Ta'ala dekh le ga ke mein kya karta hoon. Phir jab Uhud ki larai ka mauqa aaya aur musalman bhag nikle to Anas Bin Nazr ne kaha ke ae Allah! Jo kuch musalmanon ne kiya mein us se mazrat karta hoon aur jo kuch in mushrikeen ne kiya hai mein us se bezar hoon. Phir wo aage barhe (mushrikeen ki taraf) to Saad Bin Maaz (Radi Allahu Anhu) se samna hua. Un se Anas Bin Nazr (Radi Allahu Anhu) ne kaha ae Saad Bin Maaz! Mein to jannat mein jana chahta hoon aur Nazr (un ke baap) ke Rab ki qasam mein jannat ki khushbu Uhud pahar ke qareeb pata hoon. Saad (Radi Allahu Anhu) ne kaha ya Rasul Allah (Sallallahu Alaihi Wasallam)! Jo unhon ne kar dikhaya is ki mujh mein himmat na thi. Anas (Radi Allahu Anhu) ne bayan kiya ke is ke baad jab Anas Bin Nazr (Radi Allahu Anhu) ko hum ne paya to talwar neze aur teer ke taqreeban assi zakhm un ke jism par thay wo shaheed ho chuke thay mushrikon ne un ke aaza kaat diye thay aur koi shakhs unhein pehchan na saka tha, sirf un ki behen unglion se unhein pehchan saki thi. Anas (Radi Allahu Anhu) ne bayan kiya hum samajhte hain (ya Aap ne bajaye «nry» ke «nzn» kaha) matlab ek hi hai ke ye aayat un ke aur un jaise momineen ke bare mein nazil hui thi ke «mn almwmny n rjal sdqw ma eahdw allh elyh» "Mominon mein kuch wo log hain jinhon ne apne us wade ko sacha kar dikhaya jo unhon ne Allah Ta'ala se kiya tha." Aakhir aayat tak
.

Unhon ne bayan kiya ke Anas Bin Nazr (Radi Allahu Anhu) ki ek behen Rubayye namm-i (Radi Allahu Anha) ne kisi khatoon ke aage ke dant tor diye thay, is liye Rasul Allah (Sallallahu Alaihi Wasallam) ne un se qisas lene ka hukm diya. Anas Bin Nazr (Radi Allahu Anhu) ne arz kiya ya Rasul Allah! Is zat ki qasam jis ne Aap ko haq ke sath Nabi banaya hai (qisas mein) un ke dant na tootein ge. Chunancha muddayi tawan lene par raazi ho gaye aur qisas ka khayal chor diya, is par Rasul Allah (Sallallahu Alaihi Wasallam) ne farmaya ke Allah ke kuch bande hain ke agar wo Allah ka naam le kar qasam kha lein to Allah khud un ki qasam poori kar deta hai
.